Ekugqibeleni Uxolo Emhlabeni!

ABANYE abantu bakholelwa kwelokuba ugonyamelo lunokuzisa inkululeko yezobupolitika okanye ukuhlanjululwa konqulo—ubugrogrisi bunokuphelisa nabalawuli abangafunwayo. Kwakhona, abanye oorhulumente basebenzisa ubugrogrisi njengesicombululo seengxwabangxwaba nokuze bagcine abantu belawuleka. Ukuba ke phofu ukugrogrisa kusisicombululo sokulawula abantu nokuze iphucuke impilo yabo, bekufanele ukuba sele kukho uxolo nempumelelo. Emva kwexesha elithile, ugonyamelo noloyiko lufanele luphele. Ngaba sele siyibona le miphumo?

Inyaniso yeyokuba ubugrogrisi buphelisa intlonelo ngobomi kwaye bukhokelela kwizantyalantyala zegazi nenkohlakalo. Ngenxa yentlungu akuyo, amaxhoba ayaziphindezela, nto leyo ekhokelela kolunye udushe nokunye ukuziphindezela.

Ugonyamelo Alusiso Isicombululo Seengxaki Zethu

Sele kuziinkulungwane abantu bezama ukucombulula iingxaki zabo zepolitiki, ezonqulo nezasekuhlaleni. Kodwa onke amatiletile abawenzileyo aye asilela. Kunjengokuba iBhayibhile isitsho: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yeremiya 10:23) UYesu wathi: “Ubulumko bungqineka bububulungisa ngemisebenzi yabo.” (Mateyu 11:19) Ngokucingisisa ngale migaqo, sinokubona ukuba ubugrogrisi abunakuze buzise isicombululo kwiingxaki zoluntu. Imiphumo yobugrogrisi ayikhange ibe yinkululeko nolonwabo, kodwa kunoko, buye bazisa ukufa, unxunguphalo kunye nomonakalo. Le miphumo mibi, iye yenza umbhodamo kwinkulungwane yama-20, kwaye ngathi buqatsele kule nkulungwane yama-21. Abantu abaninzi bathi kunokuba ubugrogrisi buzise isicombululo, buye badala iingozi ezininzi.

Intombazana eyatshiselwa umzi wakowayo ngabagrogrisi yabhala yathi: “Suku ngalunye ndithandazela ukuba kungabikho namnye kwintsapho yakowethu okanye umhlobo ofayo . . . Mhlawumbi elo liphuph’ emini.” Amazwi ale ntwazana abonisa isigqibo abanye abaye bafikelela kuso: Isicombululo seengxaki zoluntu asinako ukuziswa lulawulo lomntu. Kuphela nguMdali wabantu onako ukucombulula iinzima esinazo kuquka ubugrogrisi. Kodwa kutheni simele sithembele kuThixo?

Isizathu Sokuba Sithembele KuThixo

Esinye isizathu sikukuba njengoMdali, uYehova uye wasinika ubomi kwaye ufuna sibuphile ngoxolo yaye sanelisekile. Umprofeti kaThixo uIsaya wabhala wathi: “Ngoku ke, Yehova, wena unguBawo. Siludongwe, yaye wena unguMbumbi wethu; thina sonke singumsebenzi wesandla sakho.” (Isaya 64:8) UYehova nguBawo woluntu lonke kwaye zonke iintlanga zabantu zixabisekile kuye. Kukungabikho kokusesikweni nentiyo okuye kwakhokelela kubugrogrisi, yaye asinakudyobha uThixo ngale nto. UKumkani uSolomon osisilumko wakha wathi: “Koku kuphela endikufumeneyo, kukuba uThixo oyinyaniso walwenza uluntu lwathi tye, kodwa lusuke lona lwafuna amacebo amaninzi.” (INtshumayeli 7:29) Ubungendawo babantu kunye nempembelelo yeedemon yimvelaphi yobugrogrisi kungengakuba uThixo uphelelwe ngamacebo.—Efese 6:11, 12.

Esinye isizathu sokuba sinokumthemba uYehova kukuba udale abantu, usiqonda nangaphezu kwaye nabani na isizathu sokuba uluntu lube kwezi ngxaki nezicombululo zazo. IBhayibhile ichaza le nyaniso kwiMizekeliso 3:19: “UYehova wawuseka umhlaba ngobulumko. Wawazinzisa ngokuqinileyo amazulu ngokuqonda.” Inentembelo epheleleyo kuThixo, indoda yamandulo yabhala: “Luya kuvela phi na uncedo lwam? Uncedo lwam luvela kuYehova, uMenzi wezulu nomhlaba.”—INdumiso 121:1, 2.

Kukho isizathu sesithathu esenza ukuba simthembe uThixo: Unawo amandla okuphelisa ubundlobongela nokuphalazwa kwegazi. Ngexesha likaNowa “umhlaba wawuzaliswe lugonyamelo.” (Genesis 6:11) Umgwebo kaThixo wafika ngokukhawuleza yaye walitshayela kwathi tu elo hlabathi: “[UThixo] engazange ayeke nokohlwaya ihlabathi lamandulo, . . . wazisa unogumbe phezu kwehlabathi labantu abangenabuthixo.”—2 Petros 2:5.

IBhayibhile isifundisa oku ngoMkhukula womhla kaNowa: “UYehova uyakwazi ukubahlangula esilingweni abantu abanozinikelo lobuthixo, kodwa abantu abangengomalungisa ubagcinele imini yomgwebo ukuze banqunyulwe.” (2 Petros 2:9) UThixo uyabaqonda abo babufuna ngokunyanisekileyo ubomi obubhetele nabo benza ubomi bube ngumnqantsa kwabanye. Uye wabekela abo banjalo “imini yomgwebo neyentshabalalo yabantu abangenabuthixo.” Kodwa abo baphuthuma ubulungisa, ubalungiselele ihlabathi elitsha apho kuya kuhlala khona ubulungisa.—2 Petros 3:7, 13.

Uxolo Luya Kuhlala Luhleli Emhlabeni!

Ababhali beBhayibhile badla ngokusebenzisa igama elithi “umhlaba” bebhekisa ebantwini. Ngokomzekelo iGenesis 11:1 ithi “wonke umhlaba,” abantu abaphilayo ngeloo xesha, babethetha ulwimi olunye. Umpostile uPetros wayecinga ngendlela efanayo xa wasebenzisa ibinzana elithi “umhlaba omtsha.” UYehova uThixo uya kuluguqula uluntu kangangokuba ubulungisa nokusesikweni kuya kuthabathel’ indawo ugonyamelo nentiyo “njengabemi” emhlabeni ngonaphakade. Kwisiprofeto esikwincwadi kaMika 4:3, iBhayibhile isixelela ukuba: “Ngokuqinisekileyo uya kunikela umgwebo phakathi kwezizwana ezininzi, alungelelanise imicimbi ngokuphathelele iintlanga ezinamandla ezikude. Ziwakhande amakrele azo abe ngamakhuba nemikhonto yazo ibe zizikere zokuthena imithi. Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.”

Buya kuba njani ubomi xa eso siprofeto sizaliseka? Incwadi kaMika 4:4 ithi: “Baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.” Kumhlaba oyiParadesi, akukho namnye uya kuphila ubomi bentshontsho ngenxa yokuhlaselwa ngabagrogrisi. Ngaba ungasithemba eso sithembiso? Ewe, “kuba wona kanye umlomo kaYehova wemikhosi ukuthethile oko.”—Mika 4:4.

Njengoko ukuhlasela kwabagrogrisi kusanda kwaye iintlanga zingcangcazela ngenxa yogonyamelo, isicombululo sabathandi boxolo kukuthemba uYehova. Akukho nto iyintsumantsumane kuye. Uya kuphelisa iintlungu, intlupheko nokufa. IBhayibhile ithi: “Uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.” (Isaya 25:8) Kumazwe amahle anabantu abaninzi abajamelene neentlungu nokoyika ngenxa yobugrogrisi, ezo zinto ziya kuthatyathelw’ indawo luxolo. Olo xolo luthenjiswe nguThixo “ongenakuxoka,” yiloo nto kanye abantu abayifuna ngamehl’ abomvu.—Tito 1:2; Hebhere 6:17, 18.

[Ibhokisi/Imifanekiso ekwiphepha 9]

EYONA NTO IBHETELE KUNEEMBUMBULU NEZIQHUSHUMBISI

La ngamagqabaza abantu ababecinga ukuba ugonyamelo luyindlela yokuzisa utshintsho kwezopolitiko.

◼ “Njengoko ndandifunda iincwadi zembali, ndafumanisa ukuba ookumkani kunye neziphatha-mandla bezisoloko ziwaphethel’ imbengwana amahlwempu. Ndayibona indlela abantu abahluphekileyo abatsala nzima ngayo. Njengoko ndandicinga indlela obunokuphela ngayo obu bubi, ndagqiba kwelokuba imbumbulu mayity’ emntwini.”—URamon.a

◼ “Ndandikwiqela labagrogrisi. Injongo yayikuchasa abasemagunyeni ndize ndakhe ibutho labantu emhlabeni elaliza kulingana ngento yonke.”—ULucian.

◼ “Ukususela ngexesha ndiseyinkwenkwana, kwakundenza ndibe nesingqukru ukungabikho kokusesikweni. Oku kuquka ubuhlwempu, ulwaphulo-mthetho, umgangatho ophantsi wemfundo nokungabikho konyango. Ndandikholelwa kwelokuba ukusetyenziswa kwezigalo kunokuzisa imfundo, unyango oluphucukileyo, izindlu nemisebenzi. Ndandikwakholelwa kwelokuba nabani na ongalawulekiyo nongenantlonelo kubamelwane bakhe ufanele ohlwaywe.—UPeter.

◼ “Mna nomyeni wam sasingamalungu ombutho wabarhubuluzi owawukhuthaza imvukelo nogonyamelo. Sasinethemba lokuba siya kuvelisa urhulumente oya kuzisa impilo entle, inzolo kunye nokulingana komgangatho wabantu bonke. Sasicinga ukuba ukuvukela urhulumente yayikukuphela kwendlela yokuzisa okusesikweni kwilizwe lethu.”—ULourdes.

Aba bantu babefuna ukunceda abanye ngokusebenzisa izigalo. Kodwa ngenxa yokuba baye bafunda iBhayibhile namaNgqina kaYehova, baye bafumanisa ukuba iLizwi likaThixo lithetha ngeny’ indlela. IBhayibhile ithi kwincwadi kaYakobi 1:20: “Kuba ingqumbo yomntu ayisebenzi bulungisa bukaThixo.” IBhayibhile yesiXhosa yowe-1996 iyibeka ngolu hlobo le ndinyana: “Kaloku into umntu ayenza enomsindo ayinakwamkeleka kuThixo.”

Kuphela lulawulo lukaThixo olunokuguqula iimeko zebutho labantu. Iziprofeto zeBhayibhile, njengoMateyu isahluko 24 kunye neyesi-2 kuTimoti 3:1-5, zibonisa ukuba urhulumente kaThixo uza kwenza kanye oko. Siyakukhuthaza ukuba ufunde ezi nyaniso zeBhayibhile kunye namaNgqina kaYehova.

[Umbhalo osemazantsi]