Indalo Yayenza Kuqala
“Indlebe evayo neliso elibonayo—uYehova uzenzile zombini.”—IMizekeliso 20:12.
AMEHLO akho afana neekhamera ezincinane zikamabonwakude. Atshintsha imifanekiso ibe yimitha yombane aze ayidlulisele ngemithambo-luvo yeliso ebuchotsheni apho ibonwa khona imifanekiso.
Nangona lilincinane, iliso liyamangalisa. Liziimilimitha ezingama-24 ububanzi lize libe nobunzima obuziigram ezisixhenxe nesiqingatha yaye lenziwe ngobuchule obungathethekiyo. Ngokomzekelo lineenkqubo ezahlukahlukeneyo zokulawula indlela obona ngayo kwindawo eluzizi nekhanyayo ukuze kuthi kwimizuzu engama-30 emva kokungena kwigumbi elimnyama, amehlo akho angakwazi ukunyamezela ukukhanya ngomlinganiselo ongaphezu kwama-10 000 kunakuqala.
Xa kukhanya ngendlela eqhelekileyo, yintoni ekwenza ubone kakuhle? Iliso lakho lineeseli ezibona ukukhanya ezizodlula ngokuphindwe kali-100 ezeekhamera zevidiyo ezininzi. Kwakhona, inxalenye enkulu yezo seli igcinwe kwindawo encinane ekumbindi weliso ebizwa ngokuba yifovea, eyenza ukuba iliso lonke libone kakuhle. Ekubeni ukwazi ukujikajika amehlo akho kaninzi ngomzuzwana, iba ngathi iliso lonke liyakwazi ukubona kakuhle. Iyamangalisa into yokuba, ifovea yeliso lakho ibulingana nesingxi esisekupheleni kwesi sivakalisi.
Imitha yombane evela kwiiseli ezibona ukukhanya ityhutyha imithambo-luvo de iye kufika kuleyo yamehlo. Kodwa iiseli zemithambo-luvo azipheleli nje ekudluliseleni loo mitha. Ziyayihlalutya, zibalaselisa inkcazelo efunekayo zize ziyisuse leyo ingeyomfuneko.
Inwebu yobuchopho bakho elawula ukubona ifana nomatshini oxhakaxhaka wevidiyo. Iyenza icace imifanekiso ize ithelekise imitha ekwiiseli ezibona imibala ekuphuma kuyo yonke eminye imibala, ukuze ukwazi ukwahlulahlula eminye imibala ezizigidi ngezigidi. Kanti ubuchopho bakho buthelekisa nowona mahluko mncinane ukhoyo kwizinto ezibonwa ngamehlo akho, ukuze ukwazi ukubona ubungakanani bomgama.
Cinga nje ngendlela amehlo akwazi ngayo ukubona ubuso babantu abakwiqela elikude aze athumele imitha ebuchotsheni ukuze ukwazi ukubona kakuhle. Kanti, khawucinge nje ngendlela iinkcukacha ezincinane zobuso babo bantu ezithelekiswa ngayo nezinto ezisengqondweni yakho ukuze ukwazi ukukhawuleza umbone umhlobo wakho okwelo qela. Imangalisa ngendlela engathethekiyo le nkqubo!
[Umfanekiso okwiphepha 7]
Indlela iliso elisebenza ngayo ingqina ukuba lenziwe ngobuchule obumangalisayo