Iziko Lonyango Elihambayo
● Ibhinqa elikhulelweyo lalihleli kwiholo enkulu liphulaphule ngenyameko ucwangciso lwemfundiso yeBhayibhile. Kwathi kusenjalo lalunywa. Kodwa uncedo lwakhawuleza lwafika. Kwakukho iambulensi ekufutshane nalapho ibe ngethutyana nje elingephi eli bhinqa nomyeni walo babesele besesibhedlele. Lazala usana oluhle oluyintombazana.
Kule mihla, iiambulensi ezithwala abantu abagula kakhulu ziluncedo gqitha kumaziko ezonyango amazwe amaninzi. Ezi zithuthi ziba nabantu abaqeqeshiweyo—oogqirha, oonesi nabaqhubi abaqeqeshelwe ukuziqhuba.a Baxhobele ukunceda abantu abakwiingozi zeemoto, abamelwe ziintliziyo, abanestroke, nabantwana abakhawuleze bazalwa. Nyaka ngamnye ezi zithuthi zonyango olukhawulezileyo zisindisa amawakawaka abantu.
Ngowama-2004 kwasindiswa abantu abamalunga nama-400 ngoxa kwakuhlaselwa oololiwe abane abathutha abantu, kuba amaqela asebenza kwiiambulensi akhawuleza ukuza kunceda abantu.b UGqr. Ervigio Corral Torres, umalathisi wecandelo loncedo olukhawulezileyo eMadrid, eSpeyin, usayikhumbula loo ntlekele. Uthi: “Iziganeko ezifana nezi kudla ngokuthethwa ngazo kakhulu ezindabeni, kodwa icala esisebenza kakhulu kulo kusekuncedeni abantu mihla le, kwiindawo zikawonke wonke. Yeyona nkalo ibalulekileyo yenkonzo esiyinikela ebantwini, ukusindisa abantu abanamathuba ambalwa okuphila.”
Xa wabuzwa ukuba ebeya kuncomela ntoni enokuphucula umsebenzi wabo, uGqr. Corral waphendula wathi: “Sifanele sibakhuthaze kakhulu abantu ukuba baqhagamshelane nathi xa kuyimfuneko.” Waleka ngelithi: “Usukelo lwethu kukuluthumela ebantwini unyango olukumgangatho ophezulu naphi na, nanini na belufuna size sikwenze oko ngokukhawuleza kangangoko kunokwenzeka xa sicelwa ukuba senjenjalo.” Kwizixeko ezikhulu, uncedo ludla ngokufika kwisithuba semizuzu elishumi.
Kwizixeko eziphithizela njengeSão Paulo, eBrazil, ukuxinana kweemoto kuwenza nzima umsebenzi wabaqhubi beeambulensi, ngenxa yoko kuthunyelwa abasebenzi bezonyango abahamba ngezithuthuthu. Aba bezithuthuthu bafika kuqala kuneeambulensi ukuza kuhlola imeko baze babanike izithomalalisi abo bafuna unyango. Ezinye izixeko ezinale nkonzo ikhawulezayo yiKuala Lumpur, eMalaysia; iLondon, eNgilani; kwakunye neMiami, eUnited States.
[Imibhalo esemazantsi]
a Abaqhubi bazo bamele bakwazi ukusebenzisa izixhobo zonyango ezikuzo baze bakwazi ukuqhuba ngendlela efanele umguli abamkhwelisileyo.
b Sicela ufunde uVukani! wesiNgesi kaNovemba 8, 2004, iphepha 14.
[Ibhokisi/Umfanekiso okwiphepha 11]
INDLELA WENA ONOKUNCEDA NGAYO
Ezinye izinto ezisisiseko onokuzenza kwimo yongxamiseko ukuze uncedisane nabaqhubi beambulensi ziquka:
1. Tsalela umnxeba inombolo yongxamiseko ngokukhawuleza. Kumazwe aseYurophu, le nombolo ngu-112, no-911 eUnited States.
2. Yichaze kakuhle indawo eyehle kuyo ingozi.
3. Chaza iimpawu ozibonayo. Ngokomzekelo, ngaba loo mntu usaphefumla? Ngaba usezingqondweni? Ngaba uyopha?
4. Ukuba wenzakele kakhulu, qiniseka ukuba akashukumi kuba oko kunokumenzakalisa ngakumbi.
5. Ukuba umntu uyagabha, mbeke ngecala ukuze angatsarhwa.