Ngaba Unqulo Ludala Uxolo?

KWICHURCH of the Holy Sepulchre yaseYerusalem eyaziwa ngabaninzi njengeyona cawa ingcwele kwiNgqobhoko, kugquba ingxwabangxwaba nentiyo. Kuthiwa le cawa yakhiwe kwindawo apho “uKristu wangcwatyelwa waza wavuselwa khona.” Noko ke, kule ndawo ihloniphekileyo kuye kwakho imilo emininzi enogonyamelo. Iimonki nabefundisi bamahlelo amathandathu eecawa “zobuKristu” baye balwa ngelungelo lokusebenzisa le cawa. Kutshanje olu sukuzwano luye kwathath’ unyawo. Amapolisa axhobe afohlela kuye kwafuneka angenelele aze aluthabathele kuwo ulawulo lwale cawa okwexeshana.

Ugonyamelo Kudala Lwabakho Ezicaweni

Izinto ezenzeka kwiChurch of the Holy Sepulchre ziyinxalenye yembali ende yophalazo gazi nokubulawa kwabantu ngenxa yokuzondelela unqulo. Emva kokuba ihlole iziganeko zodushe ezenzeka kwiindawo ezahlukeneyo ehlabathini, incwadi ethi Violence in God’s Name ithi: “Ukususela eIndonesia ukuya kuthi ga kuMntla weIreland, ukususela kuMbindi Mpuma ukuya kutsho eKashmir, ukusuka eIndiya ukuya kutsho eNigeria nokusuka eBalkans ukuya kutsho eSri Lanka, amaKristu, amaBhuda, amaYuda, amaHindu, amaSilamsi namaSikh angxengxezela ugonyamelo kuba esithi akhusela unqulo lwawo.”

Sekunjalo, inkoliso yeecawa zifundisa uxolo nomanyano. Ukutyhubela iinkulungwane, iicawa bezisoloko zikhuthaza iimpawu ezintle njengokuthanda ummelwane nokuhlonela ubomi. Ngaba ke ngoko iicawa azifanele ziququzelele uxolo? Abanquli abanyanisekileyo baya kube benza kakuhle xa becingisisa ngalo mbuzo.