Abantu Abaselula Bayabuza
Ngaba Ndilikhoboka Lezinto Ze-elektroniki?
Yintoni abafana ngayo aba bantu bathathu?
“Ndikuthanda gqitha ukuthumela imiyalezo ngefowuni. Ndicinga ukuba ayikho enye into ebhetele kunaleyo. Ayikho enye into endiyenzayo ngaphandle kokuthumela imiyalezo.”—UAlan.a
“Ndavuya gqitha mhla umama wandithengela owam umabonwakude. Kunokuba ndilale, ndandihlala phambi kwawo ndiwubukele. Ndandikhetha ukubukela wona kunokuba ndihlale nentsapho nabahlobo.”—UTeresa.
“Kangangexesha elithile ndandingakwazi ukuya naphi na okanye ndenze nantoni na ngaphambi kokuba ndijonge ii-email zam. Ukuba ndiye ndothuka ezinzulwini zobusuku ndandivula ikhompyutha. Ndandisebenzisa ikhompyutha nanini na ndifumana ithuba.”—UAnna.
Nguwuphi kwaba bathathu onokuthi ulikhoboka lwento ethile ye-elektroniki?
□ UAlan □ UTeresa □ UAnna
XA ABAZALI bakho babeselula, umabonwakude nonomathotholo yayizezona zinto ze-elektroniki ezazisetyenziswa. Ngaloo maxesha, ifowuni yayiyinto nje yokuthetha nabanye abantu yaye yayidla ngokuxhonywa eludongeni. Ngelo xesha kwakusadliwa ngendeb’ endala, akunjalo? Koko kanye kutshiwo yintombazana ekuthiwa nguAnna. Uthi: “Xa babesakhula, abazali bam babengaphuphi nokuphupha ngezinto ezifana neeselfowuni. Kungona befunda indlela yokusebenzisa iiselfowuni zabo.”
Namhlanje, uyakwazi ukufowuna, udlale umculo, ubukele inkqubo ethile, udlale imidlalo yekhompyutha, uthumele abahlobo bakho iemail, ufote, usebenzise i-Internet, ngesixhobo nje esinye okwaziyo ukusifaka epokothweni. Ngenxa yokuba ukhule kukho iikhompyutha, iiselfowuni, oomabonwakude ne-Internet usenokungaboni nto ityhulu ngokuchitha ixesha elininzi kuzo. Kodwa bona abazali bakho basenokuvakalelwa kukuba ulikhoboka lazo. Ukuba bathetha nawe ngale nto, musa ukukhawuleza uthi badla ngendeb’ endala. UKumkani uSolomon owayesisilumko wathi: “Ukuba nabani na uphendula umbandela ngaphambi kokuwuva, bubudenge obo kuye nokuthotywa.”—IMizekeliso 18:13.
Ngaba ukhe ucinge ngesizathu sokuba abazali bakho bexhalabile? Khawukhe uzihlole ngoku kubhalwe ngezantsi uze ubone enoba awulilo kusini na ikhoboka lezinto ze-elektroniki.
‘Ngaba Ndilikhoboka?’
Enye intyilalwazi ithi ukuba likhoboka lento ethile kuthetha “ukusoloko uyenza uze ungafuni okanye ungakwazi ukwahlukana nayo enoba iyingozi kangakanani na kuwe.” Ngokwendlela ekuchazwe ngayo ukuba likhoboka, bobathathu aba baselula kuthethwe ngabo ekuqaleni kweli nqaku bangamakhoboka okanye bakha bangamakhoboka ezinto ze-elektroniki. Kuthekani ngawe? Khawuqwalasele apha ngezantsi indlela okuchazwe ngayo ukuba likhoboka. Funda izinto ezithethwe ngabantu abacatshuliweyo uze ubone enoba awukhange uthethe okanye wenze okufanayo kusini na. Emva koko zibhale phantsi iimpendulo zakho.
Ukungakwazi ukwahlukana nomkhwa othile. “Ndandidla ngokuchitha iiyure ndidlala imidlalo ye-elektroniki. Ndandingalali yaye kwakukuphela kwento endandithetha ngayo. Ndandiyinkom’ edla yodwa ibe ndandisoloko ndicinga ngale midlalo.”—UAndrew.
Ucinga ukuba lingakanani ixesha umntu afanele alichithe esebenzisa izinto ze-elektroniki? ․․․․․
Abazali bakho bona bacinga ukuba ufanele uchithe ixesha elingakanani? ․․․․․
Lixesha elingakanani olichitha suku ngalunye uthumela imiyalezo ngefowuni, ubukele umabonwakude, ufaka iifoto okanye uthetha nabantu kwi-Internet okanye udlala imidlalo yekhompyutha nezinye izinto? ․․․․․
Ngaba iimpendulo zakho ezingasentla azibonisi ukuba uzisebenzisa ngendlela egqith’ emgceni izinto ze-elektroniki?
□ Ewe □ Hayi
Awukwazi okanye awufuni ukwahlukana nayo. “Abazali bam bandibona ndisoloko ndithumela imiyalezo ngefowuni baze bandixelele ukuba ndisoloko ndisefowunini. Kodwa xa ndizithelekisa nabanye abantwana abalingana nam, kuba ngathi andiyisebenzisi konke konke ifowuni. Ewe kona ndithumela imiyalezo yefowuni ngaphezu kwabazali bam. Kodwa oku kufana nokuthelekisa ama-apile nama-orenji—kaloku bona bakwiminyaka engama-40 ngoxa mna ndineminyaka eli-15.”—UAlan.
Ngaba abazali okanye abahlobo bakho bathi uchitha ixesha elininzi usebenzisa izinto ze-elektroniki?
□ Ewe □ Hayi
Ngaba awukwazi okanye awufuni ukulawula indlela ozisebenzisa ngayo izinto ze-elektroniki?
□ Ewe □ Hayi
Imiphumo eyingozi. “Abahlobo bam basoloko besebenzisa iselifowuni, naxa beqhuba. Iyingozi kakhulu lonto nto!”—UJulie.
“Ukuqala kwam ukuba neselfowuni ndandisoloko ndifowuna okanye ndithumela imiyalezo. Yayingekho enye into endandiyenza. Loo nto yandixabanisa nentsapho kunye nabanye abahlobo bam. Ngoku ndiphawula ukuba xa ndikunye nabahlobo bam basoloko bephazamisa incoko ngokuthi: ‘Yima nje kancinci khe ndiphendule le fowuni.’ Yiloo nto ebangela ukuba ndingevani nabahlobo bam.”—UShirley.
Ngaba ukhe ufunde okanye uthumele imiyalezo ngefowuni ngoxa uqhuba okanye useklasini?
□ Ewe □ Hayi
Xa uncokola nentsapho okanye abahlobo bakho, ngaba umane uphazamis’ incoko ngokuphendula i-email, ifowuni okanye ngokuthumela imiyalezo ngefowuni?
□ Ewe □ Hayi
Ngaba izinto ze-elektroniki zikwenza ungalali okanye ungakwazi nokufunda?
□ Ewe □ Hayi
Indlela Efanelekileyo Yokuzisebenzisa
Ukuba usebenzisa enye yezinto ze-elektroniki—enoba yikhompyutha, iselfowuni, okanye ezinye—khawuzibuze le mibuzo mine ingezantsi. Ukusebenzisa icebiso leBhayibhile nokulandela imigaqo ethile kuya kukunceda ukwazi ukuzisebenzisa kakuhle izinto ze-elektroniki.
1. Yintoni oncokola ngayo? “Hlalani nicinga ngezinto eziyinyaniso, nezizezenkxalabo enzulu, nezibubulungisa, nezinyulu, nezithandekayo, nekuthethwa kakuhle ngazo, nezinesidima, nezincomekayo.”—Filipi 4:8.
Nxibelelana nabahlobo nentsapho uze uncokole ngezinto ezakhayo.—IMizekeliso 25:25; Efese 4:29.
Musa ukudlulisela intlebendwane, ukuthumela imiyalezo neefoto ezingcolileyo okanye ukubukela iividiyo neenkqubo ezinamanyala.—Kolose 3:5; 1 Petros 4:15.
2. Ndizisebenzisa nini? “Yonke into inexesha layo elimisiweyo.”—INtshumayeli 3:1.
Zibekele ixesha oza kulichitha ufowuna okanye uthumela imiyalezo, ubukele iinkqubo ezithile okanye udlala imidlalo yekhompyutha. Yiba nembeko ngokuzicima izinto ezinjengefowuni xa ukwiintlanganiso zonqulo. Unokuyiphendula kamva nayiphi na imiyalezo oyifumeneyo.
Musa ukuvumela izinto ze-elektroniki ukuba ziphazamise ixesha obuza kulichitha nabahlobo kunye nentsapho, elokufunda okanye elokwenza izinto ezinokuthanani nonqulo.—Efese 5:15-17; Filipi 2:4.
3. Ngoobani endincokola nabo? “Ningalahlekiswa. Unxulumano olubi lonakalisa imikhwa elungileyo.”—1 Korinte 15:33.
Sebenzisa izinto ze-elektroniki ukuze uqinise ubuhlobo kunye nabantu abakukhuthaza ukuba wenze izinto ezintle.—IMizekeliso 22:17.
Musa ukuziqab’ intshongo emehlweni. Nawe uya kwenza izinto, uthethe okanye ucinge njengabantu oncokola nabo nge-e-mail, ngefowuni, kumabonwakude, kwiividiyo okanye kwi-Internet.—IMizekeliso 13:20.
4. Ndichitha ixesha elingakanani kuzo? “Niqiniseke ngezinto ezibaluleke ngakumbi.”—Filipi 1:10.
Libhale ixesha olichitha kwizinto ze-elektroniki.
Musa ukuzibetha ngoyaba izinto ezithethwa ngabahlobo okanye abazali bakho, xa besithi uchitha ixesha elininzi usebenzisa izinto ze-elektroniki.—IMizekeliso 26:12.
Ethetha ngokuzisebenzisa kakuhle izinto ze-elektroniki, uAndrew ocatshulwe ngaphambili uthi: “Izinto ze-elektroniki zikwenza wonwabe, kodwa olo lonwabo lolokwexeshana. Ndiye ndafunda ukungazivumeli izinto zale mihla ukuba zindahlukanise nentsapho nabahlobo bam.”
Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype
[Umbhalo osemazantsi]
a Amanye amagama akweli nqaku atshintshiwe.
[Ibhokisi/Imifanekiso ekwiphepha 25]
OKO KUTHETHWA LOLUNYE ULUTSHA
“Abazali bam babedla ngokuthi kum, ‘Kutheni singavele sizincamathisele kuloo fowuni izandla zakho. Ekuqaleni ndandicinga ukuba bayadlala kodwa kamva ndaphawula ukuba abadlali. Ngoku andisayisebenzisi kakhulu ifowuni ibe ndonwabile.”
“Ndandidla ngokucinga ukuba ndifanele ndivule i-Internet nanini na ndifumana ithuba ukuze ndifunde imiyalezo. Ndandingenalo ixesha lokwenza umsebenzi wesikolo nelokufunda. Ekubeni ngoku ndingasayisebenzisi kakhulu, kutsho kwathi qabu noko. Eyona nto ibalulekileyo kukuyisebenzisa ngendlela elinganiselweyo.”
[Imifanekiso]
UJovarny
UMariah
[Ibhokisi ekwiphepha 26]
“NDANDILIKHOBOKA LEZINTO ZE-ELEKTRONIKI”
“Kwiminyaka embalwa edluleyo safudukela kwenye indawo. Ekubeni ndandifuna ukuqhubeka ndincokola nabo, abahlobo bam bacebisa ukuba simane sithumelelana iifoto nge-Internet. Lalibonakala ilicebiso elihle. Ndandingaboni nto iphosakeleyo kuba ndandiza kuncokola nabantu endibaziyo kuphela.
Ekuqaleni kwakungekho ngxaki. Ndandingena kwi-Internet kanye ngeveki ukuze ndibuke iifoto zabahlobo bam, ndibhala oko ndandikucinga ngazo ndize ndifunde izinto ababezibhalile ngezam iifoto. Kodwa ekuhambeni kwexesha ndandingasakwazi ukwenza enye into. Ndandihlala ndikwi-Internet ngalo lonke ixesha. Ngenxa yoko, abahlobo babahlobo bam bacela ukuba sibe ngabahlobo. Into edla ngokwenzeka kukuba umhlobo wakho ukwazisa kubahlobo bakhe esithi bangabantu abalungileyo. Emva koko uzibhaqa sele unabahlobo abangama-50 kwi-Internet.
Kungekudala ndafumanisa ukuba ndandisoloko ndicinga nge-Internet. Ndandisithi naxa ndiyisebenzisa ndicinge ukuba ndiza kuphinda ndibuyele nini kuyo ukuze ndithumele ezinye iifoto. Ndandichitha iiyure ezininzi ndifunda imiyalezo ndithumela neevidiyo.
Ndayenza le nto kangangonyaka onesiqingatha kodwa ekugqibeleni ndaqonda ukuba ndandisele ndilikhoboka. Kodwa ngoku ndiyakwazi ukuyilawula indlela endiyisebenzisa ngayo i-Internet yaye ndakha ubuhlobo nabantu endidibana nabo nabaphila njengam. Abanye babahlobo bam abayiqondi kakuhle indlela endizenza ngayo izinto kodwa mna ndiye ndafund’ isifundo.”—UEllen, oneminyaka eli-18 ubudala.
[Ibhokisi ekwiphepha 26]
BUZA ABAZALI BAKHO
Ngamanye amaxesha uya kumangaliswa zizinto eziya kuthethwa ngabazali bakho xa uncokola nabo ngokuzonwabisa. Intombazana enguCheryl ithi: “Ngenye imini utata wakha wakrokrela ukuba enye yeeCD zam inomculo ongafanelekanga. Ndamcela ukuba akhe ahlale nam size siyiphulaphule kunye. Wavuma. Emva koko wathi akaboni nto ityhulu kuyo.”
Bhala apha ngezantsi umbuzo ongathanda ukuwubuza abazali bakho ngezinto ze-elektroniki.
[Ibhokisi ekwiphepha 27]
UMYALEZO OYA KUBAZALI
Ngaba umntwana wenu uchitha ixesha elininzi kwikhompyutha, ethumela okanye efunda imiyalezo yefowuni okanye ngaba uchitha ixesha elininzi ephulaphule umculo kunokuba ancokole nani? Ukuba kunjalo, yintoni eninokuyenza?
Enye into eninokuyenza kukuyithatha loo nto ahlala eyisebenzisa. Kodwa musani ukucinga ukuba zonke izinto ze-elektroniki azifanelekanga. Kaloku nani kusenokwenzeka ukuba kukho isixhobo se-elektroniki enisisebenzisayo ababengenaso abazali benu. Ngoko, kunokuba nisithathe esi sixhobo ninokusebenzisa eli thuba ukuze nifundise unyana okanye intombi yenu indlela efanelekileyo yokusebenzisa izinto ze-elektroniki, ngaphandle kokuba kunyanzelekile ukuba nisithathe. Ninokukwenza njani oku?
Thethani nomntwana wenu ngale nto. Qalani ngokumchazela ukuba iyanixhalabisa indlela asebenzisa ngayo izinto ze-elektroniki. Okwesibini mphulaphuleni njengokuba echaza izimvo zakhe. (IMizekeliso 18:13) Okwesithathu, zamani ukufumana isicombululo. Ningoyiki ukumbekela imithetho ecacileyo kodwa ke nibe nengqiqo. (Filipi 4:5) UEllen ebekukhe kwathethwa ngaye ngaphambili uthi: “Xa ndandinengxaki yokuthumela imiyalezo, abazali bam abazange bayithathe iselfowuni yam kodwa bandibekela imiqathango. Indlela abayicombulula ngayo le ngxaki yandinceda ndakwazi ukuyisebenzisa kakuhle ifowuni naxa sele bengekho.”
Kuthekani ukuba unyana okanye intombi yenu iyazithethelela? Musani ukugqiba kwelokuba uza kulibetha ngoyaba icebiso lenu. Kunoko, yibani nomonde nize ninike umntwana wenu ixesha elaneleyo lokucinga. Kusenokwenzeka ukuba uyavumelana nani ibe uza kuyitshintsha indlela azisebenzisa ngayo izinto ze-elektroniki. Ulutsha oluninzi luvakalelwa ngendlela efanayo noHailey othi: “Ekuqaleni ndacaphuka xa abazali bam bathi ndandilikhoboka lekhompyutha. Kodwa ekuhambeni kwexesha ndayicingisisa le nto ndaza ndabona ukuba babenyanisile.”
[Umfanekiso okwiphepha 27]
Ngaba uyazilawula izinto ze-elektroniki okanye ziyakulawula?