Yintoni Onokuyenza Xa Unemigraine?

UJoyce oliqhakraqhakra nosebenza eofisini uqolozele kwiphepha aliphetheyo. Ngequbuliso kubonakala ngathi ezinye izinto ezibhalwe kulo zicimile. Emva koko, uqalisa ukubona amarhoqololo. Kwimizuzu nje embalwa, uJoyce akasaboni kakuhle. Eqonda oko kwenzekayo ukhawuleza asele ipilisi.

UJOYCE unemigrane, isifo sokuqaqanjelwa yintloko esahluke ngeendlela ezininzi ekubeni nentloko nje ebuhlungu. Ngokomzekelo, ngokwahlukileyo kwintloko eqhelekileyo, imigraine yenzeka rhoqo. Kwakhona le ntloko iqaqamba kangangokuba umntu onayo akakwazi ukwenza izinto aqhele ukuzenza.

Umbona njani umntu onesi sifo? Le ntloko iqaqamba kakhulu kwaye ihlasela icala elinye. Kwakhona umntu emphetheyo usenokuba nesicaphucaphu aze angakwazi ukumelana nokukhanya okuqaqambileyo. Unokuphathwa yile ntloko kangangeeyure ukusa kwiintsuku eziliqela.

Nangona inkoliso yabantu ikhe ibe nentloko ebuhlungu, ngumntu omnye kwabali-10 oba nemigraine. Le ntloko ixhaphake kakhulu kumabhinqa kunakumadoda. Kwabanye le ntloko iba buhlungu kakhulu kunakwabanye kodwa abantu abaninzi abanale ntloko abayi emsebenzini kangangeentsuku eziliqela nyaka ngamnye. Imigraine ibangela ukuba ulahlekelwe ngumvuzo emsebenzini nto leyo esenokuchaphazela intsapho nendlela ophila ngayo. IWorld Health Organization ithi le ntloko iphakathi kwezinto eziphambili kwezingama-20 ezibangela isiphene.

Ngaphambi kokuba baphathwe yile ntloko, abanye abantu baba nezandla ezibandayo, batyhafe, balambe okanye kutshintshatshintshe indlela abavakalelwa ngayo. Emva koko, ngaphambi nje kokuba intloko iqalise ukuqaqamba, basenokuba nesiyezi, iindlebe zithi nzwii, babe nenkantsi, bathi xa bejonge into enye kube ngathi zimbini, bangakwazi ukuthetha kakuhle zize izihlunu zabo zibe buthathaka.

Awaziwa ncam oyena nobangela wemigraine kodwa kucingelwa ukuba ibangelwa kukungasebenzi kakuhle kwenkqubo yemithambo luvo, nto leyo ephazamisa ukusebenza kwemithambo esentloko. Intloko eqaqambayo ibangelwa kukuhamba kwegazi kwimithambo ephazamisekileyo. Incwadi ethi Emergency Medicine ithi: “Abantu abaphathwa yile ntloko bafumene imithambo-luvo ebuthathaka kubazali babo nephazanyiswa zizinto ezininzi, njengokungalali ngokwaneleyo, ivumba elibi, ukuhamba umgama omde, ukungatyi, uxinezeleko nezinto ezenzeka kumadlala.” Kwakhona abantu abanesi sifo badla ngokuba neengxaki zesisu, ixhala noxinezeleko.

Unokusifumana Njani Isiqabu Kwimigraine?

Awunako ukuyitshintsha imithambo-luvo yakho. Kodwa unako ukuphepha izinto ezikwenza uphathwe yile ntloko. Abanye bancedwe kukubhala phantsi rhoqo besitya ukutya ukuze baphawule ukutya nezinye izinto ezibenza babe nemigraine.

Imeko yomntu ngamnye iyahluka. ULorraine wafumanisa ukuba yayimphatha xa esexesheni. Uthi: “Xa ndisexesheni ndandidla ngokuhlaselwa yile ntloko xa ndiye ndasebenza nzima okanye xa kushushu, kubanda, kungxolwa kakhulu okanye xa nditye ukutya okuqhwethayo. Ngoko ndiye ndizame ukungasebenzi kakhulu okanye ndingahlali kwiindawo ezinengxolo.” UJoyce oye wanyamezela le ntloko ngaphezu kweminyaka engama-60, uthi: “Ndiye ndafumanisa ukuba iiorenji, amapayina newayini ebomvu zindibangela ndiphathwe yintloko, ngenxa yoko andizityi.”

Ukubona ezona zinto zibangela le ntloko akukho lula kuba ziliqela izinto eziyibangelayo. Ngokomzekelo, ngenye imini usenokutya itshokolethi ingakugulisi, kodwa ngenye imini ikwenze ube nentloko mhlawumbi ngenxa yezinye izinto.

Naxa usenokungakwazi ukubona okanye ukuphepha izinto ezibangela intloko, zikho ezinye iindlela zokunciphisa amathuba okuba nayo. Iingcali zicebisa ukuba uzame ukulala ngexesha elinye kangangeentsuku ezisixhenxe evekini. Naxa uye walala ebusuku ngempelaveki, zicebisa ukuba uvuke ngexesha oqhele ukuvuka ngalo, wenze okuthile kangangexeshana uphinde uye kulala. Necaffeine eninzi inokubangela imigraine ngenxa yoko zama ukunciphisa, uphunge nje ikomityi ezimbini zekofu okanye usele iziselo ezinecaffeine zibe mbini ngosuku. Ekubeni nokungatyi kubangela intloko, musa ukungazityi ezinye izidlo. Akulula ukuphepha uxinezeleko oludla ngokuba ngunobangela wale ntloko, kodwa usenokufumana iindlela zokuphumla, mhlawumbi ngokutshintsha indlela ozenza ngayo izinto, ukufunda iBhayibhile okanye ngokuphulaphula umculo opholileyo.

Yintoni Enyanga Imigraine?

Zininzi iindlela zokunyanga imigraine.a Ngokomzekelo, enye yazo kukulala. Iipilisi zeentlungu zisenokukunceda ukuze ulale.

Ngowe-1993, kwakhutshwa iipilisi ezintsha zokunyanga imigraine ezibizwa ngokuba ziitriptan. IThe Medical Journal of Australia yathi, ezi pilisi zibubungqina bokwenziwa “kwenkqubela kunyango” ibe yongezelela isithi: “Ukufunyanwa kweetriptan . . . kuza kunyanga imigraine nentloko kanye njengokuba ipenicillin inceda kwiintsholongwane!”

Imigraine ayibulali. Ngoko ngokwahlukileyo kumayeza anyanga ukosulelwa yintsholongwane, amayeza emigraine awasindisi bomi. Sekunjalo, iitriptan ziye zabanceda abanye abantu ebebekhathazwa yile ntloko kangangeminyaka. Kodwa abantu abanemigraine kusafuneka batshintshe indlela abaphila ngayo njengoko kukhankanywe ngaphambilana kodwa abanye abantu abanayo bathi iitriptan ziipilisi ezimangalisayo.

Onke amayeza ayanceda kodwa kwangaxeshanye zikho neengozi zokuwasebenzisa. Yintoni ingxaki yokusebenzisa iitriptan? Okokuqala, itriptan nganye ibiza imali elinganayo naleyo ubuya kuyihlawula xa uthenga isidlo kwindawo yokutyela ekumgangatho ophezulu, ngenxa yoko zinikwa abantu abaqaqanjelwa kakhulu kuphela. Kwakhona, azinyangi wonke umntu kuba abanye abantu ngenxa yempilo yabo kucebiseka ukuba bangazisebenzisi. Nangona lingaziwa iyeza lokunyanga izinto ezenza abanye abantu bahlaselwe lula yimigraine, iEmergency Medicine ithi: “Ngenxa yokuba kukho izinto ezintsha neziphuculiweyo ezinokuyinyanga, asikho isizathu sokuba abantu baqhubeke bekhathazwa yimigraine.”

[Umbhalo osemazantsi]

[Umfanekiso okwiphepha 23]

Abanye bancedwe kukubhala phantsi rhoqo besitya ukutya ukuze baphawule ukutya nezinye izinto ezibenza babe ne-“migraine”

[Umfanekiso okwiphepha 23]

Ukuphulaphula umculo opholileyo kusenokunceda ekunciphiseni uxinezeleko oludla ngokuba ngunobangela we-“migraine”

[Umfanekiso okwiphepha 23]

I-“migraine” sisifo osifumana ngofuzo nesinokubangela isiphene kodwa oogqirha bayakwazi ukusinyanga