Ngaba Unqulo Luya Kuze Luzise Uxolo?

“MASILIPHUCULE ihlabathi. Masilusiphule neengcambu unqulo.” Oku kwathethwa sisithandi-sobulumko esingumDatshi uFloris van den Berg kwintetho yakhe eyayisithi “Indlela Yokuphelisa Unqulo Nesizathu Soko.” Ehlabathini jikelele iingcali ezahlukahlukeneyo zikhuthaza ukupheliswa konqulo.

USteven Weinberg owawongwa ngembasa kaNobel wathi: “Ihlabathi kufuneka liyeke ukuzingcungcuthekisa ngeenkolelo zonqulo.” Kwiminyaka yakutshanje liye landa inani labantu abathi iingxaki zalo mhlaba zingancipha ukuba kungapheliswa unqulo. Kukho iincwadi ezininzi ezigxeka unqulo yaye ziyathandwa ngabantu.

Izazinzulu eziphambili ziye zahlanganisana ukuze zithethe ngesizathu sokuba unqulo lufanele lukhawuleze lupheliswe. Abantu abaninzi abangakholelwayo kubukho bukaThixo abayifihli indlela abaluthiy’ egazini ngayo unqulo. Ngaba la madoda akrelekrele nahlonelwayo anyanisile?

Ngaba Lukho Unqulo Lokwenyaniso?

Ukuba zonke iicawa bezixoka abe noThixo engekho, bekuya kuba yinto efanelekileyo ukuphelisa unqulo. Kodwa kuthekani ukuba ukho uThixo? Kuthekani ukuba kukho iqela labantu elimmela kakuhle uThixo, unqulo lokwenyaniso?

Xa uyifunda kakuhle imbali yonqulo uya kuphawula ukuba ikho inkonzo eyahlukileyo kuzo zonke ezinye. Namhlanje bambalwa abantu abakule nkonzo. Yasekwa nguYesu Kristu nabapostile bakhe. Kodwa unqulo lwayo ayilulo olu beluqhutywa yiNgqobhoko kangangeenkulungwane zeminyaka.

Yintoni umahluko phakathi kweNgqobhoko nonqulo lokwenene olwasekwa nguYesu Kristu? Zahluke ngeendlela ezininzi. Makhe sithethe ngenye yazo.

“Abayonxalenye Yehlabathi”

AmaKristu okuqala akazange angene kwiipolitiki. Ayexelisa uYesu kuba naye akazange angene kuzo. IBhayibhile ithi kangangezihlandlo ezibini uYesu wala ukuba ngumlawuli wezopolitiko. (Mateyu 4:8-10; Yohane 6:15) UYesu wade wakhalimela nabafundi bakhe ababezama ukumkhusela ngezigalo xa wayebanjwa.—Mateyu 26:51, 52; Luka 22:49-51; Yohane 18:10, 11.

Xa umlawuli waseRoma owayephethe kwaYuda wabuza uYesu ukuba wayenomdla kwipolitiki, uYesu walikhupha latsola wathi: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.” (Yohane 18:36) Licacile elokuba uYesu akazange abandakanyeke kwezopolitiko nakwimikhosi yexesha lakhe.

Abafundi bakaYesu bazeka mzekweni. Uhlolisiso olungendima edlalwe lunqulo kwiimfazwe, olwenziwa liqela labaphandi ekuthethwe ngabo kolu ngcelele lwamanqaku luthi: “AmaKristu okuqala ayengenalugonyamelo. . . . Inkoliso yamaKristu ayesala ukungena emkhosini aze alwe.” Iimfundiso zikaYesu nabapostile bakhe zazibethelela ukuthandwa kommelwane kuquka nabantu esingabaziyo nabo bezinye iintlanga. (IZenzo 10:34, 35; Yakobi 3:17) Eneneni, olu nqulo lwalukhuthaza uxolo.

Ekugqibeleni ubuKristu baxubana nentanda-bulumko, izithethe nokuthanda isizwe, zinto ezo ezibangela iyantlukwano. Uhlolisiso lwendima edlalwe lunqulo kwimfazwe olukhe lakhankanywa luthi: “Ukuguquka kukaConstantine [uMlawuli waseRoma] kwenza amaKristu athanda ukulwa, ayeka ukulawulwa ziimfundiso zikaKristu ezazikhuthaza uvelwano aza alawulwa yiminqweno yalo Mlawuli yokunyolukela igunya lobupolitika nokoyisa imimandla engakumbi. AmaKristu kuquka noMlawuli kwanyanzeleka ukuba azame ukuyithethelela ngonqulo imfazwe.” Aqala ngolo hlobo amaKristu obuxoki.

Likho Iqela “Elahlukileyo”

Ngaba awekho amaKristu okwenyaniso? Akunjalo. Likho iqela ekufuneka sikhe silihlolisise kakuhle namhlanje. Ayikho enye inkonzo exelisa amaKristu okuqala njengamaNgqina kaYehova. Akayonxalenye yeenkonzo zeNgqobhoko. IThe Encyclopedia of Religion ithi “ahlukile” ngokuba zonke iinkolelo zawo zisekelwe “eBhayibhileni, enegunya ngaphezu kwezithethe.”

NjengamaKristu okuqala, amaNgqina kaYehova akathath’ icala kwezopolitiko. Iphepha elapapashwa yiNational Academy of Sciences yaseUkraine lathi amaNgqina kaYehova afuna ukuphelisa iyantlukwano ebangelwa “bubuhlanga, ukuthand’ isizwe, unqulo, ukungevani kwabantu nemeko yezoqoqosho.” Eli phepha lithi, amaNgqina kaYehova “akalwi norhulumente” yaye “ayawuthobela umthetho welizwe ahlala kulo.”

Unjingalwazi weYunivesithi yaseWarsaw ePoland uWojciech Modzelewski, kwincwadi yakhe ethi Pacifism and Vicinity uthi: “AmaNgqina kaYehova lelona qela likhulu lingayifuniyo imfazwe emhlabeni.” Ngenxa yokuba exelisa amaKristu enkulungwane yokuqala, sinokuthi amaNgqina kaYehova aye akwazi ukunqula ngendlela uKristu nabapostile bakhe abayisekayo. Olu hlobo lobuKristu luyakwazi ukudala uxolo.—Funda ibhokisi ekwiphepha elilandelayo.

Ikamva Eliqaqambileyo

Liyinyaniso elokuba abanquli abaninzi abanyanisekileyo kuquka nabanye abefundisi, baluthiyile uhanahaniso olwenziwa kwiicawa zabo. Bafanele bothulelwe umnqwazi abantu abaninzi abahamba iicawa abasebenza nzima bekhuthaza uxolo nomanyano emhlabeni.

Sekunjalo, enoba banganyaniseka kangakanani, abantu abanawo amandla okuphelisa iingxaki zomhlaba. Umprofeti wamandulo uYeremiya wabhala wathi: “Ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.”—Yeremiya 10:23.

Kodwa likho ikamva eliqaqambileyo. ILizwi likaThixo lifundisa ukuba kuya kubakho abantu abaseluxolweni emhlabeni. Aba bantu baza kubakho emhlabeni wonke. Zonke iintlanga ziya kuhlala kunye ngomanyano yaye abantu abayi kwahlukaniswa yimida, intiyo yobuhlanga okanye ziimfundiso ezahlukeneyo zeecawa zabo. Eyona nto iza kubamanyanisa kukunqula kwabo uYehova uThixo.

Kwakhona iBhayibhile iprofeta ngokupheliswa konqulo olungamhloneliyo uThixo. UYesu wathi: “Bonke ubukumkani obahlulelene bodwa buyaphanza, yaye sonke isixeko okanye indlu eyahlulelene yodwa ayiyi kuma.” (Mateyu 12:25) Ekuhambeni kwexesha, uThixo uza kuqinisekisa ukuba la mazwi ayazaliseka ngokuphathelele lonke unqulo lobuxoki.

Kwakude kudala, iBhayibhile yaprofeta yathi uThixo uya “kugweba phakathi kweentlanga aze alungelelanise imicimbi.” Esi siprofeto siphinda sithi abantu baya ‘kukhanda amakrele abo abe ngamakhuba nemikhonto yabo ibe zizikere zokuthena imithi. Uhlanga aluyi kuphakamisela uhlanga ikrele, bangaphindi bafunde mfazwe kwakhona.’ (Isaya 2:4) Esi siprofeto siyazaliseka namhlanje. AmaNgqina kaYehova alunqulo lokwenyaniso sele elukhuthaza uxolo.

[Amagama acatshulweyo akwiphepha 8]

AmaNgqina kaYehova amanyaniswe luthando

[Ibhokisi ekwiphepha 9]

AmaNgqina KaYehova Ahluke Ngantoni Kwezinye Iinkonzo?

Abantu abaninzi bayamangaliswa xa bebona indlela ahluke ngayo amaNgqina kaYehova kuzo zonke ezinye iinkonzo ezithi zilandela uKristu. Nazi ezinye zezinto ahluke ngazo amaNgqina kaYehova.

INDLELA AQHUBA NGAYO

● Awanabefundisi.

● Abadala nabathunywa bevangeli bawo abahlawulwa.

● Akuhlawulwa sishumi yaye akukho nkongozelo kwizindlu zawo zenkonzo ezibizwa ngokuba ziiHolo zoBukumkani.

● Wonke umsebenzi wawo uxhaswa ngeminikelo eyenziwa emfihlekweni.

● Awathathi cala kwiipolitiki.

● Ashumayela ngoxolo yaye awancedisi emfazweni.

● Emhlabeni wonke, akholelwa kwiimfundiso ezifanayo nezisekelwe eBhayibhileni.

● Ayalingana yaye awahlukaniswanga bubuzwe, uhlanga okanye imeko yezimali.

● Awayonxalenye yeecawa ezinkulu njengamaKatolika, amaOthodoki namaProtestanti.

IIMFUNDISO ZAWO

● Akholelwa ukuba kukho uThixo omnye, ogama linguYehova.

● Awakholelwa ukuba uYesu Kristu nguThixo uSomandla yaye awakholelwa ukuba uThixo uneziqu ezithathu.

● Alandela iimfundiso zikaYesu yaye ayamhlonela njengoNyana kaThixo.

● Awawusebenzisi umnqamlezo yaye awasebenzisi zithixo kunqulo lwawo.

● Awakholelwa ukuba kukho isihogo somlilo ekutshiswa kuso abantu abangalunganga xa befile.

● Akholelwa ukuba uThixo uya kusikelela abantu abamthobelayo ngobomi obufezekileyo kwiparadesi eza kuba semhlabeni.

AmaNgqina kaYehova akholelwa ukuba akwazile ukubuyisela ubuKristu benkulungwane yokuqala, obo basekwa nguYesu nabapostile.

[Umfanekiso okwiphepha 8]

UmSerb, umBosnia nomCroatia