Ubunjineli Bemvelo Bukanomeva Owenza Amaphepha

● Lo nomeva kuthiwa yincutshe yenjineli. Kutheni ekufanela ukuchazwa njalo?

Khawucinge ngoku: Lo nomeva wakha aze alungise indlwana yakhe ngephepha alenza ngokwakhe.a Esi sinambuzane siqokelela imisonto yezityalo nemithi—ezibondeni zegadi, kwiipali zefowuni nakwezinye izinto zokwakha. Emva koko siyayihlafuna le misonto size siyidibanise namathe aso ancangathi aneprotini eninzi. Xa womile, umthamo waso uba liphetshana elikhaphukhaphu kodwa elomeleleyo. Enye into la mathe anceda eli phepha likwazi ukubamba ubushushu nto leyo egcina indlwana yaso ifudumele xa kubanda.

Xa esenza le ndlwana, unomeva ukhupha imithamo eliqela. Ekugqibeleni kuphuma indlwana yephepha engangeni manzi, ekhuselekileyo nenendawo yokuhlala eyaneleyo. Oonomeva abahlala kwiindawo ezifumileyo baxuba amathe amaninzi xa besakha izindlu zabo kuba amathe athintela amanzi angangeni. Baphinda bancedwe nakukwakha kwiindawo ezikhuselekileyo. Iindlwana zabo ezakhiwa zijonge ezantsi bazixhasa ngezityalo okanye ezinye izinto. Ukongezelela koko, ngokwahlukileyo ebantwini abangcolisa umoya, amanzi nomhlaba xa besenza amaphepha, oonomeva bona abayingcolisi indalo!

Siyaqondakala isizathu sokuba abakhi nabaphandi befunda izinto ezenziwa ngunomeva kuba bezama ukwenza izinto zokwakha ezilula, ezomeleleyo, ezilungele zonke iimeko neziza kukwazi ukubola zibe ngumhlaba.

Ucinga ntoni? Ngaba esi sinambuzane sinobuchopho obulingana neentlalutyana nje ezimbini zesanti sasuka sakwazi ngokwaso ukwenza iphepha nendlwane entsokothe ngolu hlobo? Okanye ngaba ubuchule baso obuntsonkothileyo bungqina ukuba sadalwa?

[Umbhalo osemazantsi]