UThixo
Ingcaciso: SiSiqu esiPhakamileyo, esigama laso lisahlulayo linguYehova. Ulwimi lwesiHebhere lusebenzisa amagama amela elithi “uThixo” adlulisela ingcamango yamandla, kwaneyobungangamsha, indili nobuqhawe. Ngokwahlukileyo kuThixo oyinyaniso, kukho oothixo ababuxoki. Bambi kwaba bazimise ngokwabo njengoothixo; abanye baye benziwa izinto zokunqulwa ngabo bangabakhonzi babo.
Ngaba zikho izizathu eziphilileyo zokukholelwa kuThixo?
INdu. 19:1: “Izulu libalisa uzuko lukaThixo, saye isibhakabhaka sixela umsebenzi wezandla zakhe.”
INdu. 104:24: “Hayi, ukuba zininzi izenzo zakho, Yehova! Zonke ziphela uzenze ngobulumko; uzele umhlaba zizidalwa zakho.”
Roma 1:20: “Kwasekudalweni kwehlabathi, iindawo zakhe ezibe zingenakubonwa zibonwa kakuhle, ziqondeke, ngezinto ezenziweyo.”
Iphephancwadi iNew Scientist lathi: “Imbono yabantu abangezongcaphephe isazingisa—le yokuba izazinzulu ‘ziluphikisa’ unqulo. Ngokuqhelekileyo yimbono yokulindela ukuba izazinzulu azingomakholwa; le yokuba umkhumbi wokungcwaba uThixo wagqityezelwa nguDarwin; neyokuba ukususela ngoko ulandelelwano lweenkqubo ezintsha zenzululwazi nezobugcisa zicime naluphi na uvuko olunokwenzeka. Yimbono ephosise ngokugabadeleyo.”—Meyi 26, 1977, iphe. 478.
Ilungu loMbutho WamaFrentshi Wenzululwazi lathi: “Ulungelelwano lwendalo aluzange luveliswe yingqondo yomntu okanye lusekwe ngamandla athile okuqonda. . . . Ubukho bolungelelwano busenza ukuba kwasekuqaleni sicinge ngobukho bomntu olungelelanisa ngendlela ekrelekrele. Ubukrelekrele obunjalo abunakuba bobomntu ongenguye uThixo.”—Dieu existe? Oui (Paris, 1979), uChristian Chabanis, ecaphula uPierre-Paul Grassé, iphe. 94.
Izazinzulu ziye zafanisa iziqalelo zemichiza ezingaphezu kwe-100. Ukwakhiwa kwazo ngokweathom kubonisa ukwalamana kweziqalelo okuntsonkothileyo nokungokwezibalo. Isicangca sexesha salatha ekuyilweni okucacileyo. Ukuyila okumangalisa ngolo hlobo akunakwenzeka ukuba kube kuzenzekele, kuyimveliso yamabona-ndenzile.
Umzekeliso: Xa sibona ikhamera, unomathotholo, okanye ikhompyutha, silivuma kwaoko elokuba ezi zinto zinokuba zaveliswa ngumyili okrelekrele. Ngoko, ngaba bekuya kuba sengqiqweni ukuthi izinto ezintsonkothe gqitha kunezo—iliso, indlebe nobuchopho bomntu—aziveliswanga nguMyili okrelekrele?
Bona kwanephepha 99-101, phantsi komxholo othi “InDalo.”
Ngaba ubukho bobungendawo nobobunzima bungqina ukuba akukho Thixo?
Qwalasela le mizekelo: Ngaba isibakala sokuba izitshetshe ziye zasetyenziswa ekubulaleni singqina ukuba akukho bani waziyilayo? Ngaba ukusetyenziswa kweenqwelo-moya eziziijet ukuphosa iibhombu ngexesha lemfazwe kungqina ukuba azizange zibe namyili wazo? Okanye ngaba kunoko yindlela ezisetyenziswa ngayo ezi zinto ebangela intlungu eluntwini?
Aliyonyaniso na elokuba uninzi lwezifo lubangelwe ziindlela ezimbi umntu aphila ngazo nokuzonela kwakhe nabanye imekobume? Ngaba iimfazwe eziliwa ngabantu azisosizekabani siphambili sobunzima obuviwa ngabantu? Aliyonyaniso na kwanelokuba, ngoxa izigidi zithwaxwa liphango, ukutya kudlal’ abantwana kwamanye amazwe, kangangokuba ibe eyona ngxaki kukubawa kwabantu? Zonke ezi zinto azinikeli bungqina bokungabikho kukaThixo, koko zinikela ubungqina bokuba abantu ngokulusizi babusebenzisa kakubi ubuchule babo ababunikwe nguThixo nomhlaba ngokwawo.
Ngaba uThixo ukukhathalele ngenene okwenzeka kuthi bantu?
Ewe, ukukhathalele ngenene! Qwalasela obu bungqina: IBhayibhile isixelela ukuba uThixo wamnika umntu isiqalo esifezekileyo. (Gen. 1:27, 31; Dut. 32:4) Phofu ke, ukuqhubeka komntu enandipha inkoliseko kaThixo kwakuxhomekeke ekuthobeleni uMenzi wakhe. (Gen. 2:16, 17) Ukuba umntu wayenentobelo, wayeya kuzingisa enandipha ubomi obufezekileyo bobuntu—kungabikho kugula, ntlungu, nakufa. UMdali ubeya kunika umntu ukhokelo alufunayo yaye ubeya kusebenzisa amandla Akhe ekukhuseleni uluntu nxamnye nalo naliphi na ishwangusha. Kodwa umntu walucekisa ukhokelo lukaThixo; wanyula ikhondo lokuzilawula. Ekuzameni ukwenza into angazange ayilelwe yona uye wazizisela ishwangusha. (Yer. 10:23; INtshu. 8:9; Roma 5:12) Kanti, ekuqhubekeni kweenkulungwane uThixo uthe ngomonde wafuna abo bathe, ngenxa yokuthanda yena neendlela zakhe, bakuvuma ukumkhonza. Phambi kwabo ubavulele ithuba lokunandipha zonke iintsikelelo abaye bazibandezwa kukungafezeki nokulawula kakubi komntu. (ISityhi. 21:3-5) Ilungiselelo lokuhlangula uluntu esonweni nasekufeni elenziwe nguThixo ngoNyana wakhe bubungqina obumangalisayo bothando lukaThixo olukhulu ngoluntu. (Yoh. 3:16) UThixo ukwamise ixesha elicwangcisiweyo laxa eya kutshabalalisa abo bonakalisa umhlaba aze abangele abathandi bobulungisa banandiphe ubomi ngokuvisisana nenjongo yakhe yantlandlolo.—ISityhi. 11:18; INdu. 37:10, 11; bona kwanomxholo omkhulu othi “UkuBandezeleka” nothi “UbuNgendawo.”
Ngaba uThixo ungumntu wokwenene?
Heb. 9:24: “UKristu . . . ungene kuwo amazulu ngokwawo, ukuba abonakale ngoku ebusweni bukaThixo ngenxa yethu.”
Yoh. 4:24: “UThixo unguMoya.”
Yoh. 7:28: “Uyinyaniso owandithumayo,” watsho uYesu.
1 Kor. 15:44: “Kukho umzimba ongowemvelo, kukho nomzimba ongowomoya.”
Ngaba uThixo uneemvakalelo eziluhlobo esilunxulumanisa nolwabantu abaphilayo?
Yoh. 16:27: “UBawo ngokwakhe uyanithanda; ngokuba nina nindithandile, nakholwa ukuba mna ndaphuma kuThixo.”
Isa. 63:9: “Ekubandezelekeni kwabo konke wabandezeleka, . . . ekubathandeni kwakhe nasekubacongeni kwakhe wayebakhulula ngokumisela yena.”
1 Tim. 1:11, NW: “UThixo owonwabileyo.”
Ngaba uThixo wayenesiqalo?
INdu. 90:2: “Kungekazalwa zintaba, ungekavelisi mhlaba, nazwe limiweyo, kususela kwaphakade kude kuse ephakadeni, wena unguThixo.”
Isengqiqweni na loo nto? Iingqondo zethu azinakuyiqonda ngokupheleleyo. Kodwa oko akusosizathu siphilileyo sakuyicekisa. Qwalasela le mizekelo: (1) Ixesha. Akukho namnye unokwalatha kwisihlandlo esithile njengesiqalo sexesha. Yaye iyinyaniso nento yokuba, nakubeni siphelelwa bubomi, ixesha alipheli. Asiyigatyi into elixesha kuba kukho iinkalo zalo esingaziqondi ngokupheleleyo. Kunoko, silungelelanisa ubomi bethu ngalo. (2) Isibhakabhaka. Ngokufanayo izazi ngeenkwenkwezi azifumani siqalo okanye siphelo sesibhakabhaka. Okukhona bepopola nzulu kummandla wendalo, kokukhona unwenwa. Azikugatyi okuboniswa bubungqina; ezininzi zibhekisela kwisibhakabhaka ngokuthi asinasiphelo. Kusebenza kwaumgaqo ofanayo kubukho bukaThixo.
Nantsi eminye imizekelo: (1) Izazi ngeenkwenkwezi zisixelela ukuba ubushushu belanga embindini walo bungamaqondo kaCelsius azizi-15 000 000. Siyayigatya na loo ngcamango kuba singenakubuqonda ngokupheleleyo ubushushu obukhulu ngolo hlobo? (2) Zisixelela ukuba ubukhulu boMnyele wethu buphangalele kangangokuba umtha wokukhanya ohamba ngaphezu kwama-300 000 eekhilomitha ngomzuzwana ubuya kuthabatha i-100 000 leminyaka ukunqumla kuwo. Ngaba iingqondo zethu ziwuqonda ngokwenene umgama ongako? Kanti siyawamkela kuba uxhaswa bubungqina obungokwenzululwazi.
Kukuphi okunengqiqo ngakumbi—ngaba lelokuba ummandla wendalo uveliswe nguMdali ophilileyo nokrelekrele? okanye ngaba lelokuba wabakho nje ngamabona-ndenzile uphuma kumthombo ongaphiliyo ongenalwalathiso lukrelekrele? Bambi abantu bamkela le mbono yesibini kuba ukukholelwa kwenye into bekuya kuthetha ukuba bayabuvuma ubukho boMdali ompawu zakhe bangenakuziqonda ngokupheleleyo. Kodwa lidumile elokuba izazinzulu azikuqondi ngokupheleleyo ukusebenza kwemfuza ekwiiseli eziphilileyo nemisela indlela eziya kukhula ngayo. Zingakuqondi ngokupheleleyo nokusebenza kobuchopho bomntu. Kanti, ngubani obeya kuyikhanyela into yokuba ezi zinto ngokwenene zikho? Ngaba sifanele ngenene silindele ukuqonda yonke into ngoMntu omkhulu kangangokuba ebengavelisa ummandla wendalo, nako konke ukuyilwa kwawo okuntsonkothileyo nobukhulu obugqithiseleyo?
Kubalulekile na ukusebenzisa igama likaThixo?
Roma 10:13, AP: “Bonke abasukuba bebiza egameni LIKAYEHOVA baya kusindiswa.”
Hez. 39:6: “Bazi ukuba ndinguYehova.”
UYesu wathi kuYise: “Ndabazisa [abalandeli bakhe bokwenyaniso] igama lakho, ndandiya kubazisa.”—Yoh. 17:26.
Bona kwanephepha 393, phantsi kothi “UYehova.”
Kubalulekile na ukuba ungubani uThixo esimnqulayo, lo gama sinalo unqulo?
1 Kor. 10:20: “Amadini eziwenzayo iintlanga, ziwenzela iidemon, aziwenzeli uThixo.”
2 Kor. 4:4: “Uthixo weli phakade wazimfamekisa ngaphakathi kwabo iingqiqo zabangakholwayo, ukuze singabengezeli kubo isikhanyiso seendaba ezilungileyo zobuqaqawuli bukaKristu, ongumfanekiselo kaThixo.” (Apha uMtyholi kubhekiselwa kuye ‘njengothixo.’ Bona eyoku-1 kaYohane 5:19; ISityhilelo 12:9.)
Mat. 7:22, 23: “Baninzi abaya kuthi kum [uYesu Kristu] ngaloo mini, Nkosi, Nkosi, sasingathe na egameni lakho saprofeta, sathi egameni lakho sakhupha iidemon, sathi egameni lakho senza imisebenzi yamandla emininzi? Ndandule ndibaxelele, ndithi, Andizanga ndinazi; mkani kum, nina nenza okuchasene nomthetho.” (Kwanokuzibabaza ungumKristu akusosiqinisekiso sokuba simkhonza ngokwamkelekileyo uThixo oyinyaniso.)
Bona kwanephepha 249, 250, phantsi komxholo othi “UNqulo.”
Ukuba uYehova ‘ungokuphela koThixo oyinyaniso,’ uYesu uluhlobo luni “loThixo”?
UYesu wabhekisa kuYise esithi “ukuphela koThixo oyinyaniso.” (Yoh. 17:3) UYehova wathi: “Akukho Thixo ingendim.” (Isa. 44:6) Umpostile uPawulos wabhala esithi, kumaKristu okwenyaniso, “Mnye uThixo, uYise.” (1 Kor. 8:5, 6) Ke uYehova akanakuthelekiswa nabani; akukho bani abelana naye ngesigxina sakhe. UYehova umi engowahlukileyo kuzo zonke izinto ezinjalo ezinqulwayo ezinjengezithixo, abantu abenziwa oothixo noSathana. Bonke aba ngoothixo ababuxoki.
Ezibhalweni uYesu kuthethwa ngaye ‘njengothixo,’ kwanangokuthi “nguThixo Oligorha.” (Yoh. 1:1; Isa. 9:6) Kodwa akukho ndawo kuthethwa ngaye kusithiwa nguSomandla, ekubeni uYehova enjalo. (Gen. 17:1) UYesu kuthiwa “lubengezelo lobuqaqawuli [bukaThixo],” kodwa uYise unguMthombo wobo buqaqawuli. (Heb. 1:3) UYesu akasifuni nangayiphi na indlela isigxina sikaYise. Wathi: “Uze uqubude eNkosini [uYehova, NW] uThixo wakho, ukhonze yena yedwa.” (Luka 4:8) Ukho “esebumeni bukaThixo,” yaye uYise uyalele ukuba “ngegama likaYesu onke amadolo agobe,” kodwa konke oku kwenziwa “kuze kuzukiswe uThixo uYise.”—Fil. 2:5-11; bona kwanephepha 398-402.
Ukuba Ubani Uthi—
‘Andikholelwa kuThixo’
Usenokuphendula uthi: ‘Ngaba ubusoloko uvakalelwa ngaloo ndlela? . . . Ngaphambi kokuba ufikelele kweso sigqibo, ngaba wabuhlolisisa ubungqina obuthile obuyintlanganisela owabufumanisa bukuphembelela?’ Mhlawumbi usenokongeza uthi: ‘Lo ngumbandela onditsala ngamandla ibe ndiye ndawucinga kakhulu. Ezinye iingongoma endiye ndazifumanisa ziluncedo gqitha yayizezi: . . . (Kwiphepha 350, bona umxholo omncinane othi “Ngaba zikho izizathu eziphilileyo zokukholelwa kuThixo?” bona kwanephepha 99-101, phantsi kothi “InDalo.”)’
Okanye unokuthi: ‘Ngaba uthetha ukuba akukholelwa ukuba kukho uMdali, okanye kungenxa yokuba ubone uhanahaniso olukhulu ezicaweni le nto ungenalukholo kwinto eziyifundisayo?’ Ukuba kungenxa yohanahaniso, usenokongeza uthi: ‘Kukho umahluko omkhulu phakathi kweecawa zeNgqobhoko nobuKristu bokwenyaniso. Kuyinyaniso ukuba iNgqobhoko ibacinezele abantu, kodwa ubuKristu abukhange benjenjalo. INgqobhoko iye yenza imfazwe, kodwa ubuKristu abukwenzanga oko. INgqobhoko isilele ukunikela ulwalathiso olufanelekileyo lokuziphatha, kodwa ubuKristu abukwenzanga oko. ILizwi likaThixo, iBhayibhile, aliyixhasi iNgqobhoko. Ngokwahlukileyo koko, liyayigxeka iNgqobhoko.’
Enye indlela: ‘Ndibe nencoko ebangel’ umdla nabanye abavakalelwa njengoko uvakalelwa. Bambi babo bathi babengenakukholelwa kuThixo ngoxa kukho konke ukubandezeleka nobungendawo ehlabathini. Ngaba nawe uvakalelwa ngaloo ndlela? (Ukuba kunjalo, sebenzisa omnye umbandela okwiphepha 351, 352, phantsi komxholwana othi “Ngaba ubukho bobungendawo nobokubandezeleka bungqina ukuba akukho Thixo?”)’
‘Ndikholelwa kuphela kwinto endiyibonayo, ibe andizange ndambona uThixo’
Usenokuphendula uthi: ‘Loo mbono iqheleke gqitha kule mihla. Ibe kukho isizathu sokubakho kwayo. Siphila kwibutho elibalaselisa izinto eziphathekayo. Kodwa ungumntu othanda ukuzijonga izinto njengoko zinjalo, andibi kunjalo?’ Mhlawumbi usenokongeza uthi: (1) ‘Ngaba zikho izinto ezithile esingenakuzibona ngamehlo ethu kodwa esizikholelwa zikho ngenxa yokuba kukho izizathu ezisengqiqweni zokuba senjenjalo? Kuthekani ngomoya esiwuphefumlayo? Sisenokuwuva xa kubetha impepho. Sinokubona ukuba uzalise imiphunga yethu, nakubeni singawuboni. Ngenxa yokuba siyibona imiphumo, kukho isizathu esilungileyo sokukholelwa kuwo, akunjalo na?’ (2) ‘Ibe asinakuwubona umxhuzulane. Kodwa xa silahla into sibona ubungqina bokuba umxhuzulane uyasebenza. Asiliboni ivumba, kodwa iimpumlo zethu ziyalirhogola. Asinakuwabona amaza esandi, kodwa iindlebe zethu zinokuweva. Ngoko siyakholelwa kwizinto esingenakuzibona—lo gama nje kukho isizathu esilungileyo sokwenjenjalo, akunjalo na?’ (3) ‘Kaloku, ngaba bukho ubungqina bokuba uThixo ongabonakaliyo ukho ngokwenene? (Sebenzisa umbandela okwiphepha 350, 351, phantsi komxholwana othi “Ngaba zikho izizathu eziphilileyo zokukholelwa kuThixo?”)’
‘Mna ndineyam ingcamango ngoThixo’
Usenokuphendula uthi: ‘Ndiyakuvuyela ukuva ukuba ungumntu oye wakucinga oku nokuba uyakholelwa kuThixo. Makhe ndikubuze ndithi, Yiyiphi ingcamango onayo ngoThixo?’ Mhlawumbi usenokongeza uthi: ‘Ndiqinisekile ukuba uyaqonda ukuba kubalulekile ukuqiniseka ukuba nantoni na esiyikholelwayo iyavisisana noko uThixo akuthethayo. Ndingakhe ndikubonise na ingongoma nje enye eseBhayibhileni engalo mbandela? (INdu. 83:18)’