Icandelo 2
Ngubani Onokusixelela?
1, 2. Yiyiphi eyona ndlela ilungileyo yokufumanisa injongo yento eyiliweyo?
Ngubani onokusixelela ukuba iyintoni ngokwenene injongo yobomi? Kaloku, ukuba ubunokutyelela umyili woomatshini uze umbone esenza umatshini ontsonkothileyo ongawuqondiyo, ubunokufumanisa njani ukuba ngowokwenza ntoni? Eyona ndlela ilungileyo ibiya kuba kukubuza umyili wawo.
2 Ngoko, kuthekani ngezinto eziyilwe ngokumangalisayo esizibona zisingqongile emhlabeni, njengazo zonke izinto eziphilayo, ukuya kutsho kweyona seli incinane ephilayo? Kwaneemolekyuli neeathom ezincinane gqitha ezingaphakathi kwiseli ziyilwe ngokumangalisayo yaye zilungelelene. Kwakhona, kuthekani ngendlela emangalisayo eyilwe ngayo ingqondo yomntu? Yaye kuthekani ngenkqubo yethu yezijikelezi-langa, noMnyele wethu Wezulu, kwanendalo iphela? Ngaba akuzange kufuneke kubekho uMyili ukuze kubekho zonke ezi zinto zimangalisayo? Ngokuqinisekileyo unokusixelela isizathu sokuba ayile izinto ezinjalo.
Ngaba Ubomi Babakho Ngamabona-ndenzile?
3, 4. Ngaba kunokwenzeka ukuba ubomi babakho ngamabona-ndenzile?
3 IThe Encyclopedia Americana yaphawula “indlela entsonkothe gqitha nelungelelene gqitha ezenziwe ngayo izidalwa eziphilayo” yaza yathi: “Ukuzihlolisisa ngokusondeleyo iintyatyambo, izinambuzane, okanye izilwanyana ezanyisayo kubonisa ukulungelelaniswa ngolona coselelo kwamalungu.” Isazinzulu ngeenkwenkwezi saseBritani uMhlekazi Bernard Lovell, sibhekisela kwimichiza ekhoyo kwizinto eziphilayo, sabhala: “Ukuba nokwenzeka . . . kokubakho kwezinto ngamabona-ndenzile okukhokelela ekwakhekeni kwelinye lawona masuntswana mancinane eemolekyuli zeprotini phantse kube yinto engenakwenzeka konke konke. . . . Kuyinto eyayingenakwenzeka.”
4 Ngokufanayo, isazinzulu ngeenkwenkwezi uFred Hoyle sathi: “Inzululwazi yezinto eziphilayo nesekelwe kwisithethe xa iyonke isathi ubomi basuka bazivelela. Kodwa njengoko izazi ngamachiza ezinto eziphilayo zifumanisa okuninzi ngakumbi ngokuntsonkotha okoyikekayo kobomi, licacile elokuba amathuba okuba ubomi bazivelela ngengozi mancinane gqitha kangangokuba anokungabikho ngokupheleleyo. Ubomi abunakuba bazivelela ngamabona-ndenzile.”
5-7. Ibhayoloji yeemolekyuli ingqina njani ukuba izinto eziphilayo azinakubakho ngamabona-ndenzile?
5 Ibhayoloji yeemolekyuli, elinye lawona macandelo akutshanje enzululwazi, sisifundo ngeegenes, iimolekyuli neeathom zezinto eziphilayo. Ingcali yebhayoloji yeemolekyuli uMichael Denton ithi ngoko kufunyanisiweyo: “Olona hlobo lulula nolwaziwayo lweseli luntsonkothe gqitha kangangokuba akunakwenzeka ukwamkela into yokuba into enjalo yasuka nje yazidibanisa ngequbuliso ngamabona-ndenzile nangendlela engakholelekiyo.” “Kodwa asikokuntsonkotha kweenkqubo eziphilayo nje kuphela okulucelomngeni ngokwenene, kukwakho nobukrelekrele obubonakala kwindlela eziyilwe ngayo.” “Kukwiimolekyuli zazo obuthi . . . ubukrelekrele kwibhayoloji balowo waziyilayo nokufezeka kweenjongo ezifikelelweyo bubonakale gca.”
6 Lo kaDenton uhlabela mgama esithi: “Naphi na apho sikhangela khona, kungakhathaliseki ukuba sehla nzulu kangakanani, sibona ubugcisa nobuchule obugqwesileyo, obuyikhaba ngawo omane ingcamango yamabona-ndenzile. Ngaba sinokuyikholelwa ngokwenene into yokuba inkqubo eyazenzekelayo yayinokuyila into yokwenene, elona suntswana layo lincinane—iprotini okanye igene—elintsonkothe kangangokuba asinakuliqonda ngamandla ethu engqondo, into yokwenene eyikhaba ngokwayo ingcamango yamabona-ndenzile, eyigqwesa ngandlela zonke nantoni na eyakha yaveliswa ngobukrelekrele bomntu?” Kwakhona uthi: “Phakathi kweseli ephilayo neyona nkqubo ilungelelaniswe ngokuphakame gqitha engaphiliyo, enjengekristali okanye ihlwantsi lekhephu, kukho umsantsa omkhulu nopheleliseleyo gqitha kunokuba unokuwuthelekelela.” Yaye unjingalwazi wephysics, uChet Raymo, uthi: “Kuyandimangalisa . . . Molekyuli nganye ibonakala iyilelwe ngokukhethekileyo umsebenzi wayo.”
7 Ingcali ngebhayoloji yeemolekyuli uDenton iqukumbela ngelithi “abo ngenkani bemi kwelokuba zonke ezi zinto ziyinene zingumphumo wamabona-ndenzile” bakholelwa kwintsomi. Enyanisweni, inkolelo kaDarwin yokuba izinto eziphilayo zabakho ngamabona-ndenzile uyibiza ngokuthi “yeyona ntsomi inkulu engemvelaphi yendalo yale nkulungwane yamashumi amabini.”
Ukuze Kubekho Okuyiliweyo Kufuneka Kubekho Umyili
8, 9. Nikela umzekeliso obonisa ukuba zonke izinto eziyiliweyo zimele zibe nomyili.
8 Into yokuba kunokwenzeka ukuba izinto ezingaphiliyo zazinokuphila ngamabona-ndenzile, ngengozi eyenzeka ngebhaqo, ayikholeleki kangangokuba ayinakwenzeka. Unotshe, zonke izinto eziyilwe ngokumangalisayo emhlabeni azinakuba zenzeka ngengozi, ekubeni yonke into eyiliweyo imele ibe nomyili. Ngaba ikho imeko oyaziyo oku okungeyonyaniso kuyo? Akukho nanye. Yaye okukhona okuyiliweyo kuntsonkothile, kokukhona lowo ukuyilileyo emele ukuba unobuchule.
9 Sisenokuwuzekelisa nangale ndlela lo mbandela: Xa sibona umzobo, siwamkela njengobungqina bokuba ukho umzobi. Xa sifunda incwadi, siyasamkela isibakala sokuba ukho umbhali. Xa sibona indlu, siyavuma ukuba ukho umakhi. Xa sibona iirobhothi, siyazi ukuba bakho abantu abaqulunqa imithetho. Zonke ezo zinto zenziwe ngenjongo ngabo bazenzayo. Yaye nangona sisenokungaqondi yonke into ngabantu abaziyilayo, asikuthandabuzi ukuba bakho.
10. Bubuphi ubungqina boMyili oPhakamileyo esinokububona?
10 Ngokufanayo, ubungqina bobukho boMyili oPhakamileyo bunokubonwa kwindlela eziyilwe, ezilungelelene nezintsonkothe ngayo izinto eziphilayo emhlabeni. Zonke zibonisa ukuba kukho ubuKrelekrele obuPhakamileyo. Oku kukwanjalo nangendlela eyilwe, elungelelene, nentsonkothe ngayo indalo neminyele yayo engamawaka ezigidi, ngamnye unamawaka ezigidi zeenkwenkwezi. Yaye zonke izinto ezisesibhakabhakeni zilawulwa yimithetho engqalileyo, enjengaleyo yokuhamba, ukufudumala, ukukhanya, isandi, ielectromagnetism, nowomxhuzulane. Ngaba inokubakho imithetho ngaphandle komqulunqi wayo? Isazinzulu ngeziphekepheke uGqr. Wernher von Braun sathi: “Imithetho yemvelo yendalo iqiniseke kangangokuba asinangxaki ekwakheni isiphekepheke sokuya enyangeni yaye ixesha esilithabathileyo sinokulibala siqiniseke nangomzuzwana. Le mithetho imele ukuba yamiselwa ngumntu othile.”
11. Kutheni singafanele sibukhanyele ubukho boMyili oPhakamileyo ngenxa nje yokuba singenakumbona?
11 Liyinyaniso elokuba, asinakumbona uMyili oPhakamileyo noMwisi-mthetho ngamehlo ethu enyama. Kodwa ngaba siyabukhanyela ubukho bezinto ezifana nomxhuzulane, imagnetism, umbane, okanye amaza kanomathotholo ngenxa nje yokuba singenakuzibona? Hayi, asibukhanyeli, kuba sinokuyibona imiphumo yazo. Ngoko kutheni sifanele sibukhanyele ubukho boMyili oPhakamileyo noMwisi-mthetho ngenxa nje yokuba singenakumbona, ngoxa sinokuyibona imiphumo emangalisayo yemisebenzi yezandla zakhe?
12, 13. Bubonisa ntoni ubungqina ngobukho boMdali?
12 UPaul Davies, unjingalwazi wephysics, ugqiba kwelokuba ubukho bomntu abuyonto eyazenzekela ngamabona-ndenzile. Uthi: “Ngokwenene kukho injongo yokuba sibe lapha.” Yaye uthi ngokuphathelele indalo: “Ngenxa yophando lwam lwezenzululwazi, ndikholelwa ngamandla ngakumbi nangakumbi kwelokuba indalo ebonakalayo idityaniswe ngobuchule obumangalisa kangangokuba andinakuyamkela njengento eyazenzekela ngengozi. Mna ndibona ngathi, kumele kubekho inkcazelo enzulu ngakumbi.”
13 Ngaloo ndlela, ubungqina busixelela ukuba indalo, umhlaba, nezinto eziphilayo ezisemhlabeni azinakuba zabakho ngamabona-ndenzile. Zonke zinikela ubungqina kuMdali olumke nonamandla gqitha.
Oko IBhayibhile Ikutshoyo
14. IBhayibhile ifikelela kwesiphi isigqibo ngoMdali?
14 IBhayibhile, eyona ncwadi indala yoluntu, ifikelela kwisigqibo esifanayo. Ngokomzekelo, kwincwadi yeBhayibhile yamaHebhere, eyabhalwa ngumpostile uPawulos, sixelelwa oku: “Kuba yonke into eyindlu inoyakhayo; ke lowo wazakhayo zonke izinto nguThixo.” (Hebhere 3:4) Incwadi yokugqibela yeBhayibhile, eyabhalwa ngumpostile uYohane, ikwathi: “Ufanele, Nkosi, ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.”—ISityhilelo 4:11.
15. Sinokuziqonda njani ezinye zeempawu zikaThixo?
15 IBhayibhile ibonisa ukuba nangona uThixo engenakubonwa, uhlobo loThixo anguye lunokubonwa koko akwenzileyo. Ithi: “Iimpawu [zoMdali] ezingenakubonwa, oko kukuthi amandla nobuthixo bakhe obungunaphakade, bezibonakala kwiliso lengqiqo, kususela ekuqaliseni kwehlabathi, kwizinto azenzileyo.”—Roma 1:20, The New English Bible.
16. Kutheni sifanele sivuye kuba abantu bengenakumbona uThixo?
16 Ngoko iBhayibhile isichazela umphumo nonobangela. Umphumo—izinto ezimangalisayo ezenziweyo—bubungqina bonoBangela okrelekrele, onamandla: uThixo. Kwakhona, sinokuba nombulelo kuba engabonakali, ekubeni njengoMdali wendalo iphela, ngokungathandabuzekiyo enamandla angathethekiyo kangangokuba abantu abayinyama negazi abanakulindela ukumbona baze baphile. Ibe oko koko kanye iBhayibhile ikutshoyo: “Akukho mntu [ubona uThixo] aphile.”—Eksodus 33:20.
17, 18. Kutheni ingcamango yoMdali ifanele ibe yebalulekileyo kuthi?
17 Ingcamango yoMyili oMkhulu, uMntu oPhakamileyo—uThixo—ifanele ibe yebaluleke kakhulu kuthi. Ukuba senziwa nguMdali, ngoko ngokuqinisekileyo umele ukuba wayenesizathu, injongo, ekusidaleni. Ukuba sadalwa ukuze sibe nenjongo ebomini, ngoko kukho isizathu sokuba nethemba lokuba kwixesha elizayo izinto ziya kusihambela kakuhle. Kungenjalo, siyaphila nje size sife singenathemba. Ngoko kubaluleke ngokwenene ukuba siyifumanise injongo kaThixo ngathi. Sinokwandula ke sikhethe ukuba sifuna ukuphila ngokuvisisana nayo okanye akunjalo.
18 Kwakhona, iBhayibhile ithi uMdali nguThixo oluthando osikhathalele gqitha. Umpostile uPetros wathi: “Ngokuba yena enikhathalele.” (1 Petros 5:7; bona kwanoYohane 3:16 neyoku-1 kaYohane 4:8, 16.) Enye indlela esinokubona ngayo ukuba uThixo usikhathalele kangakanani kungokuqwalasela indlela asenze ngayo, engqondweni nasemzimbeni.
‘Senziwe Ngokumangalisayo’
19. Yiyiphi inyaniso umdumisi uDavide ayizisa engqalelweni yethu?
19 EBhayibhileni umdumisi uDavide wavuma wathi: “Ngendlela eyoyikekayo ndenziwe ngokumangalisayo.” (INdumiso 139:14, NW) Ngokuqinisekileyo yinyaniso leyo, kuba ingqondo nomzimba womntu zayilwa ngokumangalisayo nguMyili oPhakamileyo.
20. Enye intyilalwazi iyichaza njani ingqondo yomntu?
20 Ngokomzekelo, ingqondo yakho intsonkothe ngaphezu kwayo nayiphi na ikhompyutha. IThe New Encyclopædia Britannica iphawula oku: “Ukudluliselwa kwenkcazelo kwinkqubo yethu yemithambo-luvo kuntsonkothe ngaphezu kwawona maziko makhulu eefoni; amandla engqondo yomntu okucombulula iingxaki awadlula lee nawezona khompyutha zinamandla.”
21. Xa sibona oko ingqondo ikwenzayo, sifanele sifikelele kwesiphi isigqibo?
21 Engqondweni yakho kugcinwe amakhulu ezigidi ezibakala nemifanekiso-ngqondweni, kodwa ayiphelelanga nje ekubeni nguvimba wokugcina izibakala. Ngayo unokufunda ukubetha umlozi, ukubhaka isonka, ukuthetha iilwimi zasemzini, ukusebenzisa ikhompyutha, okanye ukuqhuba inqwelo-moya. Unokuthelekelela indlela ikhefu eliya kuba yiyo okanye indlela isiqhamo esiya kuba luncuthu ngayo. Unokuhlalutya uze wenze izinto. Kwakhona usenokuceba, usenokuxabisa, usenokuthanda, uze unxulumanise iingcinga zakho nexesha elidluleyo, elimiyo, nelizayo. Ekubeni thina bantu singenako ukuyila into emangalisa njengengqondo yomntu, ngoko Lowo wayiyilayo ngokucacileyo unobulumko nobuchule obubugqwesa lee obakhe nawuphi na umntu.
22. Yintoni izazinzulu eziyivumayo ngengqondo yomntu?
22 Ngokuphathelele ingqondo, izazinzulu ziyavuma: “Indlela le misebenzi eyenziwa ngayo ngulo matshini wenziwe ngokumangalisayo, ngokulungeleleneyo, nangokuntsonkothe ngokwenene ngokucacileyo kuyinkohla. . . . Abantu basenokungaze bawacombulule onke amaqhina ingqondo yomntu ewanikelayo.” (Scientific American) Yaye unjingalwazi wephysics uRaymo uthi: “Xa sithetha inyaniso, asikabi nalwazi lungako ngendlela ingqondo yomntu eyigcina ngayo inkcazelo, okanye indlela ekwazi ngayo ukukhumbula izinto ezithile xa ithandile. . . . Kukho iiseli zemithambo-luvo ezininzi ezilikhulu lamawaka ezigidi kwingqondo yomntu. Seli nganye inxibelelana, ngeesynapse ezilungelelaniswe njengomthi, nezinye iiseli ezingamawaka. Indlela ezidibana ngayo imangalisa ngokwenene.”
23, 24. Chaza amalungu omzimba athile ayilwe ngokumangalisayo, yaye unonjineli wagqabaza wathini?
23 Amehlo akho abona ngendlela echanileyo yaye anokulungela iimeko ezahlukeneyo ngakumbi kunayo nayiphi na ikhamera; enyanisweni, aziikhamera ezizisebenzelayo, ezizitsolisayo, nezifota ngemibala yemifanekiso eshukumayo. Iindlebe zakho zinokuva izandi ezahlukahlukeneyo zize zikuncede uqonde apho uya khona yaye uhlale ulungelelene. Intliziyo yakho yimpompo esebenza ngendlela abona nonjineli baphambili abangakwazanga kuyixelisa. Kwakhona namanye amalungu omzimba abalasele: impumlo, ulwimi, nezandla zakho, kwanenkqubo yakho yokujikeleza kwegazi neyokwetyisa, xa sibala ezimbalwa.
24 Ngaloo ndlela, unonjineli owayeqeshelwe ukuyila nokwakha ikhompyutha enkulu waqiqa ngelithi: “Ukuba ikhompyutha yam kuye kwafuneka ibe nomyili, kukangakanani ke ngaloo matshini untsonkothileyo womzimba, imichiza nobomi, ongumzimba wam—wona ke oyinxalenye encinane gqitha yendalo yonke phantse engenasiphelo?”
25, 26. Yintoni uMyili oMkhulu amele akwazi ukusixelela yona?
25 Kanye njengokuba abantu benenjongo xa besenza iinqwelo-moya, iikhompyutha, iibhayisekile, nezinye izixhobo, ngokufanayo noMyili wengqondo nomzimba wabantu umele ukuba wayenenjongo ekusiyileni. Yaye lo Myili umele ukuba unobulumko obungaphezulu kobabantu, ekubeni kuthi kungekho namnye unokuziphinda izinto awaziyilayo. Kusengqiqweni, ke ngoko, ukuba sithi nguYe onokusixelela isizathu sokusiyila kwakhe, isizathu sokusibeka kwakhe kulo mhlaba, noko lisifumbathele kona ikamva.
26 Xa sizazi ezo zinto, zinokuthi ke ingqondo nomzimba omangalisayo uThixo asinike zona zisetyenziselwe ukuzalisekisa injongo yethu ebomini. Kodwa sinokufunda phi ngeenjongo zakhe? Usinike phi loo nkcazelo?
[Umfanekiso okwiphepha 7]
Eyona ndlela ilungileyo yokufumanisa isizathu sokuyilwa kwento kukubuza umyili wayo
[Umfanekiso okwiphepha 8]
Ukuntsonkotha nendlela eziyilwe ngayo izinto eziphilayo kunokubonwa kwimolekyuli yeDNA
[Umfanekiso okwiphepha 9]
“Amandla engqondo yomntu okucombulula iingxaki awadlula lee nawezona khompyutha zinamandla”