Unokwenza Njani Ukuze Kukuncede Ukufunda IBhayibhile?

Ngaba wakha wafuna ukuqala ukwenza into kodwa uthi xa uyicinga ubone ukuba kuza kuba nzima ukuyenza? Mhlawumbi wayiqala kancinci ukuze ingabi nzima kakhulu. Kunjalo ke nangokufunda iBhayibhile. Usenokuthi ‘Ndiza kuyiqala ngaphi?’ Kwesi sifundo siza kuthetha ngezinto ezilula onokuzenza eziza kukunceda ukuthande ukufunda iBhayibhile.

1. Kutheni simele siyifunde yonke imihla iBhayibhile?

Umntu oyifunda yonke imihla iBhayibhile okanye “umthetho kaYehova,” uza konwaba aze aphumelele. (Funda iNdumiso 1:1-3.) Ungaqala ngokuyifunda nje imizuzu embalwa yonke imihla. Xa umane ufunda iLizwi LikaThixo, iBhayibhile, uza kude ukuthande ukuyifunda.

2. Ungenza njani ukuze ube nezinto ophuma nazo xa ufunda iBhayibhile?

Ukuze kusincede ukufunda iBhayibhile kufuneka sime size sicinge ngento esiyifundayo. Kufuneka siyifunde size “sicingisise nzulu ngayo.” (Yoshuwa 1:8, umbhalo osemazantsi.) Xa uyifunda, zibuze imibuzo enjengethi: ‘Indixelela ntoni le nto ngoYehova uThixo? Ndingayisebenzisa njani ebomini bam? Ndingazisebenzisa njani ezi vesi ukuze ndincede abanye abantu?’

3. Ungayifunda nini iBhayibhile?

Ngaba kunzima kuwe ukuba nexesha lokufunda iBhayibhile? Baninzi abantu abanaloo ngxaki. Zama ‘ukulisebenzisa kakuhle ixesha.’ (Efese 5:16) Ukuze uyenze le nto kufuneka uzixelele ukuba qho ngosuku ngexesha elithile uza kufunda iBhayibhile. Abanye abantu bayifunda ekuseni. Kubekho abayifunda emini, mhlawumbi ngekhefu. Kanti abanye bayifunda ebusuku, ngaphambi kokuba balale. Wena ungayifunda nini?

FUNDA NEZINYE IZINTO

4. Kuthande ukufunda iBhayibhile

Kusenokungabi lula ukuqalisa ukufunda iBhayibhile. Kodwa unokuzama ukukuthanda njengokuba ubunokuzama ukuthanda ukutya ongazange wakutya. Funda 1 Petros 2:2, nize nincokole ngalo mbuzo:

• Ucinga ukuba ukufunda iBhayibhile yonke imihla kuza kukunceda njani uyithande?

Dlala IVIDIYO ukuze ubone ukuba abanye abantu benza njani ukuze bakuthande ukufunda iBhayibhile. Emva koko, nincokole ngale mibuzo.

IVIDIYO: Ulutsha Lufunda Ukuthanda ILizwi LikaThixo (5:33)

• Kule vidiyo, yintoni eyayisenza kube nzima kolu lutsha ukuba lufunde iBhayibhile?

• Yintoni eyalunceda lwafunda iBhayibhile yonke imihla?

• Ziintoni olwazenzayo ukuze lukuthande kakhulu ukufunda iBhayibhile?

Amacebiso aza kukunceda uqalise:

• Khetha iBhayibhile eguqulelwe ngolwimi lwangoku nonokuyithemba. Zama INguqulelo Yehlabathi Elitsha ukuba iyafumaneka ngolwimi lwakho.

• Qala ngeendawo ocinga ukuba ungazithanda. Ukuze ubone ezinye izinto onokufunda ngazo, jonga itshathi ethi “Qala Ukufunda IBhayibhile.”

• Zazi ukuba undawoni. Sebenzisa itshathi ethi “Ufundo Lwakho LweBhayibhile” ekule ncwadi.

• Sebenzisa iJW Library. Kuyo, unokufunda okanye umamele iBhayibhile ngeelwimi ezininzi usebenzisa ifowuni okanye ezinye izixhobo nokuba uphi.

• Sebenzisa iSihlomelo esikwiNguqulelo Yehlabathi Elitsha. Sineemaphu, iitshathi nengcaciso yamagama ezinokukunceda xa ufunda.

5. Lungiselela xa niza kufunda iBhayibhile

Funda iNdumiso 119:34, nize nincokole ngalo mbuzo:

• Kutheni kubalulekile ukuthandaza ngaphambi kokuba ufunde iBhayibhile okanye ngaphambi kokuba ulungiselele?

Unokwenza njani ukuze ube nezinto ophuma nazo qho xa nigqibe ukufunda? Xa ulungiselela, zama ezi zinto:

1. Funda iziqendu zokuqala zesifundo.

2. Funda izibhalo uze uzame ukuqonda ukuba zidibana njani nento oyifundayo.

3. Krwelela iimpendulo, le nto iza kukunceda xa ukunye nomntu okufundelayo.

Ngaba Ubuyazi?

AmaNgqina KaYehova asebenzise iinguqulelo zeBhayibhile ezininzi. Kodwa siyithanda kakhulu iNguqulelo Yehlabathi Elitsha YeZibhalo Ezingcwele kuba ichanile, icacile, iyalisebenzisa negama likaThixo.​—Jonga inqaku eliku-jw.org/xh elithi “Ngaba AmaNgqina KaYehova AneBhayibhile Yawo?”

UFUNDE NTONI?

Ukuze ube nezinto ophuma nazo xa ufunda iBhayibhile, qiniseka ukuba unalo ixesha lokuyifunda, thandazela ukuyiva into oyifundayo uze ulungiselele ngaphambi kokuba nifunde nomntu ofunda naye.

Khawutsho

• Yintoni enokukunceda ukuze ube nezinto ophuma nazo xa ufunda iBhayibhile?

• Ungayifunda nini iBhayibhile?

• Kutheni kubalulekile ukulungiselela xa niza kufunda nomntu ofunda naye?

JONGA NEZI ZINTO

Funda amacebiso onokuwasebenzisa ukuze ube nezinto ophuma nazo xa ufunda iBhayibhile.

“Unokufumana Okuninzi Xa Ufunda IBhayibhile” (IMboniselo No. 1 2017)

Yiva iindlela ezintathu onokuyifunda ngazo iBhayibhile.

“Kungandinceda Njani Ukufunda IBhayibhile?​—Inxalenye 1: Ukufunda IBhayibhile Yakho” (Inqaku eliku-jw.org/xh)

Yiva ukuba ungenza njani ukuze ukuthande ukufunda iBhayibhile.

“Kungandinceda Njani Ukufunda IBhayibhile?​—Inxalenye 2: Kuthande Ukufunda IBhayibhile” (Inqaku eliku-jw.org/xh)

Yiva amacebiso asuka kubantu abaneminyaka emininzi befunda iBhayibhile.

Ukufundisisa Kuza Kukunceda (1:58)