ISIFUNDO 38
Sixabise Isipho Sobomi
Zininzi izinto ezintle nesinokuzonwabela ebomini. Naxa sineengxaki, ziba khona izinto ezisonwabisayo. Singambonisa njani uYehova ukuba siyasixabisa isipho sobomi? Kutheni kubalulekile ukuba siyenze loo nto?
1. Kutheni sifanele sibuxabise ubomi?
Sifanele sibuxabise ubomi kuba busisipho esisinikwe nguTata wethu osithandayo, uYehova. ‘Ungumthombo wobomi’ kuba wadala zonke izinto eziphilayo. (INdumiso 36:9) Unika “bonke abantu ubomi, umoya abawuphefumlayo nazo zonke izinto.” (IZenzo 17:25, 28) UYehova usinika izinto esizidingayo ukuze sikwazi ukuqhubeka siphila. Kodwa akaphelelanga apho, usinika nezinye izinto ezininzi ukuze sikwazi ukonwabela ubomi.—Funda iZenzo 14:17.
2. Singambonisa njani uYehova ukuba siyasixabisa isipho sobomi?
UYehova kudala wakukhathalela, usesesiswini sikamama wakho. KwiLizwi LikaThixo, uDavide umkhonzi wakhe wathandaza wathi: “Amehlo akho andibona ndiseyimbumba.” (INdumiso 139:16) UYehova ubuxabise kakhulu ubomi bakho. (Funda uMateyu 10:29-31.) Angakhathazeka kakhulu xa umntu enokuzibulala, okanye abulale omnye umntu ngabom.a (Eksodus 20:13) Angakhathazeka naxa sinokwenza izinto eziza kusifaka engozini kunganyanzelekanga, okanye xa singazenzi izinto ezifunekayo ukuze sikhusele abanye. Xa sikhusela thina nabanye, sibonisa ukuba siyasixabisa esi sipho simangalisayo sobomi.
FUNDA NEZINYE IZINTO
Jonga ukuba ungabonisa njani ukuba uyasixabisa isipho sobomi.
3. Hoya impilo yakho
Ubomi bethu bonke sikhonza uYehova kuba samthembisa ukuba siza kwenza zonke izinto azifunayo. Kuba ngathi sinikela ngemizimba yethu kuThixo. Funda amaRoma 12:1, 2, nize nincokole ngale mibuzo:
Yintoni efanele ikwenze uhoye impilo yakho?
Ungayenza njani loo nto?
4. Qiniseka ukuba wena nabanye nikhuselekile
IBhayibhile isikhuthaza ukuba singazenzi izinto eziyingozi ukuze kungabikho mntu wonzakalayo, okanye uswelekayo. Dlala IVIDIYO ukuze ubone izinto onokuzenza ukuze ukhuseleke.
Funda iMizekeliso 22:3, nize nincokole ngokuba ungenza njani ukuze wena nabanye nikhuseleke . . .
ekhayeni.
emsebenzini.
kwimidlalo.
xa usemotweni okanye uqhuba.
5. Buxabise ubomi bomntwana ongekazalwa
UDavide wathi uYehova unomdla kuyo yonke into eyenzeka kumntwana okhula esiswini sikamama wakhe. Funda iNdumiso 139:13-17, nize nincokole ngalo mbuzo:
KuYehova, ngaba ubomi bomntu buqala xa ezalwa, okanye xa esesesiswini sikamama wakhe?
UYehova wanika amaSirayeli imithetho eyayikhusela oomama nabantwana babo abangekazalwa. Funda iEksodus 21:22, 23, nize nincokole ngale mibuzo:
UYehova wayemjonga njani umntu obulele umntwana ongekazalwa ngempazamo?
Angaziva njani ke xa kunokubakho umntu obulala umntwana ngabom?b
Indlela uThixo abujonga ngayo ubomi ikwenza uzive njani?
Nomntu oyaziyo indlela ubomi obuxabiseke ngayo usenokucinga ukuba ayikho enye into anokuyenza ngaphandle kokukhupha isisu. Funda uIsaya 41:10, nize nincokole ngale mibuzo:
Ukuba umntu ukhuthazwa ukuba akhuphe isisu, angancedwa yintoni? Kutheni usitsho?
ABANYE ABANTU BATHI: “Umntu okhulelweyo angazikhethela ukuba uyafuna na ukusikhupha isisu, kuba kaloku ngumzimba wakhe.”
Yintoni ekwenza uqiniseke ukuba uYehova ubuxabisile ubomi bomama nomntwana wakhe ongekazalwa?
UFUNDE NTONI?
IBhayibhile isifundisa ukuba simele sibuthande, sibuhloniphe size sibukhusele ubomi esibunikwe nguYehova. Le nto sifanele siyenze kuthi nakwabanye.
Khawutsho
Kutheni ubomi bomntu buxabisekile kuYehova?
UYehova uziva njani xa umntu ebulala omnye ngabom?
Yintoni ekwenza usithande isipho sobomi?
JONGA NEZI ZINTO
Jonga impendulo yombuzo othi, Ngaba uThixo uza kumxolela umntu okhuphe isisu?
“Ithini IBhayibhile Ngokukhupha Isisu?” (Inqaku eliku-jw.org/xh)
Funda ukuba indlela uThixo abujonga ngayo ubomi inokusinceda njani ukuze sikhethe imidlalo engazukusenzakalisa.
“‘Imidlalo Eyingozi’—Ngaba Ufanele Uzijule Kuyo?” (Vukani!, Oktobha 8, 2000)
Jonga ukuba iBhayibhile inokumnceda njani umntu ofuna ukuzibulala.
“Ndifuna Ukufa—Ngaba IBhayibhile Ingandinceda Xa Ndicinga Ngokuzibulala?” (Inqaku eliku-jw.org/xh)
a UYehova ubakhathalele kakhulu abantu abaneentliziyo ezibuhlungu. (INdumiso 34:18) Uyaziqonda izinto ezibuhlungu ezinokwenza abantu bafune ukuzibulala, ibe ufuna ukubanceda. Ukuze ubone ukuba umnceda njani umntu ofuna ukuzibulala, funda inqaku elikwesi sifundo elithi “Ndifuna Ukufa—Ngaba IBhayibhile Ingandinceda Xa Ndicinga Ngokuzibulala?” kwindawo ethi “Jonga Nezi Zinto.”
b Abantu ababekhe bakhupha isisu abamele batyiwe sisazela kakhulu kuba uYehova unokubaxolela. Ukuze ufunde nezinye izinto, jonga inqaku elithi “Ithini IBhayibhile Ngokukhupha Isisu?” elikwindawo ethi “Jonga Nezi Zinto” kwesi sifundo.