Ukuqhomfa—Akungondlela-lula
UBILL ukhule ecinga ukuba ukuqhomfa kusisono esikhulu, esilingana nokubulala. Kodwa oko wayebambelele kuko nawakumela kangangamashumi eminyaka kwatshintsha ngowe-1975 xa kwafuneka yena enze isigqibo. UVictoria awayethandana naye wakhulelwa, yaye uBill akazange akwazi ukuyimela imbopheleleko yokutshata nokuba ngumzali. UBill wavuma: “Ndakhawuleza ndacinga ngondlela-lula ndaza ndaxelela uVictoria ukuba kuza kufuneka aqhomfe.”
Le nto uBill wayibiza ngokuba ngundlela-lula kule ngxaki yokukhulelwa okungacetywanga nokungafunwayo ixhaphakile. Uhlolisiso olwenziwa ngowama-2007 ehlabathini lonke lwabonisa ukuba ngowama-2003 kuqikelelwa ukuba amabhinqa angama-42 ezigidi akhupha izisu. Amabhinqa aye aqhomfa ngaweentlanga zonke, avela kwiimvaba ezahlukahlukeneyo zonqulo, akwimigangatho eyahlukahlukeneyo yezoqoqosho, eyemfundo yaye akubudala obahlukahlukeneyo. Ukuba ubunokukhulelwa ungafuni, ubuya kuthini wena? Kutheni bebaninzi kangaka nje abantu abakhetha ukuqhomfa?
‘Ndandingayiboni Enye Into Ngaphandle Kwaleyo’
Ibhinqa elineminyaka engama-35 ubudala lathi: “Ndathwala ubunzima ekukhulelweni kwam yaye akuzange kube lula ukuzala, yabe nemeko yezoqoqosho neengxaki zentsapho zindicinezele. Yaba ziiveki ezintandathu emva kokuba ndizele, ndaphinda ndakhulelwa. Sagqiba kwelokuba ndiqhomfe. Ndandisazi ukuba iphosakele loo nto, kodwa ndandingayiboni enye into ngaphandle kwaleyo.”
Amabhinqa adla ngokufuna ukuqhomfa ngenxa yezizathu eziliqela, ezifana neengxaki zemali okanye ukungafuni ukuzala abantwana bamadoda axhaphazayo. Okanye kusenokwenzeka ukuba eli bhinqa okanye isibini asikhange sikucebe kwangaphambili oku kukhulelwa.
Maxa wambi, abanye baye bakhethe ukuqhomfa ukuze bahlale benegama elihle. Kwaba njalo kwenye imeko eyachazwa nguGqr. Susan Wicklund kwincwadi yakhe ethi This Common Secret—My Journey as an Abortion Doctor. Enye intombazana eyathetha naye ifuna ukuqhomfa yamxelela oku: “Abazali bam ngabantu becawa. . . . Ukuba ndinganosana ndingatshatanga, baya kuhlazeka. Ndakwaziwa nangabahlobo babo ukuba ndonile.”
UGqr. Wicklund wayibuza: “Kulungile ke, wonile kubo, kodwa bakujonga njani ukuqhomfa?” Le ntombazana yavuma: “Kona ukuqhomfa akunakuze kuxoleleke. Kodwa akukubanga kangako kuba akukho mntu uza kwazi ngako. Ukuba ndiqhomfile, abahlobo [babazali bam] basecaweni abanakuze bayazi loo nto.”
Enoba imeko injani na, ngokuqhelekileyo isigqibo sokukhupha isisu ngabom asikho lula. Sidla ngokuba buhlungu gqitha. Kodwa ngaba ukuqhomfa kungundlela-lula?
Cingisisa Ngemiphumo Yako
Uhlolisiso olwenziwa ngowama-2004 kumabhinqa angama-331 aseRashiya nangama-217 aseMerika aye aqhomfa, lwadiza ukuba malunga nesiqingatha sawo onke saba buhlungu ngesenzo sawo. Malunga nama-50 ekhulwini aseRashiya namalunga nama-80 ekhulwini aseMerika “aziva enetyala” ngesi senzo. Ngaphezu kwama-60 ekhulwini amabhinqa aseMerika ‘ayengakwazi ukuzixolela.’ Ekubeni ixhaphakile into yokuba amabhinqa azive enetyala, kuquka lawo angahambi cawa, kutheni esemaninzi kangaka nje amantombazana asaqhomfayo?
Adla ngokwenziwa azive enyanzelekile ukuba aqhomfe. Abazali, amaqabane okanye abahlobo abaneenjongo ezintle banokukhuthaza amabhinqa ukuba aqhomfe ukuze azikhuphe ezingxakini. Oku kunokuphumela kwizigqibo ezingacingisiswanga nezobutyhuthu-tyhuthu. UGqr. Priscilla Coleman, ingcali ngezigulo zengqondo ezinokubangelwa kukuqhomfa wathi: “Noko ke, emva kokuba luphelile uxinezeleko olubangelwa sesi sigqibo nesenzo ngokwaso, amabhinqa abuyela ezingqondweni, aqale azive enetyala, edanile ezisola nokuzisola.”
Oku kuzisola kusoloko kuphakamisa lo mbuzo: Ngaba ukuqhomfa kucima ubomi obusele bukho? Ingxelo yeSouth Dakota Task Force to Study Abortion, yathi amabhinqa akhulelweyo akhethe ukuqhomfa “aye alahlekiselwa ukuba acinge ukuba ukuqhomfa kukususa nje ‘iiseli,’ yaye ayatsho ukuba ngengavumanga ukuqhomfa ukuba ayeyichazelwe inyani.”
Emva kokuhlola “izinto ezothusayo nezibuhlungu ezathethwa” ngamabhinqa ali-1 940 awaqhomfayo, olu hlolisiso lwaqukunjelwa ngelithi: “Uninzi lwala mabhinqa lwaba nomsindo ngenxa yokulahlekelwa ngabantwana awaxelelwa ukuba babengazange baphile.” Kanti olu hlolisiso lwathi “umonakalo owenzeka ezingqondweni zala mabhinqa nobangelwa kukwazi ukuba abulele abantwana bawo udla ngokuwashiya eneentliziyo ezibuhlungu.”
Kodwa yiyiphi eyona nyaniso ngalo mbandela? Ngaba ukuqhomfa kukususa nje iiseli ezisemzimbeni webhinqa elikhulelweyo? Ngaba eneneni imveku engekazalwa ingumntu ophila esibelekweni?
[Ibhokisi/Imifanekiso ekwiphepha 4]
UKUZALA NOKUQHOMFA
Ngowama-2006 kuye kwenziwa uphando ngamabhinqa amaninzi aye akhulelwa esekwishumi elivisayo. Isiqingatha sawo sazala, ngoxa esinye siye saqhomfa. Kolu phando kuye kwafunyaniswa ukuba “xa kuthelekiswa nalawo aye aqhomfa, ambalwa kumabhinqa abazeleyo abantwana bawo ekuye kwafuneka ancedwe ziingcali zengqondo, ebengafane aphuthelwe ebusuku yaye akukhange kufane kwenzeke ukuba atshaye umya.”—Journal of Youth and Adolescence.
Olunye uphengululo luye kwakhupha “iingxelo ezine ezibalulekileyo zophando ehlabathini.” Yintoni efunyaniswe lolo phengululo? “Amabhinqa akhe aqhomfa aye athwaxwe zizigulo ezahlukahlukeneyo xa ethelekiswa nalawo angazange aqhomfe.”—Report of the South Dakota Task Force to Study Abortion—2005.