Ibali Lobomi

UYehova Usoloko Esikhathalele

KUBALISA UENELESI MZANGA

Kwakungowe-1972. Abafana abalishumi, abangamalungu oMbutho Wolutsha lwaseMalawi, bangena ekhayeni lethu, bandibamba, baza bandirhuqela emasimini ommoba akufuphi. Apho, bandibetha baza bandishiya becinga ukuba ndifile.

AmaNgqina kaYehova amaninzi eMalawi ayehlaselwa ngenkohlakalo ngale ndlela. Ayetshutshiselwa ntoni? Yintoni eyawanceda anyamezela? Ndivumele ndikubalisele ngentsapho yam.

NDAZALWA ngoDisemba 31, 1921, kwintsapho eyayiluthanda unqulo. Utata wayengumfundisi weCawa yaseRhabe. Ndakhulela eNkhoma, idolophu encinane kufuphi naseLilongwe, ikomkhulu laseMalawi. Xa ndandineminyaka eli-15 ubudala, ndatshata noEmmas Mzanga.

Ngenye imini satyelelwa ngumhlobo katata, naye owayengumfundisi. Wayephawule ukuba kukho amaNgqina kaYehova ahlala kufuphi nasekhaya, waza wasilumkisa ukuba singanxulumani nawo. Wasixelela ukuba amaNgqina aneedemon yaye ukuba asilumkanga, nathi sinokuba nazo. Eso silumkiso sasoyikisa kangangokuba safudukela kwenye idolophana, apho uEmmas wafumana umsebenzi evenkileni. Kodwa kungekudala safumanisa ukuba eli khaya lethu litsha nalo lalikufuphi namaNgqina kaYehova!

Noko ke, kungekudala, uthando lukaEmmas olunzulu ngeBhayibhile lwamenza ukuba athethe nelinye iNgqina. Emva kokuba efumene iimpendulo ezimanelisayo kwimibuzo yakhe emininzi, uEmmas wavuma ukuqhutyelwa isifundo seBhayibhile leli Ngqina. Ekuqaleni esi sifundo seBhayibhile seeveki ngeeveki sasiqhutyelwa kwivenkile asebenza kuyo, kodwa kamva saqhutyelwa ekhayeni lethu. Ngalo lonke ixesha amaNgqina kaYehova efika, ndandihamba kuba ndandiwoyika. Sekunjalo, uEmmas waqhubeka efundisisa iBhayibhile. Malunga neenyanga ezintandathu emva kokuba eqalisile, wabhaptizwa, ngoAprili 1951. Noko ke, akazange andixelele kuba wayesoyika ukuba ezi ndaba zaziza kuwuqhawula umtshato wethu.

Iiveki Ezinzima

Noko ke, ngenye imini, umhlobo wam uEllen Kadzalero wandixelela ukuba umyeni wam ubhaptizwe njengomnye wamaNgqina kaYehova. Ndavutha ngumsindo! Ukususela ngaloo mini, andizange ndithethe naye okanye ndimenzele ukutya. Ndayeka nokuya kumkhelela amanzi okuhlamba ndize ndiwafudumeze—umsebenzi ngokwesiko lethu ogqalwa njengowabafazi.

Emva kokuba enyamezele le mpatho kangangeeveki ezintathu, ngobubele uEmmas wandicela ukuba ndihlale phantsi, waza wandixelela isizathu sokuba enze isigqibo sokuba liNgqina. Wafunda waza wandicacisela izibhalo eziliqela, njengeyoku-1 kwabaseKorinte 9:16. Ndachukumiseka gqitha ndaza ndavakalelwa kukuba nam ndifanele ndibe nenxaxheba ekushumayeleni iindaba ezilungileyo. Ngoko ke ndagqiba kwelokuba ndiqalise ukufunda iBhayibhile namaNgqina kaYehova. Ngobo busuku, ndamphekela kamnandi, yaye wavuya gqitha umyeni wam.

Ukuthetha Ngenyaniso Kwintsapho Nakubahlobo

Xa abazali bethu beva ukuba sinxulumana namaNgqina kaYehova, basichasa ngokukrakra. Intsapho yakowethu yasibhalela ileta esixelela ukuba singaze siphinde siyityelele. Oko yakwenzayo kwasikhathaza, kodwa sathembela kwisithembiso sikaYesu sokuba siya kuba nabantakwethu noodade wethu noobawo noomama abaninzi bokomoya.—Mateyu 19:29.

Ndakhawuleza ndenza inkqubela kwisifundo sam seBhayibhile yaye ndabhaptizwa ngoAgasti 1951, kwiinyanga nje ezintathu ezinesiqingatha emva komyeni wam. Ndaziva ndinyanzelekile ukuba ndixelele umhlobo wam uEllen ngenyaniso. Okuvuyisayo kukuba, wavuma ukuba ndifunde naye iBhayibhile. NgoMeyi 1952, uEllen wabhaptizwa waza waba ngudade wethu wokomoya, nto leyo eye yomeleza ubuhlobo bethu. Nanamhlanje, sisengabahlobo abasenyongweni.

Ngowe-1954, uEmmas wamiselwa njengomveleli wesiphaluka ukuze atyelele amabandla. Ngelo xesha, sasisele sinabantwana abathandathu. Ngezo mini, umveleli ohambahambayo onentsapho wayechitha iveki etyelela ibandla elithile aze kwelandelayo abe sekhaya kunye nomfazi nabantwana bakhe. Noko ke, xa uEmmas ehamba, wayesoloko eqiniseka ukuba ndiqhuba isifundo sethu seBhayibhile sentsapho. Sasizama ukusenza sibe mnandi isifundo sabantwana bethu. Yaye sasithetha siqinisekile ngothando lwethu ngoYehova nangenyaniso ekwiLizwi lakhe, yaye sasishumayela kunye njengentsapho. Olu cwangciso loqeqesho lokomoya, lomeleza ukholo lwabantwana bethu lwaza lwabenza balungela intshutshiso esasiza kujamelana nayo.

Ukuqalisa Kwentshutshiso Yonqulo

Ngowe-1964, iMalawi yaba lilizwe elizimeleyo. Xa amagosa ombutho olawulayo afumanisa ukuba asibi nanxaxheba kwezobupolitika, azama ukusinyanzela ukuba sithenge amakhadi okuba lilungu lalo mbutho.a Ngenxa yokuba mna noEmmas singazange sivume, amalungu oMbutho Wolutsha atshabalalisa amasimi ethu ombona—okona kutya kwethu okusisiseko konyaka olandelayo. Ngoxa amalungu oMbutho Wolutsha ayegawula loo mbona, ayecula esithi: “Bonke abangafuni kuthenga ikhadi likaKamuzu [uMongameli Banda], iintubi ziya kutya umbona wabo oluhlaza yaye aba bantu baza kuwulilela.” Sekunjalo, phezu kwako nje ukungabi nakutya, asizange siphelelwe lithemba. Sayibona indlela uYehova asinyamekela ngayo. Ngothando wasomeleza.—Filipi 4:12, 13.

Ngobunye ubusuku bangoAgasti 1964, ndandisele ndedwa nabantwana. Sasilele, kodwa ndavuswa yintsholo yengoma eyayisitsho mgama. YayingamaGulewamkulu, iqela eloyikwayo elihamba lixhentsa, lihlasela abantu lize lizenze ngathi yimimoya yezinyanya. UMbutho Wolutsha wawuthumele amaGulewamkulu ukuba aze kusihlasela. Ngokukhawuleza ndavusa abantwana, yaye ngaphambi kokuba aba bahlaseli bafike ekhayeni lethu, sabalekela ehlathini.

Sisazimele apho, sabona isithatha esikhulu somlilo. AmaGulewamkulu ayeyintumeke ngomlilo indlu yethu efulelwe ngengca. Yatsha yaphela, kunye nezinto zethu zonke. Njengoko aba bahlaseli behamba kwingqushu engamabhodlo yendlu yethu etshileyo, sabeva besithi, “Silenzele umlilo omnandi ukuze lothe ela Ngqina.” Sambulela gqitha uYehova kuba sisindile! Liyinyaniso elokuba, batshabalalisa zonke izinto zethu, kodwa abazange bakutshabalalise ukuzimisela kwethu ukukholosa ngoYehova kunabantu.—INdumiso 118:8.

Seva ukuba amaGulewamkulu ayenze le nkohlakalo nakwezinye iintsapho ezintlanu zamaNgqina kaYehova ezikule ngingqi yethu. Hayi indlela esaba novuyo nombulelo ngayo xa abazalwana abasuka kumabandla akufuphi beza kusinceda! Baphinda basakhela izindlu zethu baza basinika ukutya okwakuya kusigcina iiveki eziliqela.

Intshutshiso Iba Qatha

NgoSeptemba 1967 lavakala kweli lizwe liphela iphulo lokuba kuqokelelwe onke amaNgqina kaYehova. Ukuze basifumane, abafana abangenanceba nabavath’ iqaqa—amalungu oMbutho Wolutsha neeYoung Pioneers zaseMalawi, axhobe ngeesabile—bagqogqa amaNgqina kwikhaya ngalinye. Xa bewafumana, aba bafana babewathengisela amakhadi ombutho wezobupolitika.

Ekufikeni kwabo ekhayeni lethu, basibuza enoba sinalo na ikhadi. Ndathi: “Hayi, andilithenganga. Yaye andizi kulithenga ngoku, yaye ndingasoze ndilithenge nakwixa elizayo.” Bandula ke basibamba mna nomyeni wam baza basisa kwisikhululo samapolisa sasekuhlaleni, asizange sikwazi nokuthabatha nento le. Xa abantwana bethu abancinane bebuya esikolweni, bafika singekho, yaye baxhalaba gqitha. Okuvuyisayo kukuba, unyana wethu omdala, uDaniel, wafika ezinyaweni zethu waza weva ngommelwane okwenzekileyo. Ngokukhawuleza, wathabatha abantakwabo abancinane baya kwisikhululo samapolisa. Bafika kanye xa amapolisa ayesikhwelisa kwiilori esisa eLilongwe. Abantwana nabo bahamba.

ELilongwe kwamiswa inkundla engekho mthethweni kwisikhululo samapolisa. Amapolisa asibuza, “Ngaba niza kuqhubeka ningamaNgqina kaYehova?” Sathi, “Ewe!” nangona sasisazi ukuba le mpendulo ithetha ukugwetywa iminyaka esixhenxe entolongweni. Kwabo “bakhokela” intlangano, isigwebo sasiyiminyaka eli-14.

Emva kokuba silele singatyanga yaye singaphumlanga, amapolisa asisa kwiNtolongo yaseMaula. Apho izisele zazizele zimi ngeembambo kangangokuba asizange sifumane nendawo le yokulala phantsi! Indlu yangasese yayilibhakethe elinye kwisisele ngasinye esizeleyo. Sasifumana ukutya okuncinane nokungaphekwanga kakuhle. Emva kweeveki ezimbini, amagosa entolongo aqonda ukuba singabantu abanoxolo yaye asivumela ukuba sihambe ngaphandle eyadini yentolongo. Ekubeni sasidibana sibe baninzi, suku ngalunye sasifumana amathuba okukhuthazana nokushumayela kwamanye amabanjwa. Samangaliswa kukuba, emva kokuhlala iinyanga ezintathu entolongweni, sakhululwa ngenxa yokungenelela kwamanye amazwe egxeka urhulumente waseMalawi.

Amapolisa asibongoza ukuba sibuyele emakhayeni ethu, kodwa asixelela nokuba amaNgqina kaYehova avalw’ umlomo eMalawi. Avalw’ umlomo ukususela ngo-Oktobha 20, 1967, ukusa kuAgasti 12, 1993—phantse iminyaka engama-26. Leyo yayiyiminyaka enzima, sekunjalo ngoncedo lukaYehova sakwazi ukuhlala singathabathi cala kwezobupolitika.

Ukuzingelwa Njengeenyamakazi

Ngo-Oktobha 1972, umthetho karhulumente wabangela ukuba siphinde sitshutshiswe ngogonyamelo. Lo mthetho wawusithi onke amaNgqina kaYehova ayefanele agxothwe kwimisebenzi yawo yengqesho yaye onke amaNgqina ahlala kwiidolophana ayefanele agxothwe ezindlwini zawo. AmaNgqina ayezingelwa njengeenyamakazi.

Ngelo xesha, umzalwana oselula ongumKristu weza ekhayeni lethu ephathele uEmmas umyalezo ongxamisekileyo othi, ‘UMbutho Wolutsha uceba ukukunqumla intloko, uyixhome esibondeni uze uyise kwiinkosi zasekuhlaleni.’ Engaphozisanga maseko uEmmas wasaba, kodwa emva kokuba enze amalungiselelo okuba simlandele kamsinya kangangoko kunokwenzeka. Ngokukhawuleza, ndabalekisa abantwana. Kwandula ke, kanye xa ndiza kuhamba, kwathi gqi amalungu alishumi oMbutho Wolutsha, efuna uEmmas. Angena endlwini yethu kodwa afumanisa ukuba uEmmas sele ebalekile. Enomsindo, la madoda andirhuqela kumasimi ommoba akufuphi, apho andikhaba aza andibetha ngeendiza zommoba. Andula ke andishiya ecinga ukuba ndifile. Emva kokubuyela ezingqondweni, ndakhasa ndibuyela endlwini.

Ngobo busuku, uEmmas wabeka ubomi bakhe esichengeni ngokubuyela endlwini eze kundikhangela. Xa wafika ndibethwe ndaboko-boko, uEmmas nomhlobo wakhe owayenemoto bandifunqula ngononophelo bandikhwelisa kuyo. Sandula ke saya kwikhaya lomzalwana waseLilongwe, apho ndachachela khona waza uEmmas waqalisa amalungiselelo okubhaca kweli lizwe.

Iimbacu Ezingenandawo Yokusabela

Intombi yethu uDinesi nomyeni wakhe babenelori enkulu. Baqesha umqhubi owayesakuba yiYoung Pioneer yaseMalawi kodwa owaba nosizi yimeko yethu. Ngokuzithandela wasinceda thina kunye namanye amaNgqina. Ngeengokuhlwa ezahlukahlukeneyo lo mqhubi waqokelela amaNgqina kwiindawo awayezinyeliswe kuzo. Wandula ke wanxiba impahla yakhe yeeYoung Pioneers zaseMalawi waza eqhuba loo lori izeleyo wadlula kwiindlela eziliqela ezazivalwe ngamapolisa. Wabeka ubomi bakhe esichengeni ukuze ancede amaNgqina amaninzi anqumle umda aye eZambia.

Emva kweenyanga ezithile, amagosa aseZambia asibuyisela eMalawi; sekunjalo, asizange sibuyele kwidolophana esasihlala kuyo. Zonke izinto zethu esasizishiyile zazibiwe. Kwakususwe nophahla lwamazinki lwendlu yethu. Kungekho ndawo ikhuselekileyo esinokuya kuyo, sabalekela eMozambique saza sahlala kwinkampu yeembacu yaseMlangeni iminyaka emibini enesiqingatha. Noko ke, ngoJuni 1975, urhulumente omtsha waseMozambique wayivala loo nkampu waza wasinyanzela ukuba sibuyele eMalawi, apho iimeko zazingekaguquki kubantu bakaYehova. Kwanyanzeleka ukuba sibalekele eZambia okwesihlandlo sesibini. Apho safikela kwinkampu yeembacu yaseChigumukire.

Emva kweenyanga ezimbini kwemisa umkrozo weebhasi neelori zasemkhosini ecaleni kwendlela, yaye inkitha yamajoni aseZambia axhobe af’ amacala yangena ngenkani kule nkampu. Asixelela ukuba sakhelwe izindlu ezintle yaye aza kusinceda asise apho. Sasiqonda ukuba oku akuyonyaniso. Aqalisa ukutyhalela abantu kwiilori nakwiibhasi, yaye kwaba sisiphithiphithi nje. Adubula emoyeni, yaye abazalwana noodade abaninzi bathi saa ngenxa yoloyiko.

Kwesi siphithiphithi, ngengozi uEmmas wagilwa wawa waza wanyathelwa, kodwa omnye umzalwana wamnceda wamphakamisa. Sasicinga ukuba oku yayikukuqalisa kwembandezelo enkulu. Zonke iimbacu zabaleka zibuyela eMalawi. Ngoxa sasiseseZambia, safika emlanjeni, yaye abazalwana babambana ukuze bancede wonk’ umntu anqumle ngokukhuselekileyo. Noko ke, ngaphesheya komlambo, sarhangqwa ngamajoni aseZambia saza sabuyiselwa ngenkani eMalawi.

Sakuba siphinde sabuyela eMalawi, sasingazi apho masiye khona. Safumanisa ukuba kwiintlanganiso zobupolitika nakumaphephandaba, abantu balunyukiswa ukuba bajonge “ubuso obutsha” obufika kwiidolophana zabo, kubhekiselwa kumaNgqina kaYehova. Ngoko ke sagqiba kwelokuba siye kwikomkhulu lale dolophu, apho sasingayi kuphawula njengokuba kwakuya kuba njalo kwidolophana. Sakwazi ukuqesha indlu encinane, yaye uEmmas waphinda waqalisa ukutyelela amabandla ngokufihlakeleyo njengomveleli ohambahambayo.

Ukuya Kwiintlanganiso Zebandla

Yintoni esincede sahlala sithembekile? Ziintlanganiso zebandla! Kwiinkampu zeembacu zaseMozambique naseZambia, sasisiya ngokukhululekileyo kwiintlanganiso ezaziqhutyelwa kwiiHolo zoBukumkani ezifulelwe ngengca. Ukuhlanganisana kwiintlanganiso eMalawi kwakuyingozi yaye kunzima—sekunjalo wawungenakuzisola. Ukuze singabonwa, iintlanganiso zazidla ngokuqhutywa ezinzulwini zobusuku kwiindawo ezifihlakeleyo. Siphepha ukutsal’ amehlo kwiindibano zethu, sasingaziqhwabi izandla xa sibulela isithethi kodwa sasizihlikihla.

Kwakubhaptizwa ezinzulwini zobusuku. Unyana wethu uAbiyudi wabhaptizwa kwisihlandlo esinjalo. Emva kwentetho yobhaptizo, yena nabanye ababeza kubhaptizwa, ebumnyameni basiwa kwindawo engumgxobhozo apho kwakombiwe umngxuma ongekho nzulu. Babhaptizelwa apho.

Ikhaya Lethu Elincinane Liyindawo Yokugcina Izinto

Ebudeni beminyaka yamva yokuvalw’ umlomo ngurhulumente, ikhaya lethu eliseLilongwe lalisetyenziswa njengendawo yokothula iincwadi. Iileta neencwadi ezivela kwiofisi yesebe laseZambia zazothulwa ekhayeni lethu ngokufihlakeleyo. Abazalwana ababethutha iincwadi ngeebhayisekile babesiza ekhayeni lethu ukuza kuthabatha iileta neencwadi ezivela eZambia baze bazise kuwo wonke ummandla waseMalawi. Amaphephancwadi IMboniselo awayesasazwa ayemancinane kuba ayeshicilelwa kwiphepha leBhayibhile. Oku kwakusenza abo babethutha iincwadi bathabathe amaphephancwadi aphindwe kabini, inani ababengenakukwazi ukulithabatha ukuba ebeshicilelwa kumaphepha aqhelekileyo. Kwakhona abo babethutha iincwadi babenawo namaphephancwadi amancinane eMboniselo, awayenamanqaku afundisiswayo kuphela. Kwakulula ukulifihla kwipokotho yehempe eli phephancwadi, kuba laliliphepha nje elinye.

Aba bathutha iincwadi babeka esichengeni inkululeko nobomi babo xa babehamba ngeebhayisekile emahlathini, maxa wambi ezinzulwini zobusuku, neebhokisi ezineencwadi ezingekho mthethweni. Phezu kwako nje ukuvalwa kweendlela ngamapolisa nezinye iingozi, bahamba iikhilomitha ezininzi kwimozulu eyahlukahlukeneyo ukuze baphathele abazalwana babo ukutya kokomoya. Hayi indlela ababekhaliphe ngayo abo babethutha iincwadi nesibathandayo!

UYehova Unyamekela Abahlolokazi

NgoDisemba 1992, ngoxa wayenikela intetho ebudeni botyelelo, uEmmas wahlaselwa sistroke. Emva koko, akazange akwazi ukuthetha. Kamva wahlaselwa sistroke sesibini, esamshiya efe icala. Nangona kwakungelula kuye ukujamelana nempilo yakhe enkenenkene, ukuxhaswa ngothando libandla lethu kwayinciphisa inkxwaleko endandikuyo. Ndakwazi ukumnyamekela umyeni wam de wafa ngoNovemba 1994, eneminyaka engama-76 ubudala. Sasineminyaka engama-57 sitshatile, yaye umsebenzi wavulwa ngaphambi kokuba uEmmas afe. Kodwa sekunjalo ndisebuhlungu kukulahlekelwa liqabane lam elithembekileyo.

Emva kokuba ndingumhlolokazi, umkhwenyana wam wakwenza umthwalo wakhe ukunyamekela kungekhona umfazi nabantwana bakhe abahlanu kuphela, kodwa nam. Okubuhlungu kukuba, emva kokugula ithutyana, wafa ngoAgasti 2000. Intombi yam yayiza kukufumana njani ukutya nendawo esinokuhlala kuyo? Kwakhona ndabona ukuba uYehova uyasinyamekela yaye ngokwenene ‘unguyise wamakhwenkwe angenayise nomgwebi wabahlolokazi.’ (INdumiso 68:5) UYehova, esebenzisa abakhonzi bakhe basemhlabeni, wasinika indlu entle nentsha. Kwenzeka njani oko? Xa abazalwana noodade ebandleni lethu babona imeko yethu elusizi, basakhela indlu ngeeveki nje ezintlanu! Abazalwana bamanye amabandla ababengabakhi beza kuncedisa. Uthando nobubele obabonakaliswa ngala maNgqina basimangalisa kuba indlu abasakhela yona yayintle ngaphezu kwezindlu uninzi lwawo oluhlala kuzo. Oku kubonakaliswa kothando libandla lethu kwanikela ubungqina obuhle kwindawo esihlala kuyo. Xa ndisiya kulala ebusuku, ndiziva ngathi ndiseParadesi! Ewe, indlu yethu entsha nentle yenziwe ngezitena nodaka, kodwa njengoko abaninzi besitsho, yindlu ngokwenene eyenziwe ngothando.—Galati 6:10.

UYehova Uqhubeka Esinyamekela

Nangona maxa wambi bendiziva ndidandatheke ngokupheleleyo, uYehova ebendixhasa. Abantwana bam abasixhenxe kwabasithoba basaphila, yaye ngoku intsapho yam inamalungu ali-123. Hayi umbulelo endinawo ngokubona inkoliso yabo ikhonza uYehova ngokuthembeka!

Ngoku ndineminyaka engama-82 ubudala, yaye kundivuyisa gqitha ukubona oko kwenziwe ngumoya kaThixo eMalawi. Kule minyaka mine idluleyo kuphela, ndiye ndabona ulwando lweeHolo zoBukumkani zisusela kwenye ukusa kwezingaphezu kwama-600. Kwakhona ngoku sineofisi yesebe entsha eLilongwe, yaye sivuyiswa kukuba nokutya kokomoya okusomelezayo esikufumana ngokukhululekileyo. Ngokwenene ndivakalelwa kukuba ndiye ndakubona ukuzaliseka kwesiprofeto sikaThixo esikuIsaya 54:17, apho sifumana esi siqinisekiso: “Nasiphi na isixhobo esiya kuyilwa nxamnye nawe asiyi kuphumelela.” Emva kokukhonza uYehova ngaphezu kweminyaka engama-50, ndiqinisekile ukuba naziphi na iimvavanyo esinokujamelana nazo, uYehova usoloko esikhathalele.

[Umbhalo osemazantsi]

[Umfanekiso okwiphepha 24]

Umyeni wam, uEmmas, wabhaptizwa ngoAprili 1951

[Umfanekiso okwiphepha 26]

Iqela elinenkalipho labo bathutha iincwadi

[Umfanekiso okwiphepha 28]

Indlu eyakhiwe ngothando