Amalungisa Aya Kudumisa UThixo Ngonaphakade

“Olilungisa uya kukhunjulwa . . . Ubulungisa bakhe bumi ngonaphakade.”—INDU. 112:6, 9.

1. (a) Abo bangamalungisa emehlweni kaThixo balindelwe liliphi ikamva eliqaqambileyo? (b) Kuphakama wuphi umbuzo?

LONKE uluntu olungamalungisa emehlweni kaThixo lulindelwe likamva elimangalisayo. Luya kukuvuyela ngonaphakade ukufunda okungakumbi ngeempawu ezimangalisayo zikaYehova. Lumdumisa ngakumbi njengoko lufunda okungakumbi ngemisebenzi yakhe yokudala. Enye yezona mfaneleko ziphambili ukuze lufumane elo kamva lizukileyo ‘bubulungisa,’ obugxininiswa kwiNdumiso 112. Kodwa kunokwenzeka njani ukuba uThixo ongcwele nolilungisa, uYehova, agqale abantu abanesono njengamalungisa? Kaloku, enoba sizama kangakanani na ukwenza okulungileyo, siyazenza iimpazamo, yaye ezinye zazo zinzulu.—Roma 3:23; Yak. 3:2.

2. Yiyiphi imimangaliso emibini eyenziwa nguYehova ngenxa yothando?

² Ngenxa yothando lwakhe uYehova uye walungiselela isicombululo esifanelekileyo kule meko. Ukwenze njani oko? Waqala ngokwenza ummangaliso wokuthumela ubomi boNyana wakhe amthandayo wasezulwini kwisibeleko sentombi enyulu ukuze azalwe engumntu ofezekileyo. (Luka 1:30-35) Kwathi emva kokuba uYesu ebulewe ziintshaba zakhe, uYehova wenza omnye ummangaliso. UThixo wamvusa uYesu njengesidalwa somoya esizukileyo.—1 Pet. 3:18.

3. Kwakutheni ukuze uThixo anike uNyana wakhe umvuzo wobomi basezulwini ngentliziyo emhlophe?

³ UYehova wamnika umvuzo uYesu ngokuthi amphe into awayengenayo lo Nyana wakhe ngaphambi kokuba eze emhlabeni—ubomi obungenakonakala ezulwini. (Heb. 7:15-17, 28) UYehova wakwenza ngentliziyo emhlophe oku, kuba uYesu wayegcine ingqibelelo yakhe ngendlela egqibeleleyo nakuba wayevavanywa. Ngokwenjenjalo uYesu wanika uYise eyona mpendulo igqibeleleyo kubuxoki bukaSathana bokuba abantu bakhonza uThixo kuba befuna okuthile kuye, kungekhona ngenxa yothando olungagungqiyo.—IMize. 27:11.

4. (a) UYesu wasenzela ntoni esakubuyela ezulwini, ibe wasabela njani uYehova? (b) Wena uvakalelwa njani koko uYehova noYesu bakwenzele kona?

⁴ Kuninzi okwenziwa nguYesu ezulwini. ‘Wabonakala phambi kukaThixo ngenkqu ngenxa yethu’ enexabiso ‘legazi lakhe.’ UBawo wethu wasezulwini onothando wathi walamkela ngobubele idini likaYesu elixabisekileyo ‘njengombingelelo wokucamagushela izono zethu.’ Ngenxa yoko, ‘sinokunikela inkonzo engcwele kuThixo ophilayo,’ ‘sinezazela ezihlambulukileyo.’ Eso sisizathu esivakala ngokwaneleyo sokuvumelana nengabula-zigcawu yeNdumiso 112 ethi, “Dumisani uYa”!—Heb. 9:12-14, 24; 1 Yoh. 2:2.

5. (a) Yintoni esimele siyenze ukuze sihlale singamalungisa emehlweni kaThixo? (b) Ibhalwe ngayiphi indlela INdumiso ye-111 neye-112?

⁵ Ukuze sihlale singamalungisa emehlweni kaThixo, simele siqhubeke sibonisa ukholo kwigazi elaphalalayo likaYesu. Akumele kudlule nosuku olunye singambulelanga uYehova ngokusithanda kangaka. (Yoh. 3:16) Kanti sifanele siqhubeke sifunda iLizwi likaThixo size senze unako nako wokuphila ngokuvisisana noko kubhalwe kulo. INdumiso 112 inecebiso elihle kubo bonke abo bafuna ukuhlala benezazela ezicocekileyo phambi kukaThixo. Le Ndumiso iyavisisana naleyo ye-111. Zombini zivula ngamazwi athi “Dumisani uYa!” okanye “Haleluya!” kuze kulandele imiqolo engama-22, ngamnye kuwo uqala ngomnye woonobumba abangama-22 besiHebhere.a

Isiseko Solonwabo

6. Usikelelwa njani “umntu” owoyika uThixo ekuthethwe ngaye kwiNdumiso 112?

⁶ “Unoyolo umntu owoyika uYehova, oyoliswa kakhulu yimiyalelo yakhe. Inzala yakhe iya kuba namandla emhlabeni. Sona isizukulwana sabathe tye, siya kusikelelwa.” (INdu. 112:1, 2) Phawula ukuba umdumisi uqala athethe ‘ngomntu’ aze ke atshintshele kubantu abaninzi ngokusebenzisa ibinzana elithi ‘abathe tye’ ngasekupheleni kwendinyana 2. Loo nto ibonisa ukuba INdumiso 112 inokubhekisela kwiqela labantu. Kubangela umdla ukuba, umpostile uPawulos abe waphefumlelwa ukuba asebenzise INdumiso 112:9 xa wayethetha ngamaKristu enkulungwane yokuqala. (Funda eyesi-2 kwabaseKorinte 9:8, 9.) Le ndumiso iyibonisa ngokucace gca indlela abalandeli bakaKristu emhlabeni namhlanje abanokonwaba ngayo!

7. Kutheni abakhonzi bakaThixo bemele bamoyike ngendlela efanelekileyo yaye wena umele uvakalelwe njani ngemiyalelo kaThixo?

⁷ Njengoko kuboniswe kwiNdumiso 112:1, la maKristu okwenyaniso onwaba gqitha njengoko ‘esoyika uYehova.’ Olu loyiko lufanelekileyo lokungamkholisi luwanceda ukuba axhathise umoya wehlabathi likaSathana. ‘Ayoliswa kakhulu’ kukufundisisa iLizwi likaThixo nokuthobela imiyalelo yakhe. Oko kuquka umyalelo wokushumayela iindaba ezilungileyo zoBukumkani emhlabeni wonke. Enza unako nako wokwenza abafundi abantu beentlanga zonke ngoxa elumkisa abangendawo ngemini yomgwebo kaThixo ezayo.—Hez. 3:17, 18; Mat. 28:19, 20.

8. (a) Abantu bakaThixo abazinikeleyo namhlanje baye bafumana wuphi umvuzo ngenzondelelo yabo? (b) Abo banethemba lokuphila emhlabeni balindelwe liliphi ithemba kwixa elizayo?

⁸ Ngenxa yokuthobela loo miyalelo, abakhonzi bakaThixo emhlabeni namhlanje bamalunga nezigidi ezisixhenxe. Ngubani onokuyikhanyela into yokuba abantu bakhe namhlanje baye ‘banamandla emhlabeni?’ (Yoh. 10:16; ISityhi. 7:9, 14) Kanti baya ‘kusikelelwa’ ngokwenene xa uThixo ephumeza injongo yakhe! Njengeqela, abo banethemba lokuphila emhlabeni baya kulondolozwa ukutyhubela ‘imbandezelo enkulu’ baze babumbe ‘umhlaba omtsha’ oya kuba ‘nobulungisa.’ Ekuhambeni kwexesha abo basinde kwiArmagedon ‘baya kusikelelwa’ nangakumbi. Baya kuba belungele ukwamkela izigidi ngezigidi zabo bavusiweyo. Elo lithemba elibangela imincili ngokwenene! Ekugqibeleni, abo ‘bayoliswa kakhulu’ yimiyalelo kaThixo baya kufikelela ekufezekeni baze ngonaphakade banandiphe ‘inkululeko ezukileyo yabantwana bakaThixo.’—2 Pet. 3:13; Roma 8:21.

Ukubusebenzisa Ngobulumko Ubutyebi

9, 10. AmaKristu okwenyaniso aye abusebenzisa njani ubutyebi bawo bokomoya yaye ubulungisa bawo buya kuma njani ngonaphakade?

⁹ “Izinto zexabiso nobutyebi zisendlwini yakhe; nobulungisa bakhe bumi ngonaphakade. Ukhazimla ebumnyameni njengokhanyiso lwabathe tye. Unobabalo nenceba nobulungisa.” (INdu. 112:3, 4) Ngamaxesha okubhalwa kweBhayibhile, abanye abakhonzi bakaThixo babesaziwa ngokuba nobutyebi bezinto eziphathekayo. Yaye ngenye ingcamango, abo akholiswayo ngabo uThixo baba nobutyebi, enoba asibubo obezinto eziphathekayo. Enyanisweni, uninzi lwabo bakhetha ukuzithoba kuThixo banokuba ngamahlwempu baze bajongelwe phantsi kanye njengokuba kwakunjalo ngomhla kaYesu. (Luka 4:18; 7:22; Yoh. 7:49) Kodwa enoba umntu unezinto eziphathekayo ezingakanani na, unokuba siso isityebi sokomoya.—Mat. 6:20; 1 Tim. 6:18, 19; funda uYakobi 2:5.

¹⁰ AmaKristu athanjisiweyo kwakunye namaqabane awo, akabugcini kuwo ubutyebi bokomoya. Kunoko aye ‘akhazimla’ kwihlabathi elimnyama likaSathana “njengokhanyiso lwabathe tye.” Akwenza oko ngokunceda abanye bangenelwe kubuncwane bokomoya bobulumko nokwazi uThixo. Abachasi baye bazama ukuthintela umsebenzi wokushumayela ngoBukumkani kodwa basilele. Kodwa, iziqhamo zalo msebenzi wobulungisa ziya ‘kuma ngonaphakade.’ Ngokunyamezela kwikhondo lobulungisa, abakhonzi bakaThixo banokuqiniseka ukuba baya kuphila baze ‘beme ngonaphakade.’

11, 12. Ziziphi ezinye iindlela abaye abantu bakaThixo bazisebenzisa ngazo izinto eziphathekayo abanazo?

¹¹ Abantu bakaThixo, udidi lwekhoboka oluthanjisiweyo nabo babumba “isihlwele esikhulu” baye bazingqina benesisa ngezinto eziphathekayo. INdumiso 112:9 ithi: “Wabe ngokubanzi; wanika amahlwempu.” Namhlanje amaKristu okwenyaniso aye anikela ngezinto eziphathekayo kwamanye amaKristu kwanakubamelwane abasweleyo. Kanti asebenzisa izinto zawo eziphathekayo ukuze axhase amaphulo okunceda ngexesha leentlekele. Kanye njengokuba uYesu wayetshilo, oko kubangela ulonwabo.—Funda iZenzo 20:35; neyesi-2 kwabaseKorinte 9:7.

¹² Ukongezelela, cinga nje ngemali esetyenziselwa ukupapasha eli phephancwadi ngeelwimi ezili-172, uninzi lwazo oluthethwa ngabantu abangamahlwempu. Kanti cinga nangesibakala sokuba kwaeli phephancwadi lifumaneka ngeentetho zezandla ezahlukahlukeneyo ukuze kuncedwe abo bangevayo, kwanangeBraille, ukuze zifundwe nangabo bangaboniyo.

Unobabalo Yaye Uthanda Okusesikweni

13. Ngoobani abayimizekelo ebalaseleyo yokupha ngobabalo, yaye sinokubaxelisa njani?

¹³ “Ulungile umntu obabalayo, abolekise.” (INdu. 112:5) Mhlawumbi ukhe waphawula ukuba abantu abanceda abanye abasoloko benobabalo. Abanye bapha ukuze baqhayise kanti kwabanye ziphuma kabuhlungu izinto abazipha abanye. Akumnandanga ukuncedwa ngumntu okwenza uzive uphantsi okanye okwenza uzive uluxanduva. Ngokwahlukileyo koko kuhlaziya ngokwenene ukuncedwa ngumntu onobabalo. UYehova ungumzekelo ohamba wodwa woMphi onobabalo nowonwabileyo. (1 Tim. 1:11; Yak. 1:5, 17) UYesu Kristu wawubonisa ngendlela egqibeleleyo umzekelo kaYise wobabalo. (Marko 1:40-42) Ngenxa yoko, ukuze asigqale njengamalungisa uThixo, simele siphe ngokuchwayita nangobabalo, ingakumbi kwinkonzo yasentsimini xa sinceda abamelwane bethu ngokomoya.

14. Ziziphi ezinye iindlela ‘esinokuxhasa ngazo imicimbi yethu ngokusesikweni’?

¹⁴ “Uxhasa imicimbi yakhe ngokusesikweni.” (INdu. 112:5) Njengoko kwaprofetwayo, udidi lwegosa elithembekileyo lunyamekela izinto zeNkosi yalo ngokuvisisana nokusesikweni kukaYehova. (Funda uLuka 12:42-44.) Oku kubonakala kukhokelo lweZibhalo olunikwa abadala, abaye maxa wambi baxoxe amatyala ezono ezinzulu emabandleni. Indlela esesikweni yokusingatha imiba ethile ibonakala nakulwalathiso olusekelwe eBhayibhileni olunikelwa ludidi lwekhoboka ngendlela amabandla, amakhaya abathunywa bevangeli kwakunye namakhaya aseBheteli afanele asebenze ngayo. Okusesikweni akufuneki kubadala nje kuphela kodwa nakwamanye amaKristu xa esebenzisana namanye kwakunye nabo bangakholwayo kwanakwimiba yezoshishino.—Funda uMika 6:8, 11.

Iintsikelelo Zabo Bangamalungisa

15, 16. (a) Iindaba ezimbi ezisehlabathini ziwachaphazela njani amalungisa? (b) Abakhonzi bakaThixo bazimisele ukuqhubeka besenza ntoni?

¹⁵ “Kuba akayi kugungqiswa nangaliphi na ixesha. Olilungisa uya kukhunjulwa ukusa kwixesha elingenammiselo. Akayi koyikiswa ziindaba ezimbi. Intliziyo yakhe iqinile, ithembele ngoYehova. Intliziyo yakhe ayinakushukunyiswa; akayi koyika, de akhangele ezintshabeni zakhe.” (INdu. 112:6-8) Akuzange nanini na ngaphambili kubekho iindaba ezimbi kangaka, kuquka iimfazwe, ubugrogrisi, izifo ezitsha nezo kudala zikho, ulwaphulo-mthetho, ubuhlwempu nongcoliso olonakalisa umhlaba. Abo bangamalungisa emehlweni kaThixo bayachatshazelwa yimiphumo yezi ndaba zimbi, kodwa loo nto ayibenzi baxhaxhe luloyiko. Kunoko, iintliziyo zabo ‘ziqinile’ yaye ‘azinakushukunyiswa’ njengoko bekhangele ngethemba kwixesha elizayo, besazi ukuba ihlabathi elitsha likaThixo lisemnyango. Xa kusibakho iintlekele, bahlangabezana kakuhle naloo meko ngenxa yokuba bathembela kwinkxaso kaYehova. Akaze avumele amalungisa ukuba ‘agungqiswe,’ kodwa uyawanceda aze awanike amandla okunyamezela.—Fil. 4:13.

¹⁶ Abo bangamalungisa emehlweni kaThixo kuye kwafuneka banyamezele intiyo nobuxoki obusasazwa ngabachasi, kodwa oko akusoze kuwathintele amaKristu okwenyaniso ekushumayeleni. Kunoko, abakhonzi bakaThixo baqhubeka beqinile yaye bengenakushukunyiswa kumsebenzi abawunikwe nguYehova, lowo wokushumayela iindaba ezilungileyo zoBukumkani nokwenza bonke abo baphulaphulayo babe ngabafundi. Alithandabuzeki elokuba, amalungisa aya kuchaswa nangakumbi njengoko isiphelo sisondela. Loo ntiyo iya kufikelela encotsheni xa uSathana uMtyholi ebahlasela ehlabathini lonke njengoGogi wakwaMagogi. Kuya kuthi ke, ekugqibeleni ‘sikhangele ezintshabeni zethu’ njengoko zisoyiswa ngokupheleleyo. Kuya kuba ngamava amnandi ngokwenene ukubona igama likaYehova lingcwaliswa ngokupheleleyo!—Hez. 38:18, 22, 23.

‘Ukuphakanyiswa Ngozuko’

17. Ilungisa ‘liya kuphakanyiswa njani ngozuko’?

¹⁷ Kuya kuba myoli ngokwenene ukudumisa uYehova ngomanyano, ngaphandle kokuchaswa nguMtyholi nehlabathi lakhe! Olo yolo luya kuhlala ngonaphakade kubo bonke abo bahlala bengamalungisa emehlweni kaThixo. Abasayi kuze badane ngenxa yokuba boyisiwe, kuba uYehova ukwathembisa ukuba “uphondo” lwalowo ulilungisa “luya kuphakanyiswa ngozuko.” (INdu. 112:9) Abangamalungisa emehlweni kaYehova baya kuvuya xa bebona esoyisa zonke iintshaba zolongamo lwakhe.

18. Aya kuzaliseka njani amazwi okuqukumbela INdumiso 112?

¹⁸ “Ongendawo uya kubona aze ngokuqinisekileyo aqumbe. Uya kutshixiza amazinyo aze okunene anyibilike. Umnqweno wabangendawo uya kutshabalala.” (INdu. 112:10) Kungekudala bonke abaqhubeka bechasa abantu bakaThixo baya ‘kunyibilika’ kumona nentiyo abanayo. Ukunqwenela kwabo ukubona umsebenzi wethu uphela kuya kutshabalala nabo ‘kwimbandezelo enkulu’ ezayo.—Mat. 24:21.

19. Yintoni esinokuqiniseka ngayo?

¹⁹ Ngaba uya kuba phakathi kwabo basindileyo nabaya kuba bechwayitile kolo loyiso? Okanye ke ukuba kuyenzeka usutywe kukufa ngenxa yokugula okanye ukwaluphala ngaphambi kwesiphelo seli hlabathi likaSathana, ngaba uya kuba phakathi ‘kwamalungisa’ aya kuvuswa? (IZe. 24:15) Kunokuba njalo ukuba uqhubeka unokholo kwidini lentlawulelo likaYesu uze uxelise uYehova, njengoko benzile abo bamelwa ‘ngumntu’ olilungisa ekuthethwe ngaye kwiNdumiso 112. (Funda eyabase-Efese 5:1, 2.) UYehova uya kuqiniseka ukuba bahlala bekhunjulwa abanjalo, aqiniseke nokuba imisebenzi yabo yobulungisa ayilibaleki. UYehova uya kubakhumbula aze abathande ngonaphakade kanaphakade.—INdu. 112:3, 6, 9.

[Umbhalo osemazantsi]

Imibuzo Yokucamngca

• Ziziphi ezinye izizathu esinazo zokuthi “Haleluya”?

• Yiyiphi inkqubela eyenzeka kule mihla eyenza ukuba amaKristu okwenyaniso onwabe?

• UYehova uthanda umphi onjani?

[Umfanekiso okwiphepha 25]

Ukuze siqhubeke singamalungisa emehlweni kaThixo, kufuneka sibe nokholo kwigazi likaYesu elaphalalayo

[Imifanekiso ekwiphepha 26]

Iminikelo yokuzithandela inokusetyenziselwa umsebenzi wokunceda kwiintlekele nowokusasazwa koncwadi lweBhayibhile