Sondela KuThixo
“Owu Yehova, . . . Uyandazi”
“AYIKHO into ebuhlungu ngathi kukwazi ukuba akukho mntu ukukhathaleleyo okanye okuqondayo.”a Ngaba wakhe wehlelwa yinto enjalo? Ngaba wakha wavakalelwa kukuba akakho umntu okukhathaleleyo okanye oyiqondayo intlungu yakho singasathethi ke ngendlela ovakalelwa ngayo? Ukuba kunjalo unokuthuthuzelwa kukwazi ukuba: UYehova ubakhathalele abanquli bakhe uyayazi yonke into eyenzeka kubo imihla ngemihla. Amazwi kaDavide akwiNdumiso 139 ayasiqinisekisa ngale nyaniso.
Eqinisekile ukuba uThixo wayenomdla kuye uDavide uthi: “Owu Yehova, undigocagocile, yaye uyandazi.” (Vesi 1) Apha uDavide usebenzisa amagama akwenza ube nomfanekiso ngqondweni. Isenzi sesiHebhere esiguqulelwe ngokuthi “undigocagocile” sinokusetyenziswa xa kusembiwa ilitye elinqabileyo (Yobhi 28:3) xa kuhlolwa ilizwe (ABagwebi 18:2), okanye xa kuthethwa ityala. (Duteronomi 13:14). Ewe, uYehova usazi kakuhle ngokungathi ebephendla ubomi bethu. Ngokusebenzisa isimelabizo esithi “mna,” uDavide usifundisa ukuba uThixo unomdla kubakhonzi bakhe. Uyabacikida kwaye wazi ngamnye wabo.
UDavide uyanaba ekucokiseni kukaThixo, esithi: “Wena uyakwazi ukuhlala kwam nokuvuka kwam. Uziqwalasele iingcamango zam ukude.” (Vesi 2) Enyanisweni uYehova “ukude,” uhlala ezulwini. Sekunjalo, uyazi ukuba sihleli nini phantsi, mhlawumbi emva kosuku olude naxa sivuka kusasa sisenza imisebenzi yethu. Uyazazi iingcinga, iminqweno neenjongo zethu. Ngaba uDavide uyoyikiswa kukucikidwa ngaloo ndlela? Ngokwahlukileyo koko, uya kuvuyela. (Vesi 23, 24) Kutheni ekuvuyela?
UDavide uyazi ukuba ukuhlolwa nguYehova kunemiphumo emihle kubanquli bakhe. UDavide ubhekisela koku kuhlolwa ngokubhala athi: “Ukuhamba kwam nokulala kwam ndinabile ukulinganisile, kwaye uye waqhelana nazo zonke iindlela zam.” (Vesi 3) Suku ngalunye uYehova ubona ‘zonke iindlela zethu,’ iimpazamo nemisebenzi yethu emihle. Ngaba wondela izinto ezimbi okanye ezintle? Igama lesiHebhere eliguqulelwe ngokuthi ‘ukulinganisa’ linokuthetha “ukuhluza” okanye “ukwela,” kanye njengaxa umlimi esela inkozo kumququ. Ibinzana elithi “waqhelana” liguqulelwe ngokusuka kwigama lesiHebhere elinokuthetha “ukuxabisa.” Xa ehlola izinto ezithethwa nezenziwa ngabakhonzi bakhe yonke imihla, uYehova uyazixabisa izinto ezilungileyo. Kutheni? Uyayixabisa imigudu yabo yokumkholisa.
INdumiso 139 ifundisa ukuba uYehova ubakhathalele ngokwenene abanquli bakhe. Uyabagocagoca aze abalinde njengoko besenza imisebenzi yabo suku ngalunye. Uyazazi iingxaki zabo kwaye uyazazi iintlungu abakuzo ngenxa yezi ngxaki. Ngaba awufuni ukunqula uThixo onjalo? Ukuba kunjalo, unokuqiniseka ukuba: UYehova akasayi kuze ‘awulibale umsebenzi wenu nothando enalubonisayo ngegama lakhe.’—Hebhere 6:10.
Izibhalo onokuzifunda ngoSeptemba
[Umbhalo osemazantsi]
a Kucatshulwe kuArthur H. Stainback.