“Mna Andiyi Kukulibala”

NGABA ngokwenene uYehova ubakhathalele abantu bakhe? Ukuba kunjalo, ubakhathalele kangakanani? Inye kuphela indlela yokufumana iimpendulo zale mibuzo—kukutyhilelwa nguThixo ngokwakhe. UThixo uzityhila eBhayibhileni iimvakalelo zakhe. Khawuhlalutye la mazwi akuIsaya 49:15.

Ukuze abonise iimvakalelo ezinzulu anazo ngabantu bakhe, uYehova, esebenzisa uIsaya, wenza omnye weyona mizekelo ichukumisayo. Uqala ngokubuza lo mbuzo uxhokonx’ ingcinga: “Umfazi angalulibala na usana lwakhe, angavakalelwa ngonyana wesisu sakhe?” Xa uqala ukuwuva lo mbuzo, ungathi impendulo izicacele. Ngaba angakho umdlezana onokulibala usana lwakhe? Luxhomekeke kuye ubusuku nemini—luyakhala xa lufuna ukuhoywa. Kodwa kukho okungakumbi ngalo mbuzo ubuzwa nguYehova.

Kutheni umama enyamekela zonke iintswelo zomntwana wakhe? Ngaba wenzela nje ukumthuthuzela kuba elila? Akunjalo. Ngokwemvelo umama ‘uyavakalelwa’ okanye uba neemvakalelo “ngonyana wesisu sakhe.” Isenzi sesiHebhere esiguqulelwe ngokuthi “angavakalelwa” sikwaguqulelwa ngokuthi ‘ukuba nenceba.’ (Eksodus 33:19; Isaya 54:10) Eli binzana lesiHebhere linokudlulisela ingcamango yokuba novelwano ngomntu ofuna uncedo. Uvelwano umama abanalo ngosana lwakhe yenye yezona mvakalelo zinamandla.

Okubuhlungu, kukuba asingabo bonke omama abanovelwano ngabantwana babo abasoloko befuna ukunyanyekelwa. UYehova uthi: “Nokuba bona abafazi banokulibala.” Siphila kwihlabathi elinamadoda nabafazi “abanganyanisekanga abangenawo umsa wemvelo.” (2 Timoti 3:1-5) Maxa wambi, sikhe sive ngoomama abaphatha kakubi okanye abalahla iimveku zabo. Enye imbekiselo yeBhayibhile xa igqabaza ngoIsaya 49:15, ithi: “Omama banesono yaye maxa wambi ababinayo inimba. Kwanolona thando lunzulu lomntu lunokusilela.”

“Kodwa” uYehova usiqinisekisa esithi: “mna andiyi kukulibala.” Ngoku siyasibona isizathu sokuba uYehova abuze umbuzo oku Isaya 49:15. Apha akuthelekiswa izinto ezimbini ezingqubanayo. Ngokungafaniyo noomama abangafezekanga, abakhe bangabi nanimba ngeemveku zabo ezingenakuzinceda, uYehova akasoze asilele okanye alibale ukubonisa uvelwano kubanquli bakhe abafuna uncedo. Ngenxa yoko, imbekiselo ekhankanywe ngasentla ithi ngoIsaya 49:15: “Le yenye yezona ndlela, zigqwesileyo ukuba asikuphela kwayo apho kuboniswe uthando lukaThixo kwiTestamente Endala.”

Ngaba akuthuthuzeli ukufunda ‘ngemfesane yoThixo wethu’? (Luka 1:78) Kutheni ungafundi indlela onokusondela ngayo kuYehova? UThixo onothando uqinisekisa abanquli bakhe ngokuthi: “Andiyi kuze ndikushiye, ndingayi kuze ndikutyeshele.”—Hebhere 13:5.

Izibhalo onokuzifunda ngoFebruwari:

◼ Isaya 43-62