Imibuzo Evela Kubafundi
IGunya Lehlabathi LamaNgesi NamaMerika libe lilo nini igunya lehlabathi lesixhenxe elikwisiprofeto seBhayibhile?
▪ Umfanekiso omkhulu wentsimbi owabonwa nguKumkani uNebhukadenetsare, awumeli onke amagunya ehlabathi. (Dan. 2:31-45) Umela kuphela lawo mahlanu ayelawula ukususela ngomhla kaDaniyeli ukuya phambili nalawo aba negalelo elibalulekileyo kubantu bakaThixo.
Indlela uDaniyeli awuchaza ngayo lo mfanekiso wentsimbi idlulisela ingcamango yokuba iGunya Lehlabathi LamaNgesi NamaMerika liya kuvela kwiRoma kunokuba liyoyise. Kulo mfanekiso, uDaniyeli ubona intsimbi esemilenzeni ifikelela ezinyaweni ukuya kutsho ezinzwaneni. (Ezinzwaneni nasezinyaweni, intsimbi ixutywe nodongwe.)a Loo ngcaciso ibonisa ukuba iGunya Lehlabathi LamaNgesi NamaMerika liya kuvela kwimilenze yentsimbi. Imbali iyakungqinela ukuchana kwaloo ngcaciso. IBritani, eyayisakuba yinxalenye yoBukhosi BamaRoma, yaqalisa ukuduma ngasekupheleni kweminyaka yee-1700. Kamva, iUnited States yaba lilizwe elinamandla. Noko ke, igunya lehlabathi lesixhenxe lesiprofeto seBhayibhile lalingekabunjwa. Ngoba? IBritani neUnited States zazingekasebenzi kunye ngendlela ebalulekileyo. Oku kwenzeka ngeMfazwe Yehlabathi I.
Ngelo xesha, ‘oonyana bobukumkani’ babexakekile ingakumbi eUnited States, ikomkhulu lawo lehlabathi eliseBrooklyn, eNew York. (Mat. 13:36-43) Amalungu odidi lwabathanjiswa ayeshumayela ngokuzimisela kumazwe alawulwa buBukhosi baseBritani. Ebudeni beMfazwe Yehlabathi I, igunya laseBritani nelaseMerika lalibumba ubudlelane obukhethekileyo xa lisilwa neentshaba zalo zobupolitika. Kanti, ngenxa yokwanda komoya wobuzwe owabangelwa yimfazwe, abonisa ubutshaba kwabo babeyinxalenye yembewu ‘yomfazi’ kaThixo, evala ukupapashwa kweencwadi zabo yaye evalela entolongweni abo babekhokela umsebenzi wokushumayela.—ISityhi. 12:17.
Ngokuvisisana nesi siprofeto seBhayibhile, igunya lehlabathi lesixhenxe alizange limiselwe ngasekupheleni kweminyaka yee-1700 ukuqala kokuduma kweBritani. Kodwa, lafumana isikhundla salo ekuqaleni kwemini yeNkosi.b
[Imibhalo esemazantsi]
a Udongwe oluxutywe nentsimbi lumela iinxalenye eziphakathi kweli Gunya Lehlabathi LamaNgesi NamaMerika elifana nentsimbi. Ngokuhamba kwexesha, olu dongwe luye lwabangela ukuba kube nzima ngelo gunya ukuba namandla ngendlela ebelinokuthanda ngayo.
b Le ngcaciso ihlaziya inkcazelo exutyushwe kwiphepha 57, isiqendu 24 sencwadi ethi Isiprofeto SikaDaniyeli naleyo iboniswe kwisicangca esikwiphepha 56 nesikwiphepha 139.
[Umfanekiso okwiphepha 19]
Abazalwana abasibhozo bekomkhulu leWatchtower bavalelwa entolongweni ngoJuni 1918