Ngaba Uyakhumbula?

Ngaba uye wazifunda ngokucokisekileyo iiMboniselo zakutshanje? Khawubone ukuba unokuyiphendula kusini na le mibuzo ilandelayo:

Ngaba iinwele zikaSamson zazimnika amandla?

Iinwele zikaSamson zazingamniki amandla zizodwa. Iinwele zakhe zazimela, ulwalamano olukhethekileyo awayenalo uSamson noThixo njengomNaziri. Olo lwalamano lwaphazamiseka xa uDelila wazichebayo ezo nwele.—4/15, iphepha 9.

Xa kuthelekiswa neentliziyo zethu zokoqobo, ziziphi izinto ezintathu ezinokunceda intliziyo yokomfuziselo?

(1) Ukuzondla. Njengoko iintliziyo zethu zokoqobo zifanele zifumane ukutya okusempilweni, intliziyo yokomfuziselo ifuna ukutya okwaneleyo kokomoya. (2) Ukwenza umthambo. Ukuzibhokoxa kubulungiseleli kunokugcina iintliziyo zethu zokomfuziselo zisempilweni. (3) Abantu esihlala phakathi kwabo. Sinokulunciphisa uxinezeleko ngokunxulumana namanye amaKristu asikhathaleleyo.—4/15, iphepha 16.

Ukuba elinye iqabane lomtshato liye alathembeka, amaqabane omtshato anokuphinda athembane njani?

(1) Ngamnye makanyaniseke komnye; (2) sebenzani kunye; (3) lahlani imikhwa emidala nize nihlakulele emitsha; yaye (4) lazini ixesha lokulahl’ ingqumbo, ukuze ningcibe iintanda.—5/1, iphepha 12-15.

Kutheni umntu onikela intetho yomngcwabo engamele asebenzise iNdumiso 116:15 ebhekisela kumntu uswelekileyo?

Le ndinyana ithi: “Kuxabisekile emehlweni kaYehova ukufa kwabanyanisekileyo bakhe.” Oku kuthetha ukuba uThixo akayi kuvumela ukuba bonke abakhonzi bakhe abanyanisekileyo bafe ngenxa yokuba ubajonga njengabaxabisekileyo. Akayi kuvumela ukuba abakhonzi bakhe batshayelwe emhlabeni xa bebonke.—5/15, iphepha 22.

Zazingoobani iicolporteurs?

Ngaphambi kowe-1931, ibinzana elithi “colporteurs” lalibhekisela kwabo ngoku kuthiwa ngoovulindlela.—5/15, iphepha 31.

Ziziphi izibakala ezibonisa ukuba iBhayibhile asiyoncwadi nje ebhalwe ngabantu?

IBhayibhile ineziprofeto ezininzi ezazalisekayo. Imbali yayo ichanile, ayibobuxoki. Iyavumelana nenzululwazi echanileyo, yaye iincwadi zayo ziyavisisana. Iyasebenziseka kumhla wethu.—6/1, iphepha 4-8.

Ngoobani ababumba ‘zonke izikumkani’ ezikhankanywe kuDaniyeli 2:44?

Eso siprofeto sibhekisela kwizikumkani, okanye oorhulumente abamelwa ziinxalenye ezahlukahlukeneyo zomfanekiso ochazwa nguDaniyeli.—6/15, iphepha 17.

IGunya Lehlabathi LamaNgesi NamaMerika libe lilo nini igunya lehlabathi lesixhenxe elikwisiprofeto seBhayibhile?

La magunya mabini aqala ukusebenza xa iBritani neUnited States zincedisana zaba negalelo ebudeni beMfazwe Yehlabathi I.—6/15, iphepha 19.

UThixo uzixolela aze azilibale njani izono zabantu abaguqukayo?

UYehova uthi ngabo akholiswayo ngabo: “Nesono sabo andiyi kuba sasikhumbula.” (Yer. 31:34) Unokuzixolela izono ngedini lentlawulelo. Xa esenjenjalo, uThixo ulibala ngengqiqo yokuba akayi kuzikhumbula ezo zono ukuze aphinde abohlwaye ngenxa yazo.—7/1, iphepha 18.

Kutheni sinokuyikholelwa imimangaliso eseBhayibhileni?

Yayisoloko isenziwa ekuhleni kungekhona emfihlekweni. Le mimangaliso yayilula. Yayisenzelwa ukuzukisa uThixo kungekhona abantu. Kwenziwa imimangaliso eyahlukahlukeneyo yaye abachasi belo xesha abazange bathandabuze ukuba yenzeka. Ezi zizizathu zokuba sibe nentembelo kwingxelo yeBhayibhile yemimangaliso.—8/1, iphepha 7-8.