Ngaba Unokuyikholelwa Imimangaliso Ebhalwe EBhayibhileni?
UKUBA ububaliselwe ibali elibangela umdla, ngaba indlela aziwa ngayo loo mntu ukubaliseleyo ibingayi kukuphembelela? Ibingazukuchaphezela kuphela indlela alibalisa ngayo loo mntu elo bali kodwa nendlela anyaniseke ngayo. Ngaphezu koko, ukuba ebekuxelele inyaniso ukutyhubela iminyaka kwaye akazange akuxokise, ubuya kuba nesizathu sokukholelwa oko akuxelela kona ngoku.
Kunjalo nangemimangaliso ebhalwe eBhayibhileni. Akakho apha kuthi owayephila xa kwakusenzeka ezo ziganeko. Kodwa sinokuliqonda ibali eliseBhayibhileni xa liyinyaniso. Njani? Nazi izibakala ezenza iingxelo zemimangaliso eseBhayibhileni ibe nokuthenjwa.
Imimangaliso emininzi yenziwa ekuhleni. Maxa wambi, yayibonwa ngamawaka abantu, ukuba babe ngezozigidi. (Eksodus 14:21-31; 19:16-19) Yayingenziwa ngasese, kwindawo ababe ngenakuyibona abantu.
Le mimangaliso yayilula. Kwakungekho buqhophololo xa isenziwa. Ubukhulu becela, imimangaliso ebhalwe eBhayibhileni yayisenzeka xa kuye kwavela amathuba kwanaxa abantu baye bayicela. (Marko 5:25-29; Luka 7:11-16) Kwimeko elolo hlobo ummangaliso wawungenakucetywa kusengaphambili.
Abantu ababesenza le mimangaliso babengayenzeli ukuze bafumane udumo, bazukiswe okanye babe zizityebi. Kunoko, yayizukisa uThixo. (Yohane 11:1-4, 15, 40) Abantu abazama ukuthenga amandla okwenza imimangaliso ukuze bazenzele intywenka yemali babekhalinyelwa kabukhali.—2 Kumkani 5:15, 16, 20, 25-27; IZenzo 8:18-23.
Imimangaliso eyahlukahlukeneyo ekuthethwa ngayo eBhayibhileni ibonisa ukuba yayingenakwenziwa ngabantu. Ngokomzekelo, kwazoliswa ulwandle nomoya, kwajikwa amanzi aba yiwayini, imvula yanqunyanyiswa yaphinda yana, kwaphiliswa abantu abagulayo, abantu ababeziimfama benziwa babona. Yonke le mimangaliso neminye engakumbi ibonisa ukuba kwakusebenza amandla angaphezu kwawomntu.—1 Kumkani 17:1-7; 18:41-45; Mateyu 8:24-27; Luka 17:11-19; Yohane 2:1-11; 9:1-7.
Abachasi ababona imimangaliso abazange bathandabuze ukuba yenzeka. Emva kokuba uYesu evuse umhlobo wakhe uLazaro, iintshaba zikaYesu zonqulo azizange zithandabuze ukuba uLazaro wayefile. Zazinokuthandabuza njani? Kaloku uLazaro wayeneentsuku ezine engcwatyiwe. (Yohane 11:45-48; 12:9-11) Kwanasemva kweenkulungwane efile uYesu, ababhali beTalmud yamaYuda bavuma ukuba uYesu wayenamandla okwenza imimangaliso. Basuka nje babuza umthombo walo mandla. Ngendlela efanayo, xa abafundi bakaYesu babemangalelwe kwinkundla yamaYuda, abazange babuzwe ukuba “Bawenzile na ummangaliso?” Kunoko babuzwa ukuba: “Nikwenza ngamandla mani na okanye ngegama likabani na oku”?—IZenzo 4:1-13.
Ngaba uyakukholelwa oko sikuxelelwa yiBhayibhile ngemimangaliso? Ngokwale mibandela siye sayixubusha, kucacile ukuba imimangaliso ekuthethwa ngayo eBhayibhileni inokuthenjwa. Kukwakho nezinye izizathu zokuzithemba ezi ngxelo. Ngokomzekelo, xa iBhayibhile ithetha ngesiganeko esithile, idla ngokusichazela ixesha, indawo namagama abantu ababandakanyekileyo. Nabagxeki beBhayibhile baye bamangaliswa kukuchana kweenkcukacha zayo ezingokwembali. Amakhulu eziprofeto zeBhayibhile aye azaliseka, nakwezona nkcukacha zincinane. Ukongezelela, iBhayibhile inamacebiso amahle ngendlela abanokwenza ngayo abantu ukuze bahlale ngokonwaba—la macebiso aye anceda abantu abakubudala nabaneemvelaphi ezahlukahlukeneyo. Kumbandela wolwalamano lwabantu, icebiso elifumaneka eBhayibhileni alinantanga.
Ukuba awuyithembi iBhayibhile, kutheni ungakhe uziphe ixesha lokuyihl’ amahlongwane? Okukhona uyazi kokukhona uza kuya uyithemba. (Yohane 17:17) Uya kukuthemba oko iBhayibhile ikuxelela kona ngemimangaliso eyenzeka kwixa elidlulileyo. Usakuzikholelwa ezo ngxelo, uya kuba nesizathu esibambekayo sokukuthemba oko iBhayibhile ithi kuza kwenzeka kwixa elizayo.
[Umfanekiso okwiphepha 7]
Abachasi bakaYesu abazange bathandabuze ukuba uLazaro wayefile