IMIBUZO YEBHAYIBHILE IYAPHENDULWA

Ngaba unako ukuyiqonda iBhayibhile?

IBhayibhile liLizwi likaThixo. Ifana neleta evela kutata onothando. (2 Timoti 3:16) EBhayibhileni uThixo uchaza oko sinokukwenza ukuze simvuyise, isizathu sokuba evumele ubungendawo, noko aza kukwenzela uluntu kwikamva. Kodwa ke abefundisi beecawa baye bayigqwetha iBhayibhile; ngenxa yoko abantu abaninzi bacinga ukuba abanakuze bayiqonde.—IZenzo 20:29, 30.

UYehova uThixo ufuna sazi inyaniso ngaye. Kungeso sizathu le nto esinike incwadi enokuqondakala.—1 Timoti 2:3, 4.

Ungenza njani ukuze uyiqonde iBhayibhile?

Ngaphezu kokuba uYehova esinike iBhayibhile, uye wasinceda ukuba siyiqonde. Wathumela uYesu ukuze asifundise. (Luka 4:16-21) UYesu wanceda abaphulaphuli bakhe ukuba baziqonde izibhalo, ecaphula ivesi emva kwenye.—Luka 24:27, 32, 45.

UYesu waseka ibandla lamaKristu ukuze liqhubeke nomsebenzi awayewuqalile. (Mateyu 28:19, 20) Namhlanje abalandeli bakaYesu bokwenyani banceda abantu ukuba bakuqonde oko iBhayibhile ikufundisayo ngoThixo. Ukuba ungathanda ukuqonda iBhayibhile, cela amaNgqina kaYehova akuncede.—IZenzo 8:30, 31.