Kuhloniphe “Oko UThixo Akubophelele Ngedyokhwe Ndawonye”

1, 2. AmaHebhere 13:4 amele asenze siwujonge njani umtshato?

SONKE siyafuna ukumhlonipha uYehova. Ufanelwe kukuhlonitshwa sithi ibe naye uthembisa ukuba uza kusihlonipha. (1 Sam. 2:30; IMize. 3:9; ISityhi. 4:11) Ukwafuna sihloniphe nabantu, njengorhulumente. (Roma 12:10; 13:7) Ikhona nenye into esimele siyihloniphe kakhulu, umtshato.

² Umpostile uPawulos wathi: “Umtshato mawubekeke phakathi kwenu nonke, nesilili somtshato masingadyojwa.” (Heb. 13:4) Apha uPawulos wayengancokoli nje ngomtshato, kodwa, wayesithi amaKristu amele ayihloniphe imitshato yawo. Ngaba uwujonga njalo umtshato, ingakumbi owakho ukuba utshatile?

3. Wacebisa wathini uYesu ngomtshato? (Jonga umfanekiso osekuqaleni.)

³ Ukuba uwujonga njengento ebalulekileyo umtshato, ulandela umzekelo omhle kakhulu. UYesu wayewuhlonipha umtshato. Xa abaFarisi babuza uYesu ngoqhawulo-mtshato, wathetha into eyathethwa nguYehova ngomtshato wokuqala. Wathi: “Ngenxa yoku indoda iya kumshiya uyise nonina, yaye aba babini baya kuba nyama-nye.” Waphinda wathi: “Oko uThixo akubophelele ngedyokhwe ndawonye makungahlukaniswa mntu.”​—Funda uMarko 10:2-12; Gen. 2:24.

4. UYehova wayefuna ukuba imitshato ihlale ixesha elingakanani?

⁴ UYesu wavuma ukuba nguThixo odale umtshato ibe wayibethelela into yokuba umele ungapheli. UThixo akazange axelele uAdam noEva ukuba babenokuwuqhawula umtshato. Eyona nto wayeyifuna kukuba “aba babini” bahlale kunye ngonaphakade.

IZINTO EZATSHINTSHA UMTSHATO OKWEXESHANA

5. Kwenzeka ntoni emtshatweni xa omnye eswelekile?

⁵ Emva kokuba uAdam onile, izinto ezininzi zatshintsha. Abantu baqalisa ukufa, ibe loo nto yaba nento eyenzayo emitshatweni. Loo nto siyibona kwinto eyathethwa ngumpostile uPawulos xa wayecacisa ukuba amaKristu awekho phantsi koMthetho kaMoses. Wathi ukufa kuyawuphelisa umtshato ibe lowo uswelekelwe ngumyeni okanye inkosikazi unokuphinda atshate.​—Roma 7:1-3.

6. UMthetho kaMoses usifundisa ntoni ngendlela uThixo awujonga ngayo umtshato?

⁶ UMthetho uThixo awawunika amaSirayeli wawunezinto ozithethayo ngomtshato. Kwakuvumelekile ukuba indoda yomSirayeli itshate abafazi abaninzi, into eyayisenziwa kwangaphambi kokuba uThixo anike amaSirayeli uMthetho. Kodwa ke, uMthetho wawubakhusela abafazi nabantwana ukuze bangaphathwa kakubi. Ngokomzekelo, ukuba indoda yomSirayeli yayitshate ikhoboka ize emva koko itshate umfazi wesibini, yayimele iqhubeke imnika ukutya, iimpahla neemfanelo zakhe umfazi wayo wokuqala. UThixo wayefuna ukuba imkhusele ize imkhathalele. (Eks. 21:9, 10) Asikho phantsi koMthetho, kodwa kuwo sinokuyibona indlela obaluleke ngayo umtshato kuYehova. Ngaba loo nto ayikwenzi uwuhloniphe umtshato?

7, 8. (a) Ngokutsho kweDuteronomi 24:1, uMthetho wawusithini ngoqhawulo-mtshato? (b) UYehova ulujonga njani uqhawulo-mtshato?

⁷ Wawusithini uMthetho ngoqhawulo-mtshato? Nangona uYehova wayengafuni ukuba indoda nomfazi bawuqhawule umtshato, uMthetho wawuyivumela indoda yomSirayeli ukuba iwuqhawule ukuba “ifumene okuthile okungandilisekanga” kwinkosikazi yayo. (Funda iDuteronomi 24:1.) UMthetho awuzange uyichaze eyona nto ithethwa ‘kukungandiliseki.’ Kusenokwenzeka ukuba kwakuthethwa ngento enkulu okanye elihlazo, hayi nje into engenamsebenzi. (Dut. 23:14) Into embi kukuba, ngemihla kaYesu amaYuda amaninzi ayewuqhawula umtshato “nangasiphi na isizathu.” (Mat. 19:3) Asifuni kuba njalo thina.

⁸ Umprofeti uMalaki wathetha ngendlela uThixo akujonga ngayo ukuqhawula umtshato. Ngelo xesha kwakuqhelekile ukuba indoda iqhawule umtshato ‘nomfazi wobutsha bayo’ ngesizathu esingabambekiyo, ize mhlawumbi itshate ibhinqa eliselitsha, elalingamkhonzi uYehova. Kodwa uMalaki wachaza indlela uThixo alujonga ngayo uqhawulo-mtshato. Wathi: “Uluthiyile uqhawulo-mtshato.” (Mal. 2:14-16) Loo nto yayidibana kakuhle nento ethethwa liLizwi LikaThixo ngomtshato wokuqala: “Indoda iya kumshiya uyise nonina, inamathele emfazini wayo baze babe nyama-nye.” (Gen. 2:24) UYesu wayewujonga njengoTata wakhe umtshato, wathi: “Oko uThixo akubophelele ngedyokhwe ndawonye makungahlukaniswa mntu.”​—Mat. 19:6.

SINYE QHA ISIZATHU SOKUQHAWULA UMTSHATO

9. Athetha ukuthini amazwi kaYesu akuMarko 10:11, 12?

⁹ Abanye abantu basenokubuza ukuba, ‘Ngaba sikhona isizathu sokuba umKristu aqhawule umtshato aze aphinde atshate?’ Khawuve ukuba uYesu ulujonga njani uqhawulo-mtshato: “Nabani na oqhawula umtshato nomfazi wakhe aze atshate nomnye uyakrexeza ngokunxamnye naye, yaye ukuba umfazi, emva kokuqhawula umtshato nendoda yakhe, utshata nenye, uyakrexeza” (Marko 10:11, 12; Luka 16:18) Icacile into yokuba uYesu wayewuhlonipha umtshato ibe wayefuna nabanye bawuhloniphe. Ukuba indoda yayiqhawula umtshato nenkosikazi yayo ethembekileyo (okanye inkosikazi iqhawula umtshato nendoda yayo ethembekileyo) ngenxa yesizathu esingavakaliyo ize iphinde itshate, yayikrexeza. Yinyaniso leyo, kuba ukuqhawula umtshato akuthethi kuthi uphelile. Emehlweni kaThixo, abo babini ‘basenyama-nye.’ Enye into eyathethwa nguYesu kukuba, ukuba indoda yayiqhawula umtshato nomfazi wayo othembekileyo, yayinokumenza akrexeze. Njani? Kudala, xa indoda iqhawule umtshato nomfazi wayo, loo mfazi wayenokuziva enyanzelekile ukuba aphinde atshate kuba engenamali. Xa lo mfazi ephinda atshate, wayeya kube uyakrexeza.

10. Sisiphi isizathu esinokwenza umKristu aqhawule umtshato aze abe nenkululeko yokuphinda atshate?

¹⁰ UYesu wasichaza isizathu esinokwenza abantu baqhawule umtshato, wathi: “Ndithi kuni nabani na oqhawula umtshato nomfazi wakhe, ngaphandle kwangesizathu sohenyuzo, [ngesiGrike, por·neiʹa] aze atshate nomnye uyakrexeza.” (Mat. 19:9) Wathetha into efanayo nakwiNtshumayelo YaseNtabeni. (Mat. 5:31, 32) Ngawo omabini la maxesha, uYesu wathetha ‘ngohenyuzo.’ Eli gama lidibanisa izono ezinento yokwenza nesondo njengokukrexeza, ukuthengisa ngomzimba, ukwabelana ngesondo kwabantu abangatshatanga, kwendoda nenye indoda (okanye ibhinqa nelinye ibhinqa) nokwabelana ngesondo nezilwanyana. Ngokomzekelo, ukuba indoda etshatileyo iyahenyuza, inkosikazi yayo inokwenza isigqibo sokuba iwuqhawule umtshato okanye ingawuqhawuli. Ukuba iyawuqhawula, uThixo akasabajongi njengabantu abatshatileyo.

11. Kutheni umKristu esenokukhetha ukungawuqhawuli umtshato nokuba umntu atshate naye uhenyuzile?

¹¹ UYesu akazange athi xa omnye ehenyuzile (por·neiʹa) kunyanzelekile ukuba lowo uthembekileyo awuqhawule umtshato. Ngokomzekelo, inkosikazi isenokukhetha ukuba ihlale emtshatweni wayo nokuba umyeni wayo uhenyuzile. Kusenokwenzeka ukuba isamthanda, izimisele ukumxolela ibe ifuna bazilungise izinto. Nyhani ke, ukuba iwuqhawule umtshato kodwa ayaphinda itshate, isenokuba neengxaki. Iza kutya ize inxibe ntoni? Iza kwenza njani ngeemfuno zesondo? Ayizukuba nesithukuthezi? Abantwana bona? Ngaba ukuqhawula umtshato kuza kwenza kube nzima ukubakhulisela enyanisweni? (1 Kor. 7:14) Icacile into yokuba, akubikho lula kulowo ebethembekile emtshatweni emva kokuqhawula umtshato.

12, 13. (a) Kwenzeka ntoni emtshatweni kaHoseya? (b) Kwakutheni ukuze uHoseya aphinde amamkele uGomere, ibe le nto isifundisa ntoni ngomtshato namhlanje?

¹² Into eyenzeka kumprofeti uHoseya isifundisa kakhulu ngendlela uThixo awujonga ngayo umtshato. UThixo wathi uHoseya makatshate uGomere, owayeza kuba ‘ngumfazi wobuhenyu aze abe nabantwana bobuhenyu.’ (Hos. 1:2, 3) Emva koko, uGomere waba nentombi nonyana, ekusenokwenzeka ukuba utata wabo yayingengoHoseya. Nangona uGomere wakrexeza kaninzi, uHoseya akazange awuqhawule umtshato. Ekugqibeleni, uGomere wamshiya waza waba likhoboka. Sekunjalo, uHoseya waphinda wamthenga. (Hos. 3:1, 2) UYehova wasebenzisa uHoseya ukuze abonise indlela awasixolela kaninzi ngayo isizwe sakwaSirayeli emva kokungathembeki nokukhonza kwaso abanye oothixo. Yintoni esinokuyifunda kule nto?

¹³ Ukuba umyeni okanye inkosikazi yomKristu ihenyuzile, kuza kufuneka enze isigqibo lowo uthembekileyo. UYesu wathi uza kuba nesizathu esivakalayo sokuqhawula umtshato aze abe nenkululeko yokuphinda atshate. Enye into anokuyenza, kukumxolela. Akhonto imbi apho, noHoseya waphinda wamamkela uGomere. Emva koko, wamxelela ukuba angaze aphinde alale namanye amadoda. UHoseya akazange abelane ngesondo noGomere kangangexesha elithile (Hos. 3:3). Kodwa, ekuhambeni kwexesha, kumele ukuba uHoseya waphinda wabelana ngesondo naye, ebonisa indlela uYehova awayekulungele ngayo ukwamkela abantu bakhe kwakhona aze aphinde abe nobuhlobo nabo. (Hos. 1:11; 3:3-5) Le nto isifundisa ntoni ngomtshato namhlanje? Ukuba umyeni okanye inkosikazi yenza isigqibo sokuba ingawuqhawuli umtshato nalowo uye wakrexeza, ukuvuma ukuba babelane ngesondo kubonisa ukuba imxolele. (1 Kor. 7:3, 5) Loo nto iyasicima esa sizathu singokweZibhalo sokuqhawula umtshato. Emva koko, bafanele bancedisane ukuze bawujonge ngendlela uThixo awujonga ngayo umtshato.

WUHLONIPHE UMTSHATO NOKUBA SEKUNZIMA

14. Ngokutsho kweyoku-1 kwabaseKorinte 7:10, 11, yintoni esenokwenzeka emtshatweni?

¹⁴ Onke amaKristu amele azimisele ukuhlonipha umtshato njengoYehova noYesu. Kodwa, ngamanye amaxesha kusenokuba nzima ukuyenza loo nto, kuba singabantu. (Roma 7:18-23) Ngoko, ayimele isothuse into yokuba amaKristu exesha labapostile ayeneengxaki emitshatweni. UPawulos wathi: “Umfazi ufanele angemki endodeni yakhe.” Kodwa ngamanye amaxesha yayisenzeka loo nto.​—Funda eyoku-1 kwabaseKorinte 7:10, 11.

15, 16. (a) Yintoni abamele bazimisele ukuyenza abantu abatshatileyo xa beneengxaki, ibe ngoba? (b) Le nto isebenza njani xa umKristu etshate nomntu ongamkhonziyo uYehova?

¹⁵ UPawulos akazange ayichaze into eyayiza kwenza loo mfazi emke endodeni yakhe. Ngokomzekelo, yayingenakuba kukuhenyuza kwendoda, kuba xa kunjalo wayenokuwuqhawula loo mtshato aze aphinde atshate. UPawulos wathi umfazi ohlukene nomyeni wakhe umele ‘ahlale engatshatanga okanye axolelane nendoda yakhe.’ Ngoko, kuThixo babesatshatile. UPawulos wathi ukuba babeneengxaki ezingenanto yakwenza nokuhenyuza, babemele bazimisele ukuxolelana. Babenokucela abadala ukuba babancede. Abadala babenokubacebisa ngeZibhalo kodwa bangathath’ icala.

¹⁶ Zinokuba nzima ngakumbi izinto xa umKristu etshate nomntu ongamkhonziyo uYehova. Ngaba bafanele bohlukane xa kukho iingxaki? Njengokuba sele kutshiwo ngaphambili, iZibhalo zibonisa ukuba isizathu esivakalayo sokuqhawula umtshato kuxa omnye ehenyuzile, kodwa azizichazi izizathu zokwahlukana. UPawulos wathi: “Ukuba nawuphi na umzalwana unomfazi ongakholwayo, ukanti evuma ukuhlala naye, makangamshiyi.” (1 Kor. 7:12, 13) Loo nto isasebenza nanamhlanje.

17, 18. Kutheni amanye amaKristu eye ahlala emtshatweni nokuba sekunzima?

¹⁷ Kodwa ke, kwezinye iimeko ‘indoda engakholwayo’ isenokwenza izinto ezibonisa ukuba ‘ayivumi ukuhlala’ nenkosikazi yayo. Kusenokwenzeka ukuba iyayibetha inkosikazi yayo, ide iyenze ibone ukuba impilo nobomi bayo busengozini. Isenokungafuni nokondla intsapho yayo okanye ingafuni ukuba inkosikazi yayo iqhubeke ikhonza uThixo. Xa kunjalo, inkosikazi engumKristu isenokubona ukuba umyeni wayo ‘akavumi ukuhlala’ nayo, nokuba loo myeni yena uthini. Ngenxa yaloo nto, isenokwenza isigqibo sokuba bohlukane. Kodwa ke, amanye amaKristu aneengxaki ezifana nezi aye anyamezela aza azama ukulungisa izinto. Ngoba?

¹⁸ Xa abantu abatshatileyo besohlukana, ayitshintshi into yokuba basatshatile. Njengokuba besekutshiwo ekuqaleni, ukuba abahlali kunye, bobabini baza kuba neengxaki. Umpostile uPawulos wachaza esinye isizathu sokuba abantu abatshatileyo bahlale kunye. Wathi: “Kuba indoda engakholwayo iyangcwaliswa ngenxa yomfazi wayo, nomfazi ongakholwayo uyangcwaliswa ngenxa yomzalwana; kungenjalo, abantwana benu ngokwenene bebeya kuba ngabangahlambulukanga, kodwa ngoku bangcwele.” (1 Kor. 7:14) AmaKristu amaninzi aye ahlala nabantu abangamkhonziyo uYehova naphantsi kweemeko ezinzima. Aye avuya xa ebona ukuba ukwenza loo nto kuye kwabanceda abantu abatshate nabo ukuba babe ngamaNgqina KaYehova.​—Funda eyoku-1 kwabaseKorinte 7:16; 1 Pet. 3:1, 2.

19. Kutheni kukho amaKristu amaninzi onwabileyo emitshatweni yawo?

¹⁹ UYesu wathetha ngokuqhawula umtshato, ibe umpostile uPawulos yena wathetha ngokwahlukana. Bobabini babefuna ukuba abakhonzi bakaThixo bawuhloniphe umtshato. Ehlabathini lonke namhlanje, maninzi amaKristu onwabileyo emitshatweni yawo. Kusenokwenzeka ukuba amanye asebandleni okulo. Kukho abazalwana abathembekileyo ababathandayo abafazi babo nabafazi ababahloniphayo abayeni babo, bonke bebonisa ukuba umtshato ungahlonitshwa. Siyavuya xa sibona ukuba baninzi abantu abenza le nto ithethwa liLizwi LikaThixo: “Ngenxa yesi sizathu indoda iya kumshiya uyise nonina yaye iya kunamathela emfazini wayo, baze abo babini babe nyama-nye.”​—Efe. 5:31, 33.