Iimbalasane Zonyaka Odluleyo
EBUDENI bonyaka wama-2000, ehlabathini lonke amaNgqina kaYehova kwiiHolo zoBukumkani zawo ebexhome esi sibhalo: ‘Ke thina asingabahlehlayo . . . kodwa siluhlobo olunokholo.’ (Heb. 10:39) Oko kuchazwe kweso sibhalo ngumoya abewubonisa ehlabathini lonke njengokuba ebeqhubeka nobulungiseleli bawo. Eneneni, abanye baba madolw’ anzima ukuthetha nabantu basemzini; iimeko ezithile zinokubenza bangazithembi. Kanti, ngenxa yokuba nokholo kuYehova, bayaqhubeka bethobela imithetho yakhe.
Ingxelo yehlabathi lonke ekwiphepha 31 ibonisa iimbalasane ezimbalwa zoko aye akuphumeza ngentsikelelo kaYehova ebudeni bonyaka wenkonzo ophele ngo-Agasti 31. Iinkcukacha ezingakumbi zifumaneka kwisicangca esikwiphepha 32-9. Ukongezelela, zifanele zikhankanywe ngokukhethekileyo iindibano zesithili eziye zaqhutywa.
Iindibano Zabenzi Belizwi LikaThixo
NgoDisemba 1999 kwahlatyw’ ikhwelo kuwo onke amaNgqina kaYehova, nakubantu abanomdla, lokuba baye kwiNdibano YeSithili ‘Yabenzi Belizwi LikaThixo.’ Indibano yokuqala kolu ngcelele yaqhutyelwa eLong Beach eKhalifoniya eUnited States, ukususela ngoMeyi 19 ukusa ngowama-21, 2000. Ngaphambi kokuba olu ngcelele lwendibano luphele ebutsheni bowama-2001 amakhulu angakumbi aya kube eqhutywe ehlabathini lonke.
Olu cwangciso lubalaselisa uYehova, uMenzi wezinto ezimangalisayo. Sakhuthazwa ukuba singayilibali imisebenzi yakhe kodwa simdumise ngeentliziyo zethu ziphela. (INd. 9:1; 103:2) Kwanikelwa isiluleko esiluncedo ngokuphathelele ubomi bentsapho nokuhlangabezana nameva enyameni. Sabongozwa ukuba sizibhokoxe ekuhlakuleleni ukuhlala siphilile ngokomoya, singabi ngabaphulaphuli abalibalayo kodwa sithobele ilizwi likaThixo, nokuba siqhubeke sixelela abanye ngemisebenzi kaYehova emangalisayo. Amava, udliwano-ndlebe neentetho zabethelela ukuxabiseka koko kwakuxutyushwa yaye zazichukumisa intliziyo. Umdlalo obalaseleyo weBhayibhile, owawunomxholo othi “Imizekelo Esisilumkiso Kumhla Wethu,” wasinceda wasomeleza nxamnye nehambo enokonakalisa ulwalamano lukabani noYehova. Yaye somelezwa ziingxubusho ezinzulu zeziprofeto zencwadi yeBhayibhile kaIsaya noZefaniya.
Phakathi kweendawo zendibano kwakukho nebala lezemidlalo ekuthiwa yiNépstadion elilelona bala likhulu eHungary. Ngosuku lokuqala kwakukho abantu abangaphezu kwama-22 000. Abo bathobela ukhuthazo lokuba babekho kwasekuqaleni abasayi kuze bazisole. Ekuqukunjelweni kocwangciso lwakusasa, uGerrit Lösch olilungu leQumrhu Elilawulayo wanikela intetho ekhethekileyo, ebudeni bayo kwakhululwa INguqulelo Yehlabathi Elitsha YeZibhalo ZamaKristu ZesiGrike ngolwimi lwesiHungary. Kwakwinyanga enye kwezinye iindibano, INguqulelo Yehlabathi Elitsha YeZibhalo ZamaKristu ZesiGrike yakhululwa ngesiRomania nangesiAlbania.
EAlbania, nangona kwakuza kubakho iindibano ezingakumbi kwiindawo ezahlukeneyo ngasekupheleni kwenyanga, amaNgqina kulo lonke elaseAlbania, naseKosovo, asabela kwikhwelo lokuba abekho kucwangciso losuku lokuqala eTiranë. Hayi indlela avuya ngayo xa kwakhululwa iBhayibhile ngesiAlbania! Omnye umzalwana oselula wathi: “Ukufunda le nguqulelo akuyenzi iBhayibhile icace ize iqondakale nje kuphela kodwa indenza ndiyithande ngakumbi iBhayibhile!” Omnye udade onguvulindlela othe ngxi okwiminyaka yama-60 ubudala, nowayesakuba lilungu lepalamente lamaKomanisi, wabhala: “Hayi indlela emnandi ngayo! Kuphela kusemva kokuba ndifunde le nguqulelo endiye ndakwazi ukuqonda indlela emnandi ngayo iBhayibhile, neengxelo zayo eziziincoko, imibongo namabali avisisanayo. Unokuba nomfanekiso-ngqondweni ocacileyo waso sonke esi siganeko sichukumisayo. Xa ndifunda ngemimangaliso eyayisenziwa nguYesu ukugxekwa nokwenziwa intlekisa, ndachukumiseka gqitha ngendlela endingazange ndichukumiseke ngayo ngaphambili!”
Ukongezelela kwizinto ezintle kwiindibano ezazikwamanye amazwe, kwiindibano ezaziseCzech Republic, iindwendwe zavuyiswa kukufumana uHlelo Oluneembekiselo lweNguqulelo Yehlabathi Elitsha, oluneembekiselo eziseludinini nemibhalo esemazantsi, njengoncedo olungakumbi kufundisiso olunzulu lweLizwi likaThixo. Xa kwenziwa isaziso sokukhululwa kwayo, uninzi lwabo babeze endibanweni ePrague naseOstrava lwema ngeenyawo laze laqhwaba ixesha elide.
Kambe ke, ekuqaleni kwalo nyaka wenkonzo, kuye kwaqhutywa iindibano zesithili ezixubusha umxholo othi “Ilizwi LikaThixo Lesiprofeto” kwezinye iindawo zomhlaba. Kwaye kwenziwa umgudu okhethekileyo wokuba kufikelelwe abantu ngeelwimi ezininzi kangangoko kunokwenzeka ngaloo nkcazelo ibalulekileyo. Ngokomzekelo, eMexico kwaqhutywa iiNdibano ZeSithili ‘Zelizwi LikaThixo Lesiprofeto’ ezili-190, isimbuku sababezile yayisisi-1 073 667. Ucwangciso lwanikelwa ngeSpanish, ngesiNgesi, ngesiMaya neNtetho Yezandla yaseMexico eyaye yaguqulelwa kwisiMazateco, kwisiMixe nakwisiTzotzil. Iingxaki zolwimi zancipha njengokuba zonke iintlobo zabantu zazingenelwa ekuqondeni esikufumana kwiBhayibhile ngokuphathelele izinto ezingummangaliso uThixo azigcinele uluntu.
Ukuhlangabezana Neemeko Ezinzima
Kwakhona ebudeni bonyaka wenkonzo ophelileyo, kuye kwanikelwa ubungqina obubalaseleyo ngokuphathelele uYehova uThixo noBukumkani bakhe obungoMesiya. Incopho yabavakalisi ababa nesabelo kulo msebenzi babezizi-6 035 564. Ngokwesilinganiselo, ebudeni bonyaka bangama-805 205 abaye baba nesabelo kwinkonzo yobuvulindlela. Ebudeni buka-Aprili isimbuku soovulindlela siye senyuka saya kwisi-1 418 062! Kwakhona kulo nyaka kuye kwachithwa iiyure ezingaphezu kwewaka lezigidi kunikelwa ubungqina basesidlangalaleni. Uninzi lwabo baye banesabelo kulo msebenzi luye lwenjenjalo ngaphantsi kweemeko ezivavanya okomlilo. Ukanti, kwiimeko ezahlukeneyo, amaNgqina kaYehova aye anikela ubungqina bokuba ‘asingabahlehlayo.’
Ngokomzekelo, kangangeenyanga eziliqela iDemocratic Republic of Congo ibithwaxwa yimfazwe. Kummandla osempuma welo lizwe, ongenalunxibelelwano neKinshasa, apho ikhoyo iofisi yesebe, kukho abavakalisi boBukumkani abangaphezu kwama-30 000. Kweminye imimandla, amajoni asoloko ebamisa abahlali, kuquka namaNgqina kaYehova, abahlabe imibuzo, maxa wambi ababethe. Sekunjalo amaNgqina akayeki ukushumayela. Kukho abantu abamalunga nezigidi ezingama-50 kweli lizwe. Naba bayalifuna ithuba lokuva iindaba ezilungileyo. Ngokwesilinganiselo, abavakalisi balapho baye bachitha malunga neeyure ezili-13 kubulungiseleli basentsimini nyanga nganye ebudeni balo nyaka.
Abazalwana noodade baseLiberia baye babonakalisa ukholo olubalaseleyo. Ucelomngeni lwemihla ngemihla abajamelana nalo aluquki ukuhlangabezana nobunzima bezoqoqosho nje kuphela kodwa bakwahlangabezana nemiphumo eyingozi yesifo seengcongconi netyphoid. Phantse wonke umntu unesi sifo, oselula nomdala. Intsabelo kwikhwelo lokuba “Ngaba Sinokwenza UAprili Wama-2000 Abe Yeyona Nyanga Isemagqabini Kuthi?” yayibubungqina obeyisayo bokuba nokholo kwabazalwana, inzondelelo ngoYehova namandla omoya kaYehova ebomini babo. Kwabakho incopho entsha yabavakalisi abangama-3 193. Kubo bonke abavakalisi abafaka ingxelo isimbuku esidibeneyo soovulindlela babancedani noovulindlela abathe ngxi sasingama-32 ekhulwini. Kuwo wonke lo msebenzi, abangama-16 875 ababeze eSikhumbuzweni badlula ngaphaya koko kwakulindelwe, yaye ngoMeyi ingxelo yabonisa ukuba kwaqhutywa izifundo zeBhayibhile ezingama-10 164.
Imfazwe yamakhaya yaseSri Lanka ibiqhubeka ngaphandle kokuyekelela kangangeminyaka eli-19. Ebudeni benyanga ka-Aprili 2000, umlo oshushu emantla eJaffna Peninsula waphumela ekubeni amashumi amawaka abantu abhace. Amabandla amahlanu, nabavakalisi abangama-600 kuquka nabantu abanomdla, bachaphazeleka. Abavakalisi banyanzeleka ukuba bahlale kwiHolo yoBukumkani nakumakhaya akufutshane angenabantu. Kunjani ukuphila kwiimeko ezimbi ngolo hlobo? Omnye umdala owayelapho wabhala: “Kuyo yonke indawo, kubonakala ubuhlwempu nendlala. . . . Abazalwana baye baphulukana namakhaya abo nezinto zabo. Iibhombu ezifakwa ngaphantsi komhlaba bezigcayiselwe kuyo yonke indawo. Abazalwana abaqeshwanga; abantwana abakwazi ukuya esikolweni. Ubomi bulusizi. Kodwa ngoncedo lomoya kaYehova nolwezinto zokomoya, abazalwana bayaqhubeka. . . . Siyasibona isandla sikaYehova, yaye siyambulela.” Aba bazalwana baqhuba zonke iintlanganiso zabo, bade baqhube nendibano yabo yesiphaluka kwindawo enqabileyo, nangona bengamaqela amancinane kunaqhelekileyo. Kunokuba bathobe isantya entsimini, bandisa oko bebekwenza ukuze bashumayeze abamelwane babo ngeendaba ezilungileyo.
Imeko yezoqoqosho yenza kube nzima ukuhamba kwezinye iindawo eUkraine. Kanti, kangangeminyaka, udade okwiminyaka engama-80 ubudala olixabisa ngokwenene ilungelo lokukhonza uYehova ebehamba iiyure ezine ukuya nokubuya kwintsimi ashumayela kuyo. Usahamba iikhilomitha ezili-10 ezintabeni ukuya ezintlanganisweni.
AmaNgqina kaYehova eRomania akhonza ngaphantsi kwenkcaso ekrakra yabefundisi beCawa yamaOthodoki. Belungiselela utyelelo lukaWilly Gournon ongumveleli wecandelo, abazalwana baqesha ibala lemidlalo laseBucharest ukwenzela intetho ekhethekileyo. Kodwa ngenxa yengcinezelo evela kubefundisi bamaOthodoki, eso sivumelwano sarhoxiswa. Noko ke, kwiintsuku ezimbalwa ngaphambi kotyelelo olwalucwangcisiwe, indoda ethile enempembelelo yangenelela ukuze incede abazalwana baqeshe iholo entle yaseSala Palatului (iPalace Hall), apho abangama-2 184 babephulaphule intetho enomxholo osexesheni owawusithi “Zivavanye Ukuba Uselukholweni Na.” Ngenxa yokholo oluvavanyiweyo, abavakalisi abangaphezu kwama-38 000 baseRomania baqhubeka ngaphandle kokuyekelela beshumayela iindaba ezilungileyo. Phakathi kwabo, umlinganiselo wama-3 569 ngoovulindlela, nangona inkoliso yabo besebenza ngokusisigxina.
Urhulumente wase-Ethiopia uyayixhasa inkululeko yonqulo ekumgaqo-siseko, kodwa abefundisi baphembelela amalungu eecawa zabo ukuze athiye amaNgqina. Yonke imihla kubulungiseleli basentsimini, iNgqina liyanyeliswa. Kodwa inkcaso ayipheleli apho. Aba baninimzi bazel’ impambano babetha abavakalisi ngeentonga baze babagibisele ngamatye. Kanti, ngenxa yokholo olomeleleyo, amaNgqina kaYehova angama-6 166 ashumayela isigidimi seendaba ezilungileyo zoxolo kubantu abazizigidi ezingama-62 kuloo nxalenye ikumntla-mpuma weAfrika.
Xa uBejoma, oneminyaka engama-61 ubudala, wafunda inyaniso, wayengakwazi ukufunda. Elambele inyaniso, wacela ukuba aqhutyelwe isifundo seBhayibhile yonke imihla. Wazibhokoxa ekufundeni ukubhala nokufunda ukuze afundise abantu kwidolophana yakowabo eMadagascar. Ngoxa wayesengumvakalisi ongabhaptizwanga, wagoduka waza waqalisa ukuqhuba iintlanganiso. Kunyaka olandelayo wabhaptizwa. Kwiminyaka emithathu kamva waba nguvulindlela. Kodwa ukunikela ubungqina kwidolophana yakowabo bekungelula. Abantu abanomdla baphathwa kakubi ngeyona ndlela. Ngesinye isihlandlo, bonke abahlali bahlanganisana bezama ukubayekisa. Amalungu entsapho abhenela ekusebenzelaneni nemimoya ukulwa nabo. Izalamane zamsongela ngokumdubula uMzalwan’ uBejoma ukuba wayeqhubeka esiya kumakhaya abantu abanomdla, ngenxa yoko isifundo sabo seBhayibhile siqhutyelwa ekhayeni lalo mzalwana. Phezu kwayo yonke le nkcaso, umsebenzi wokushumayela nokuya kwiintlanganiso awumanga. Ngexesha ekwakubhalwa ngalo oku, kwakukho abavakalisi abane. Banokuba ngama-40 ababesiza kwiintlanganiso.
KwaSirayeli amalungu anenzondelelo yempambano onqulo lwamaYuda ayaqhubeka enxwala amaNgqina kaYehova esenza imingcelele nemiqhankqalazo. Alandela abavakalisi kumsebenzi wabo wokunikela ubungqina kwindlu ngendlu nasezipakini, naxa bencokola nabantu abanomdla. Kwiindawo ezithile ezibalaseleyo abachasi baxhoma iifoto ezinkulu zabavakalisi ukuze balumkise abantu bangathethi namaNgqina. Kulo nyaka uphelileyo baye basongela abaqeshi ngokukwaya imveliso neenkonzo zabo ukuba ababagxothi nabaphi na abasebenzi abangamaNgqina kaYehova. Ngenxa yoku, kumabonwakude nakumaphephandaba, kuye kwanikelwa ingqalelo kumaNgqina kaYehova nakwinkolelo zawo. Ngentsikelelo kaYehova, inani labo bamkhonzayo kwaSirayeli liye landa kwakhona ngesi-7 ekhulwini kulo nyaka uphelileyo.
Ngenxa yemilo ephakathi kwamaqela axhobileyo eColombia, ngolwalathiso lweQumrhu Elilawulayo kuye kwafuneka kulungiselelwe iphecana elikhethekileyo elinomxholo othi “You Are the Light of the World.” Kwahanjiswa amaphecana aphantse abe zizigidi ezilishumi. Eli phecana liye lanceda ekucaciseni ubundilele bamaNgqina kaYehova ngokuphathelele iimfazwe. Lachaza oko kwenziwa ngamaNgqina kaYehova ukufundisa abantu imilinganiselo yokuziphatha, ukufundisa abasentolongweni, ukunceda abangevayo, ukunceda amaxhoba eentlekele zemvelo nokunika ithemba ngekamva. EColombia, amaNgqina kaYehova angaphezu kwe-107 613 axakekile eshumayela “iindaba ezilungileyo zoxolo.” (Efe. 6:14, 15) Eli phecana lahanjiswa kwintsimi yebandla nakwimimandla ekwanti. Oovulindlela ababini kwiPhondo laseCauca bathandazela ukuba bafumane ithuba lokuba bashumayele kwiqela elalixhobile elalikuloo mmandla. Ngenye imini imithandazo yabo yaphendulwa xa bafika edolophini baza bafumana uninzi lwamalungu elo qela lilapho. Aba vulindlela bahambisa amaphecana amaninzi kuloo ndawo. Emva kokufunda elo phecana, usodolophu wePhondo laseChocó wacela imvume yokuba adlale iividiyo zoMbutho kwisikhululo sikamabonwakude sasekuhlaleni.
Kumazwe amaninzi, kufuneka umonde ukuze kufunyanwe imvume yokwakha iHolo yoBukumkani, apho abantu banokuhlanganisana khona ukuze bafundisise iLizwi likaThixo. Noko ke, eKassándra, emantla eGrisi, ngokufumana imvume kwiSebe Lokwakha Ledolophu ukuba azakhele indawo yonqulo, kwathi kanti azicandel’ umgala-gala. Inkampani yokwakha, abembi, iinkampani ezixovula ikhonkile nezinye ezixhasa ngeempahla zokwakha zasongelwa de zoyika, nto leyo eyabangela ukuba zirhoxe kulo msebenzi okanye zingavumi ukushishina nabazalwana. Akuzange kuvunywe ukuba kusetyenziswe amanzi nombane kamasipala kwesi sakhiwo. Njengokuba kwakusetyenzwa esizeni ngo-Oktobha 21, 1999, kwakhal’ iintsimbi zecawa. Ihlokondiba elalikhokelwe ngusodolophu nabefundisi lahlasela esizeni, lizimisele ukutshabalalisa yonke into. Othuswe sesi siganeko, umphathiswa wocwangco eAthens wawaqinisekisa amaNgqina ukuba aza kukhuselwa ngamapolisa. Ebudeni balo msebenzi, kwakukho umkhosi wamapolisa angaphezu kwama-300 awayevela kwizixeko ezahlukahlukeneyo zasemntla Grisi. Ngo-Oktobha 30, iHolo yoBukumkani esemagqabini yayisele ilungele ukusetyenziswa. Ngokuqinisekileyo abazalwana bethu banikela ubungqina bokuba ‘asingabahlehlayo.’ Kuthenjwa ukuba umphumo woku uya kuba nempembelelo entle ekwakhiweni kwezindlu zonqulo kwezinye iindawo zaseGrisi.
Njengokuba kusaziwa nanguthathatha ukuba, ungquzulwano phakathi kwama-Albania namaSerb eKosovo luye lwakhokelela ekubeni kungenelele izizwe ngezizwe ngowe-1999. Amakhulu amawaka abantu aye asabela kumazwe angabamelwane ukuze akhuseleke. Emva kokuba uninzi lubuyile, amaNgqina aseAlbania kamva nawaseOstriya, atyelela abazalwana eKosovo. Yintoni abayifumanisayo? Yintshabalalo kuyo yonke indawo. Ngexesha lasebusika, umbane, amanzi neparafini zazinqongophele kanobom. Amaqondo obushushu kwiindawo zabo zeentlanganiso ayephantsi kakhulu, kodwa zange zirhoxiswe iintlanganiso. Abazalwana noodade babenikela amagqabaza neentetho kukhanyiswe ngamakhandlela, kwakungabandi kwakuqhaqhazelis’ amazinyo njengokuba babeculela uYehova iindumiso. Amakhaya amabini amaNgqina atshatyalaliswa, kodwa kwanikelwa ubungqina obuhle njengokuba babencediswa ngabazalwana noodade abavela eAlbania naseItali babancedisa ukuyakha kwakhona. Ngenxa yentiyo yobuhlanga egqugqisileyo, kufuneka baphaphe abavakalisi xa bekubulungiseleli, kodwa bawaxhakamfula ngazo zozibini amathuba okunikela ubungqina—emarikeni, eposini, esitratweni nakubamelwane babo.
Phakathi kuDisemba 1999, iphondo laseVargas eligudle unxweme, eVenezuela, lathwaxwa yeyona ntlekele yokwemvelo yakhe yankulu kwimbali yelo lizwe. Emva kwezantyalantyala zemvula, intaba yawohloka ngokupheleleyo nommandla ogudle ulwandle ohlala abantu abaninzi, kwafa abantu abaqikelelwa kuma-50 000 yaza yashiya abangama-400 000 bengenamakhaya. Phakathi kwabo kwafuneka bashiye amakhaya abo kwakukho amaNgqina angaphezu kwe-1 200. Phezu kwayo nje le ntlekele, yintoni eyenziwa ngamabandla ali-11 awayeshiyeke kummandla waseVargas xa kwahlatyw’ ikhwelo loovulindlela abangabancedani ngoAprili? Ingxelo ibonisa ukuba kwabhalisa abali-112—umlinganiselo weshumi kwibandla ngalinye—bethelela koovulindlela abathe ngxi abangama-77 ababesele bekhonza apho.
ESuriname, abazalwana ababini abangakwaziyo ukuhamba, bahamba ngeenqwelo ezinamavili amathathu abazinyova ngezandla. Bobabini bakhonza njeengovulindlela. Omnye wenzakala kwimilenze yomibini omnye washunqulwa imilenze yomibini. Ngexesha lemvula, basenokuxinga eludakeni, kodwa basoloko befika bencumile kwiiHolo zoBukumkani abaya kuzo.
Ngoxa zibalulekile zonke iintlanganiso zebandla, iSikhumbuzo sibaluleke ngokukhethekileyo. NgoAprili 19, 2000, kwintlanganiso eyayiseAwaso, ePapua, kwakukho abantu abanomdla abali-11 ababehambe ngephenyane elincinane iiyure ezili-17 kulwandle olulwayo ukuze babekho. Emva kweSikhumbuzo, abaphulaphuli abazange bakwazi ukuzibamba iinyembezi bakuva ngenzondelelo eboniswe ngaba bantu banomdla nothando lwabo ngobuzalwana bamaKristu. Bathi: “Besifuna ukubhiyozela iSikhumbuzo sikaKristu kunye nabo sikhonza nabo uYehova; olu hambo belufanelekile.”
Ukufikelela Abantu Abangakumbi Ngeendaba Ezilungileyo
Umpostile uPawulos wabhala wathi: “Ndinetyala kumaGrike nakumaBharbhari, kwizilumko nakwabangenangqiqo.” (Roma 1:14) Ngedini lentlawulelo, uYehova wenze zonke iintlobo zabantu zakwazi ukufumana ubomi obungunaphakade. Olo lwazi lwaluphathiswe uPawulos, yaye uKristu wamthuma ukuba abe ngumpostile weentlanga. UPawulos wayeqonda ukuba wayenembopheleleko yokuba enze konke okusemandleni ukuze abelane nabanye ngeendaba ezilungileyo. Wenjenjalo ngenzondelelo. Ngokufanayo, ngomhla wethu, “ikhoboka elithembekileyo neliyingqondi” liluthabatha nzulu uthumo lokushumayela iindaba ezilungileyo kuwo wonke umhlaba omiweyo ukuze zibe bubungqina. (Mat. 24:14, 45-47) Kakade ke, ukuze bonke abantu abasemhlabeni baziqonde ngokucacileyo iindaba ezilungileyo, kufuneka bazive okanye bazifunde ngolwimi lwabo. Oku kufuna umsebenzi wokuguqulela ongakumbi.
Kulo nyaka uphelileyo, bekukokokuqala ukuba amaNgqina kaYehova avelise uncwadi lweBhayibhile ngeelwimi ezingama-22 ukongezelela kwezo bezisetyenziswa kwixa elidluleyo. Ezi lwimi zongezelelekileyo zithethwa ngabantu abangaphezu kwezigidi ezingama–31. Ngaphandle kwezi, abantu abathetha isiQuechua eBolivia nasePeru abangakwaziyo ukufunda abazange batyeshelwe; incwadi ethi Ulwazi yenziwa yafumaneka ngekhasethi. Ngoku amaNgqina kaYehova avelisa uncwadi lweBhayibhile ngeelwimi ezingaphezu kwama-360.
IMboniselo noVukani! ziimpapasho ezimbini ezizezona ziphambili ezisetyenziswayo ukusasaza inyaniso yeBhayibhile. Ukulungiselela amaphephancwadi amane ngesiNgesi nyanga nganye kona kukodwa kungumsebenzi. Kodwa ukulungiselela amaphephancwadi kanye ngenyanga, kabini ngenyanga okanye kane ngonyaka ngeelwimi ezininzi kufuna okungakumbi. Kulo nyaka uphelileyo kuye kwalungiselelwa iinkupho ezahlukahlukeneyo ezingama-4 078. Isebe laseRashiya lilodwa ngoku liguqulela IMboniselo kungekhona kulwimi lwesiRashiya kuphela kodwa nakwezinye iilwimi ezisixhenxe, ezithethwa ngabantu abazizigidi ezingama-36 kumazwe ali-13.
Incwadi Yonyaka iguqulelwa rhoqo ngeelwimi ezingama-31 yaye ethi Ukuhlolisisa IZibhalo Imihla Ngemihla ngezili-114. Ukongezelela, kulo nyaka uphelileyo kwaguqulelwa ezinye iincwadi ezili-119, iincwadana ezinemifanekiso ezingama-265, iincwadana ezingama-34 namaphecana angama-273 ukuze kusasazwe inyaniso yeBhayibhile. Ebudeni bonyaka INguqulelo Yehlabathi Elitsha YeZibhalo ZamaKristu ZesiGrike iye yafumaneka ngeelwimi ezine ezingakumbi (isiAlbania, isiHungary, isiRomania nangesiShona), yaye INguqulelo Yehlabathi Elitsha yakhululwa ngesiXhosa. Kwakhona, kwaveliswa iikhasethi zevidiyo ezingama-24. Ngaphandle kwezi, ngoku uMbutho uvelisa iimpapasho zeBraille ngeelwimi ezili-11. Yaye kulo nyaka uphelileyo umdlalo wendibano waveliswa ngeekhasethi zevidiyo ngentetho yezandla eyaseBrazil, eyaseJapan eyaseKorea neyaseMerika. Oku kwenziwa ukuze isigidimi esinika ubomi seLizwi likaThixo sifikelele kubantu abaninzi kangangoko kunokwenzeka.
Ukwabelana ngenyaniso yeBhayibhile nabantu abathetha isiCreole lolunye ucelomngeni. IsiCreole lulwimi oluye lwakho ngenxa yomxube weelwimi ezimbini okanye ngaphezulu, yaye senziwe lula. Siye salulwimi oluphambili lwabantu yaye sibonisa inkcubeko yabo. Kanti ke, ngokuqhelekileyo abantu abathetha isiCreole abakwazi kusifunda. Noko ke, amaNgqina kaYehova ngabafundisi, ngoko ke eMauritius naseRéunion, bafunda ukufunda nokubhala isiCreole sasekuhlaleni ukuze bakwazi ukufundela abantu ngolwimi lwabo lomthonyama baze nabo babafundise ukuba benze okufanayo. Ekubeni kwakungekho mgaqo wokubhalwa kolwimi lwesiCreole eMauritius naseRéunion, uMbutho uye wavelisa umgaqo wokubhalwa kwalo ofanelekileyo. Uhlelo lwesiCreole lwencwadana ethi Apply Yourself to Reading and Writing nethi Yintoni UThixo Ayifunayo Kuthi? lwashicilelwa njengezixhobo zobulungiseleli. Emva kokuba beqalise ukuzisebenzisa, omnye udade wanikela ingxelo yokuba uqalise izifundo zeBhayibhile ezitsha ezihlanu. Omnye umzalwana wathi: “Ukususela oko sasebenzisa ezi zixhobo zitsha, sifumanisa ukuba abantu abafundisisa nathi baziqonda bhetele iingcamango eziseLizwini likaThixo. Nangona bengasifundi ngokutyibilika isiCreole, xa sibafundela, ingongoma bayiqonda ngokukhawuleza.”
Omnye uthunywashe wokufikelela abantu abangakumbi ngeendaba ezilungileyo lilungiselelo lokuhanjiswa koncwadi elenziwe lula. UYehova uye walusikelela ukholo oluye lwaboniswa ngabakhonzi bakhe kule nkalo. Abantu bayachazelwa ngelungiselelo lomnikelo wokuzithandela, kodwa uncwadi aluhlawulelwa. Ukususela ngoJanuwari 2000, eli lungiselelo lasetyenziswa nakwamanye amazwe ebelingekasebenzi kuwo. Isebe laseCentral African Republic labhala: “Oku kuthetha ukuba nabani na, enokuba injani imeko yakhe yezoqoqosho, anganayo incwadi ukuze abe ngumfundi kaKristu. Eli lungiselelo liye laxatyiswa kakhulu ngabavakalisi nangabantu.” I-Indonesia yathi: “Abazalwana bakhangela abo banomdla wokufunda iimpapasho zethu ngaphezu kwabo banokuhlangabezana neendleko zokushicilela.” Isebe laseMzantsi Afrika lanikela ingxelo ethi: “Ukuveliswa kwamaphephancwadi kuye kwaphindaphindeka kabini, ezinye iilwimi ziye zaphindaphindeka kane! . . . Konke oku kubonisa ukuba ngoku kuhlwayelwa ‘iimbewu’ engakumbi yenyaniso kunanini na ngaphambili.—Mat. 13:3-8.”
Enye inkalo yomsebenzi wonyaka ibandakanya ukuthumela oovulindlela abakhethekileyo bokwexeshana kwimimandla ethile kangangexesha elithile. Oku kwenze kwangenelwa nabantu ekungekanikelwa bungqina kubo. ICôte d’Ivoire inikele ingxelo entle. Amagosa athile esixeko akuvuyela ukubakho koovulindlela yaye ayengafuni ukuba mabahambe. ESipilou, isekela likasodolophu lababonelela ngendawo yokuhlala ngesisa laze labavumela basebenzisa ibala lalo ukuze baqhube iintlanganiso. Xa aba dade babini bangoovulindlela bafumana isabelo eTiemelekro baya kuthi ndlela-ntle kusodolophu, waphendula wathi: “Aninakuyenza loo nto! Aninakusuka nje nihambe ngaloo ndlela . . . . Ndicinga ukuba nenze abafundi ngezi nyanga zintathu. Kungeso sizathu lento nize kum ukuze nifumane umhlaba wokwakha icawa yenu. Ngoku ndikulungele ukuninika loo mhlaba. Ndicela nindazise abantu abaza kungena endaweni yenu!”
AmaNgqina amaninzi aye axhakamfula namathuba okwabelana nabantu abebengenakufikeleleka ngenyaniso yeBhayibhile. Omnye udade owayehlala kwiMarshall Islands wamkela umsebenzi wokuba ngumfundisi-ntsapho kumaphandle aseJaluit, wafumanisa ukuba wayekuphela kweNgqina elalikho kweso siqithi. Waqhubeka eshumayela ngenzondelelo kubo bonke abamelwane bakhe, eqhuba izifundo zeBhayibhile ezisithoba yaye eqhuba neentlanganiso zeveki nganye kwelo qela. Xa isicaka solungiselelo esasivela eMajuro saya kunikela intetho yeSikhumbuzo sokufa kukaKristu ngoAprili 19, kwakukho abantu abali-175. Lo dade ukwanti wamema abantu abaninzi kangangoko kunokwenzeka kwesi siganeko. Ukuze kuncedwe aba bantu bakhule ngokomoya, umzalwana nomfazi wakhe ngoku baceba ukufudukela eJaluit ukuze basebenze nalo dade ulapho.
“Ukuthetha Ngenkalipho” Ukuze Koyiswe Inkcazelo Ephosakeleyo
AmaKristu enkulungwane yokuqala ayeqhelene nempikiswano. Ngokomzekelo eIkoniyo, xa indimbane enkulu yamkela iimfundiso zobuKristu, abachasi ‘baxhokonxa abantu beentlanga, babafaka umoya ombi abazalwana.’ Kunokuba barhoxe, uPawulos noBharnabas “bachitha ixesha elide bethetha ngenkalipho ngegunya likaYehova.”—IZenzo 14:1-7.
Nanamhlanje abachasi bayaqhubeka bexhokonxa izimvo zabantu nxamnye namaNgqina kaYehova, maxa wambi besebenzisa amaziko eendaba okanye amanye amajelo kawonke-wonke ukuze bahambisele phambili iinjongo zabo. Isabela koku, iOfisi Yemicimbi Yezangaphandle eseBrooklyn nezinye ezininzi Zemicimbi Yezangaphandle ezikwiiofisi zamasebe oMbutho zichitha ixesha elininzi zichaza ngenkalipho eyona nyaniso kubahleli bamaphephandaba, iintatheli, nabanye.
Ngokomzekelo, ngoMeyi 2000 uMbutho walungiselela i-video entsha ethi, Transfusion-Alternative Strategies—Simple, Safe, Effective, ukuze iboniswe kwingqungquthela yezonyango eGeneva, eSwitzerland. Le video iquka udliwano-ndlebe olwenziwa noogqirha abathile abaziingcaphephe ehlabathini nemiboniso yenkqubo esetyenziswayo kutyando ngaphandle kwegazi. Yayibonisa oogqirha bezonyango baseYurophu iindlela zokunyanga amaNgqina kaYehova kunye nabanye ngaphandle kwegazi. Bengachithanga xesha oogqirha ababekho apho bafaka izicelo zeevideo ezimalunga nama-300.
EBelgium, kwalungiselelwa incwadi yembali ngokuphathelele ukusetyenziswa kwegama likaYehova kwiinguqulelo zeBhayibhile. Le ncwadi yabalaselisa umsebenzi wabaguquleli nabashicileli bokuqala, abanjengoWilliam Tyndale, kunye nemiqobo abajamelana nayo ekwenzeni iBhayibhile ifumaneke kuluntu ngokubanzi. Phakathi kweendwendwe ezazilapho kwakukho nabafundi abasuka kwizikolo ezili-13.
Kunyaka odluleyo eBrazil kwakukho abantu abangaphezu kwama-70 000 ababetyelele uMboniso owawuhambahamba wePurple Triangles. AmaNgqina kaYehova ayenethemba lokuba, njengakwi-Ikoniyo yakudala, abantu abayi kuvumela abo bagqwetha izibakala ukuba bazenze mnyama iingqondo zabo kodwa baya kuphulaphula ngomdla xa bechazelwa iinyaniso zeBhayibhile.
‘Ukuzimisela Ngokusemthethweni Iindaba Ezilungileyo’
Ngokuvisisana nomzekelo owamiselwa ngumpostile uPawulos ‘wokuzithethelela nokuzimisela ngokusemthethweni iindaba ezilungileyo,’ kunyaka odluleyo amaNgqina kaYehova akumazwe awahlukahlukeneyo anikel’ ingqalelo kwimibandela yezomthetho. (Fil. 1:7) Kwiindawo ezinjengeAzerbaijan, iBenin, iRomania neSweden, amaNgqina kaYehova amkelwa ngokusemthethweni, kungekhona njengomanyano kodwa njengonqulo, ngaloo ndlela efumana inkuselo enkulu phantsi kwemithetho eqinisekisa inkululeko yonqulo.
Noko ke, kwiRiphabliki yaseGeorgia, ekwimida yeBlack Sea, abachasi bazabalazela ukukurhoxisa ukubhaliswa ngokusemthethweni kwamaNgqina kaYehova. Kwityala lelinye lamaNgqina kaYehova, isango lenkundla lalizele kungekho nendawo yokuhamba ngamalungu aneembono ezigabadeleyo eCawa yobuOthodoki yaye ngomsindo engavumi ukuba kungene nabani na ongavumiyo ukuncamisa umnqamlezo owenziwe ngomthi awayewuphakamisile. Ebudeni boko kwakuqhubeka, imifanekiso yonqulo neminqamlezo eyenziwe ngomthi yayiphakanyiselwe phezulu, yaye ngexesha lekhefu enkundleni kwakuvutha amakhandlela ezibhambathiso. Kwavuk’ umlo ngaphakathi enkundleni njengoko amalungu aneembono ezigabadeleyo ayehlasela amagqwetha, abacholacholi beendaba kunye namaNgqina kaYehova. Abazalwana baseGeorgia baye babhena kwiNkundla Ephakamileyo yaseGeorgia ngenxa yezigqibo ezenziwa nxamnye nabo, benethemba lokuba apho izinto ziya kwenziwa ngokusengqiqweni kuze kuvele nenyaniso. Ngelo xesha, abavakalisi abangama-14 855 banikela iiyure ezizizi-2 887 835 kulo nyaka befundisa abantu inyaniso ekhululayo yeLizwi likaThixo.
Ityala lenkundla eMoscow, eRashiya, elalenzelwe ukuphelisa ilungelo lamaNgqina kaYehova lokumelwa ngokusemthethweni kweso sixeko alikagqitywa. Okwangoku, abazalwana baseMoscow abakanikwa mvume yokwakha iiHolo zoBukumkani ezifuneka ngakumbi. Noko ke, ngoNovemba 23, 1999, iNkundla Yomgaqo-siseko yaseRashiya yawisa isigwebo ngokuvumelana nabo. Sabangelwa lityala elalibekwa lona iBandla laseYaroslavl. Ngenxa yokuba eli bandla lingakhange libhalise njengelikhoyo apho kwisithuba seminyaka eli-15, nto leyo eyayifunwa ngumthetho kunqulo ngowe-1997, amagunya asekuhlaleni ayefuna ukuba eli bandla liyeke ukufumana uncwadi lonqulo kwamanye amazwe nokulusasaza, nokuba umzalwana owayesuka eJamani awuyeke umsebenzi awayewenza kweso sixeko. Inkundla yagqiba kwelokuba oko kwakufuneka kweminyaka eli-15 kungasebenzi kumabandla ayinxalenye “yentlangano yonqulo” ebhaliswe ngokusemthethweni kwelo lizwe, njengaleyo yamaNgqina kaYehova. ISebe Lezobulungisa laseRashiya lavuma ukuwabhalisa kwakhona amaNgqina kaYehova ngoAprili 29, 1999. Ngoxa loo mibandela yayisesezandleni zeSebe Lezomthetho, kunyaka odluleyo abavakalisi baseRashiya banikela iiyure ezingakumbi ezingama-24 782 467 kubulungiseleli basesidlangalaleni. Banikela ingxelo yolwando lwabavakalisi abasi-7 ekhulwini baza bafikelela incopho yabavakalisi abangama-114 284.
Nabazalwana baseFransi baqhubeka bejamelene neemeko ezinzima. Kule minyaka mine idluleyo, inkundla yamatyala iye yafikelela kwizigqibo ezivumelana nabo ezingama-921 yaza inkundla yesibheno yafikelela kwezingama-65 kumbandela wokuba bangayihlawuli irhafu yesiza seeHolo zoBukumkani. Ngenxa yesibheno esinamandla esabangelwa ngumthetho weSebe Lerhafu nxamnye nezo zigqibo, lo mbandela wasiwa kwiFrench Conseil d’État, eyona nkundla iphakamileyo yolawulo yaseFransi. NgoJuni 23, 2000, loo nkundla yagqiba kwelokuba phantsi komthetho waseFransi, amaNgqina kaYehova alunqulo yaye ngaloo ndlela isiza seeHolo zawo zoBukumkani asiyi kuhlawulelwa irhafu. Okubaluleke ngakumbi kukuba inkundla yavakalisa ukuba izinto ezenziwa kwiHolo yoBukumkani “zingachasani nemithetho karhulumente.” Noko ke, kwiintsuku nje ezili-11 kamva, kwelinye ityala lokuxhasa iSebe Lerhafu ekunyanzeleni irhafu yama-60 ekhulwini ethatyathwa kwiminikelo yezinto zonqulo lwamaNgqina kaYehova eFransi, inkundla yamatyala yaseNanterre yakhupha umthetho obhaliweyo wokuba amaNgqina kaYehova awanakukhululeka ekuhlawuleni irhafu ekubeni engelulo unqulo olwamkelekileyo ngokusemthethweni eFransi. Abazalwana balungiselela ukwenza isicelo kwiNkundla Yesibheno yaseVersailles. Okwangoku, iNational Assembly yaseFransi iqulunqa umthetho wokuba naliphi na ihlelo lonqulo ukuba olo nqulo okanye iinkokeli zalo zikhe zagwetywa izihlandlo ezibini enkundleni lichithwe. Ngoxa iintshaba ‘zaziyila inkathazo ngommiselo,’ amaNgqina kaYehova ayethembele kuMgwebi Omkhulu, lowo baya kuphendula kuye bonke abantu.—INdu. 94:20; Roma 14:10.
Ukuzalisa Imfuneko Engxamisekileyo YeeHolo ZoBukumkani
Njengoko liqhubeka lisanda inani labantu abamthandayo nabamkhonzayo uYehova, kukho imfuneko enkulu yeeHolo zoBukumkani abanokuhlanganisana kuzo ukuze banqule. Ukuze zihlangabezane nale mfuneko, sithetha nje iiOfisi Zokwakha IiHolo ZoBukumkani ZeNqila ziyasebenza kwiiofisi zesebe zoMbutho eBrazil, eJamani, eMexico, eMzantsi Afrika naseOstreliya. Abazalwana abafanelekayo abasuka kwezi ndawo, batyelela amanye amasebe ukuze bawancede aqalise ucwangciso oluvumelana nemigaqo yentlangano ngokweemfuno zawo. Okwangoku, kuncedwa amazwe angama-72 aseAsia/Oceania, eMpuma nakwiNtshona Afrika, eMpuma Yurophu, kuMbindi noMzantsi Merika, nakwiziqithi zaseCaribbea.
Abakhonzi bezizwe ngezizwe abangaphezu kwe-100 baxakekile beqeqesha abazalwana basekuhlaleni ukuze basebenze kunye kumazwe abakuwo njengaMaqela Okwakha IiHolo ZoBukumkani. Ngenxa yeli lungiselelo, sithethanje sele kugqitywe iiHolo zoBukumkani ezingama-453 kumazwe angama-30, yaye zingama-727 ezisakhiwayo. Kuye kwagxininiswa ekwenzeni iiplani zeeHolo zoBukumkani ezisexesheni kwilizwe ngalinye elinezinto nendlela yalo yokwakha. EKenya kusetyenziswa amatye ambiweyo; eTogo ngokuqhelekileyo kusetyenziswa izitena; eCameroon abantu abaninzi basebenzisa izitena zesamente eziye zityatyekwe kamva. Ngale ndlela, abazalwana basekuhlaleni bayakhawuleza ukuba nobuchule obufunekayo ukuze bakwazi ukwenza imisebenzi ephambili kwilungiselelo lokwakha lelo lizwe.
Njengoko abazalwana abakumazwe ahlukeneyo besiva ngoko kwenziwayo, abaninzi baye banomnqweno onzulu wokufak’ isandla. Abazalwana noodade abaninzi abafanelekayo basekuhlaleni baye bazenza bafumaneka. Kumazwe athile, apho iimeko zasekuhlaleni zibabangela bangakwazi ukufak’ isandla, kwenziwa amalungiselelo okuba kufumaneke ukutya nendawo yokuhlala ukuze abo baye bamkelwa bakwazi ukunikela ingqalelo epheleleyo kulo msebenzi ungxamisekileyo wokwakha nokuhlaziya iiHolo zoBukumkani ezikumazwe abo.
Oku kwakhiwa kweeHolo zoBukumkani kunayiphi imiphumo kumsebenzi wamaNgqina kaYehova ekuhlaleni? Nantsi ingxelo evela eBenin, eNtshona Afrika: “Niya kukuvuyela ukwazi ukuba iHolo yoBukumkani yaseKrake ibinikezelwa izolo. Eli bandla linabavakalisi abangama-34 liba nabantu abakumlinganiselo wama-73 ngeCawa, kodwa bebengama-651 abebekho kunikezelo. Kwilixa elidluleyo abazalwana bale dolophu baye banyamezela inkcaso enkulu nogculelo kuba iHolo yoBukumkani abebenayo ngaphambili ibindala gqitha xa ithelekiswa neecawa ezithile. Ngoku iHolo yoBukumkani entsha yenye yezona zakhiwo zintle kule dolophu. Inkoliso yabo bebezile ngabantu bale dolophu ngoku abayitshintshileyo imbono abebenayo emva kokuba bezibonele ngawabo amehlo oko kunokwenziwa ngabazalwana kwiiveki nje ezimbalwa.” IBandla laseNafisi eMalawi lithi: “Ekubeni ngoku sineHolo yoBukumkani entle, inikela ubungqina obucokisekileyo. Ngenxa yoko, kulula ukuqalisa izifundo zeBhayibhile xa ushumayela. Abantu beendawo ngeendawo bakhwankqisiwe.”
Ngenxa yolwando lweminyaka yakutshanje, kuye kwakho imfuneko enkulu yeeHolo zoBukumkani eLiberia. Noko ke, abazalwana babengenandlela yokwakha. Kunzima kwaukuhlawulela iindawo zabo ezincinane abahlala kuzo. Kwiindawo ezininzi babehlanganisana kwimizi yabazalwana, apho xa kukho abantu abaninzi bebephumela esitratweni. Kungenjalo, babehlanganisana kwindawo ebonakala isisakhiwo sokwexeshana. Kwakubonakala kungekho sicombululo sale ngxaki de kwafika iindaba ezabangel’ imincili zokwakhiwa kweeHolo zoBukumkani kumazwe anobuncwane obungephi. Iminikelo yabazalwana abakwamanye amazwe yayisetyenziselwa ukwakha iiholo apho zifuneka ngokwenene khona. Kwiinyanga ezintandathu ezidluleyo besekwakhiwe iiholo ezintlanu. Abazalwana baye babonisa ‘ulangazelelo’ abanalo phezu kwako nje ukuba ‘ziimpula zikaLujaca’ ngokunikela ngamandla abo kulo msebenzi. (2 Kor. 8:12) Ngokomzekelo, iBandla iNew Georgia lenza izitena zesamente ezingaphezu kwe-1 000 ngezandla ngosuku nje olunye!
Izakhiwo ZeSebe Ezitsha Nezandisiweyo
Ukuze kunyanyekelwe inani elandayo lamaNgqina kaYehova nokuze axhotyiselwe ubulungiseleli, kwakhona kuye kwafuneka izakhiwo ezifanelekileyo zesebe. Uninzi lwazo luye lwanikezelwa kulo nyaka udluleyo. Kwihlabathi lonke ezi zakhiwo ziye zazaliswa ngabalungiseleli abamiselweyo abangama-19 587, bonke abangamalungu eNkqubo Yabakhonzi Abakwinkonzo Ekhethekileyo Yexesha Elizeleyo.
EMZANTSI AFRIKA: Izakhiwo zesebe eziseKrugersdorp zazibonakala ngathi zinkulu ngokungeyomfuneko emva kokugqitywa kwazo ngowe-1987. Kwakutheni ukuze kwiminyaka nje eli-12 kamva, banikezele isakhiwo esandisiweyo seofisi, izakhiwo ezintathu zendawo yokuhlala ezintsha, igaraji yeelori kunye nendawo enkulu yokugcina iimpahla?
Esinye isizathu yinkululeko ebhekele phaya abayinandiphayo abantu bakaYehova ngenxa yokuphela kweMfazwe Yomlomo. Kwavulwa umsebenzi wamaNgqina kaYehova kumazwe afana neRwanda, iMalawi, iMozambique kunye neAngola. Ukususela ekugqityweni kwezakhiwo zesebe ngowe-1987, amazwe alishumi apho uMzantsi Afrika uthumela iimpahla khona aye anolwando olusisimbuku sabavakalisi esili-148 ekhulwini! (kuloo minyaka ili-12 eMozambique kuphela kuye kwakho ulwando lwama-523 ekhulwini.)
Ukongezelela, ukumiselwa korhulumente omtsha waseMzantsi Afrika nokupheliswa kobuhlanga kwaphumela kwinkululeko enkulu yokuhambela kwamanye amazwe aseAfrika. Ngaloo ndlela isebe laseMzantsi Afrika liye lenza okungakumbi ekuthumeleni iimpahla kumasebe akufutshane. Ukongezelela ekushicileleni amaphephancwadi, iincwadana ezinemifanekiso, kunye nezinye izinto, eli sebe ligcina iincwadi lize linyamekele iiodolo zamabandla akumazwe amaninzi akufuphi. Njengoko kusakhiwa iiHolo zeNdibano neeHolo zoBukumkani ngamandla amakhulu eAfrika, amasebe angakumbi afumana impahla yokwakha eMzantsi Afrika.
Ezinye izibakala kukuba: Ukususela ngowe-1987 nomhlaba weli sebe laseMzantsi Afrika uye wavuyela ulwando lwabavakalisi boBukumkani olungama-62 ekhulwini. Kwakhona, kwiminyaka embalwa edluleyo kuye kwafuneka kwandiswe iSebe Lokuguqulela ngenxa yomsebenzi owongezelelekileyo wokuguqulela iBhayibhile kwiilwimi ezisixhenxe zasekuhlaleni—isiBhulu, iSepedi, iSesotho, isiTsonga, isiTswana, isiXhosa nesiZulu. Akumangalisi ke ngoko ukuba kuye kwafuneka kwandiswe iindawo ezibalulekileyo zeli sebe laseMzantsi Afrika.
Ngaloo ndlela, ngo-Oktobha 23, 1999, kuye kwanikezelwa izakhiwo ezandisiweyo zeli sebe laseMzantsi Afrika. Owayekho ngeso sihlandlo yayinguDaniel Sydlik, ilungu leQumrhu Elilawulayo, owanikela intetho echukumisayo enomxholo othi: “Unikezelo Lubonisa Uzuko LukaThixo.”
EJAPAN: Kwiiveki ezimbalwa kamva, ngoNovemba 13, kwanikezelwa izakhiwo ezandisiweyo zesebe ezise-Ebina, eJapan. Ezi zaziquka izakhiwo ezibini ezinemigangatho eli-12 zendawo yokuhlala kunye nesakhiwo sezinye iinkonzo esinemigangatho emi-4. Abakhonzi abanobuchule abasuka kumazwe ngamazwe abangama-70 nabangamatsha-ntliziyo bekunye nabasebenzi basekuhlaleni abangama-2 000 abasebenza ixeshana nabasebenza ixesha elide bawugqiba loo msebenzi kwisithuba seminyaka emithathu enesiqingatha.
Olu cwangciso lokunikezelwa lwenziwa kwiminyaka engama-50 emva kokufika kwabavangeli basemazweni bokuqala beWatch Tower eJapan emva kweMfazwe Yehlabathi II. Abanye babo bavangeli basemazweni, abasakhonza eJapan, babekho kwesi sihlandlo, kunye nabo bonke abaveleli abahambahambayo baseJapan, abanye abamkhonze ixesha elide uYehova, kunye neendwendwe ezingama-344 ezisuka kwamanye amazwe angama-37.
Ukufika kwabavangeli bokuqala eTokyo baza baphinda bawuqalisa umsebenzi wokushumayela emva kweMfazwe Yehlabathi II, babeligcuntswana kuphela abanquli abathembekileyo bakaYehova eJapan. Sithethanje, kukho abavakalisi boBukumkani abakhutheleyo abangaphezulu kuma-221 000 abasasaza iindaba ezilungileyo kuyo yonke imimandla yelo lizwe. Ukongezelela, eJapan kushicilelwa uncwadi lweBhayibhile ngeelwimi ezingama-27 luze luthunyelwe kwamanye amazwe, yaye ngolwalathiso lweQumrhu Elilawulayo, eli sebe linceda amazwe aseAsia ngokuthe ngqo kumsebenzi wasentsimini.
Kwintlanganiso ekhethekileyo eyayingosuku olulandela olonikezelo, uTheodore Jaracz, ilungu leQumrhu Elilawulayo, wathetha nabaphulaphuli abangama-61 323 eYokohama International Stadium. Bebonke ababehlanganisene apho yayingabantu abangama-269 376 ababesuka kwiindawo zelo lizwe ezingama-41. Ucwangciso olwaluquka iingxelo ezazinikelwa ziindwendwe ezivela kumazwe angaphandle kunye nentetho eyayinikelwa nguMzalwan’ uJaracz enomxholo othi “Ukufundiswa NguYehova—Kuyingenelo Namhlanje Nangonaphakade,” zabakhuthaza ngamandla bonke ababekho ukuba baqhubeke besenza inkqubela ngokomoya.
EBENIN: Eli lizwe laseNtshona Afrika lizingqina liyintsimi enemveliso kwisivuno sokomoya. Linabavakalisi beendaba ezilungileyo abangama-6 343, yaye abangaphezu kwesiqingatha kwaba babhaptizwa ebudeni beminyaka yee-1990.
Ukuze kukhonzwe esi sihlwele sikhulayo sabanquli kunye nabo baseNiger, ngoJanuwari 1, 2000 kwanikezelwa isakhiwo sesebe esitsha, iHolo yeNdibano entsha, kunye nekhaya labavangeli basemazweni eAbomey-Calavi, eBenin. UGerrit Lösch, olilungu leQumrhu Elilawulayo, wasebenzisa esi sihlandlo ukuze agxininise iingongoma ezimbini ezibalulekileyo: (1) Esona sizathu siyintloko sokuba sikhonza uYehova, asilothemba lethu lokufumana ubomi obungunaphakade, kodwa kungenxa yokuba simthanda. (2) Funda iLizwi likaThixo iBhayibhile yonke imihla. Ezinjani ukusebenziseka izikhumbuzo!
EMYANMAR: Kwiiveki ezimbalwa emva konikezelo olwaluseBenin, kwanikezelwa izakhiwo zesebe ezitsha eMyanmar. Ngowe-1947 kwamiselwa iofisi yesebe entsha apho. Ngowe-1977 uMbutho wafumana isiza sokwakha izakhiwo ezifanelekileyo. Kodwa kwafuneka koyiswe imiqobo enzima! AmaNgqina kaYehova ayengabhaliswanga ngokusemthethweni, ngoko ayeza kuyifumana njani imvume yokwakha? Kwakunokuthunyelwa iimpahla zokwakha ezisuka kwamanye amazwe, kodwa kwakuza kwenziwa njani oko, ekubeni kungekho nanye intlangano eyakhe yanikwa imvume yokwenza oko? Kwakhona kwakunzima ukuba abazalwana abavela kwiindawo ezikude beze kunceda, ekubeni iimpepha-mvume zokuhambela umsebenzi onjalo zazinikwa abeze kumsebenzi oxhaswa ngurhulumente kuphela. Ngaphezu koko, elinye ibhinqa laya enkundleni libanga umhlaba obusetyenziswa nguMbutho kangangeminyaka engaphezu kwama-20. Noko ke, ngequbuliso zonke ezo ngxaki zaphelel’ emoyeni. Inkqubo karhulumente yatshintsha kwinto yonke eyayingumqobo. Yaye njengoko kwakuqalisa ukwakhiwa, inkundla yalikhaba ibango lelo bhinqa elalifuna ukuthabathela kulo loo mhlaba.
Inkoliso yezinto zokwakha zazisisipho esasisuka kubazalwana baseOstreliya; ezinye zisuka eMalaysia, eSingapore naseThailand. Kwafika abazalwana ababevela eBritani, eFiji, eGrisi, eJamani, eNew Zealand, eOstreliya naseUnited States beze kuncedisa kulo msebenzi, nabazalwana basekuhlaleni bafaka isandla. NgoJanuwari 22, 2000 xa kwakunikezelwa izakhiwo ezigqityiweyo, kutyelele uJohn E. Barr, ilungu leQumrhu Elilawulayo, ababekho baziva benyanzelekile ukuba bathi: “Kukhulu esikwenzelwe nguYehova. Siye sanemincili.”—INdu. 126:3.
Oko kuyibonisa kakuhle indlela avakalelwa ngayo amaNgqina kaYehova asehlabathini lonke njengoko ekhumbula iziganeko ezenzeke kunyaka odluleyo.
[Umfanekiso okwiphepha 6]
“Isiprofeto SikaIsaya—Ukhanyiselo Lwalo Lonke Uluntu” sakhululwa nguSamuel Herd
[Imifanekiso ekwiphepha 6]
Umdlalo weBhayibhile “Imizekelo Esisilumkiso Kumhla Wethu”
[Umfanekiso okwiphepha 8]
EHungary iindwendwe zavuyiswa kukukhululwa kweBhayibhile entsha
[Umfanekiso okwiphepha 14]
AmaNgqina avuyileyo ahlanganisana egaraji eKosovo
[Imifanekiso ekwiphepha 24]
IHolo YoBukumkani eseKrake, eBenin—ngaphambi nasemva
[Imifanekiso ekwiphepha 27]
(1) EMyanmar, (2) eBenin, (3) eMzantsi Afrika, (4) eJapan