Yaakoobe ni Esawu Yaahitthikela Waataana

Yaakoobe aahithanla orowa okhala nttetthe wa oHarani, Yehova aahilotta ni owo anlaiheraka wiira ammukhapelela, nkhama dhiidhaale aankhapelenle iye Abrahaamu ni Isaakhi. Ni tiyeelo yairanen’ye, Yaakoobe ahithela ni aahaayara anamwane awaatta ni aahikhalana mihakhu dhawaatta.

Nuuvira okathi Yehova aahinleela Yaakoobe wiira: ‘Ntthikele elapo ya anaan’yari nnyu.’ Ndho Yaakoobe ni emudhiye yaahipacera weetta nkwaha etthikelaka elapo ya anaan’yari-ye. Nuumala-vo Yaakoobe aahidhuwela wiira Esawu anuura okumana ni veene ni arumeyi 400! Yaakoobe aahoova vawaatta okhala wiira uupuwela wiira Esawu aammwiiriha etthu yootakhala vamodha ni emudhi-ye. Tivondho aahinvekela Yehova airaka: ‘Safatali Yehova nkoopole mmatatani wa muuluupale aka.’ Mmelommwa, Yaakoobe aahimunnyereriha Esawu itthu dhawaatta nkhama iputthiputthi, ipuri, imompe, ikamelo, ikhavalo ni abuuru nkhama dhoovaha.

Ohiyu-ya yoole okathi Yaakoobe aari iye meekhe, aahoona nlaikha! Ndho aahipacera owana ni nlaikha nne ohiyu wootheene. Yaakoobe aahoona owereya vawaatta, masi hata ori dhiidho veene khahin’ye owanana. Nlaikha naahinleela Yaakoobe wiira: Nkihiye kirowe, Yaakoobe ahakhula nlaikha wiira: Nkinoohiyani, mpakha nkivahe mareeliho primeeru.

Wokhidheranwa, nlaikha nne naahinreeliha Yaakoobe. Ndho Yaakoobe aahoona wiira khatthuneya omoova Esawu.

Ohiihiyu-ya yoole Yaakoobe aahimoona Esawu araaka ottaiwene ni arumeyi-ye 400. Yaakoobe aahirowa okumana ni Esawu noomala omwattamela, aahikokhora ivaara 7 ohoolowe. Ndho Esawu aahintthimakela ni yaahikhuparelana. Nuumala Yaakoobe ni Esawu othikela waatana, awo yaahinla vawaatta. Nyuwo nnoonela dhai, niire Yehova aahihakalala mwaha wa Yaakoobe ophuka nxankiho ole?

Nuumala-vo Esawu aahitthikela owannye, ni Yaakoobe aahitthikela weetta nkhwaha arowaka elapo ya anaan’yari-ye ni nhoolo-mwa Yakoobe ahikhalana anamwane 12. Madhina a anaamwane awo yaari ala: Ruubeni, Simeyooni, Levi, Yuuda, Daani, Nefetali, Gaadi, Aaseri, Isakaari, Zebulooni, Yooseefe, ni Benxamim. Mmodha a anamwane awo Yehova aahinrumeela wiira oopoole emudhi ele ya vamekhaya. Mwana owo ari anii? Apanke dhai elo? Niroowe noone.