Yaakoobe Aahaakhela Irithi dha Eyuulupale

Okathi Isaakhi aariyena miyakha 40 aahindhuwela Rebeka ni aahinthela. Isaakhi animpheta vawaatta Rebeka. Noovira okathi vakhani, Rebeka aahaayara anamwane aili mapapho.

Mwaana oopacera oyariwa aaitthaniwa Esawu ni anaaili aaitthaniwa Yaakoobe. Esawu aaniviriha okathi wawaatta ari mwiini, okhala wiira waanindhivela osaaya. Masi Yaakoobe waandhivela okhalihera miteko dha vaate.

Esawu, ari mwaana oopacera oyariwa. Ndho mwaha awa elo, veene aahikhalana edireitu ya orithi itthu dhawaatta onxira Yaakoobe. Munnidhuwela irithi eseeni? Irithi itthu dhootheene ntthu onhiyeriwa iye ni apaapa-ye yakhwa, nkhama imatta ahindho nsurukhu. Khalai, irithi idho dhaahela mpuwa itthu Yehova aanlaihenra iye Abrahaamu. Esawu khavaha efaita dholaihera idho, masi Yaakoobe aanivaha efaita yawaatta.

Nihiku nimodha Esawu aaronwe iye osaya, aahitthikela owaani akhulumunwe ni avoliwe. Nuumala ophiya aahipacera woona wunkhela eyooca Yaakoobe aapen’ye iye, ndho akalotta wiira: ‘Nkirere ovooliwa! Nkivahe eyooca vakhaani kice!’ Yaakoobe aahaakhula wiira: ‘Kihiwa, masi kinawovahani akhala wiira nnokithumihera eyuulupale nnyu.’ Esawu aahaakhula wiira: ‘Miyo nkinoona nteko envara awa eyuulupale aka! Nyuwo pooti ohalana dhootheene Yaakobe. Miyo kintthuna oca pahi.’ Niire wiira Esawu aahuupuwela saana apakaka etthu ele? Naari. Esawu aahaakakhanyiha etthu yootepa otthuneya ni eparathu emodha ya eyooca.

Okathi Isaakhi uuluvanle iye, aahoona wiira waahiphiya okathi wa onreeliha mwane oopacera Esawu. Masi okhala wiira Yaakoobe aahithuma edireitu ya okhala muulupale, Rebeka aahinkhalihera wiira areelihiwe veene. Okathi Esawu aadhuwenle iye elo, aahinanariwa vawaatta aakatthuna omwiipha Yaakoobe. Okhala wiira Isaakhi ni Rebeka yaanitthuna onkhapelela Yaakoobe, yaahinleela wiira atthyawele wa Labaano, nrokoriye Rebeka, mpakha Esawu omaaleleya. Yaakoobe aahiiwelela miruku dha anaan’yari-ye.