Yawiiraneya ya Yoobi

Elapo ya Owuuzi, aahikhala nlopwana mmodha ooreera nrima ni aankokhorela Yehova. Ndhina-ne aaitthaniwa Yoobi. Owo aari nlopwana oothaciri ni aahikhalana emudhi yuulupale. Veene aari ntthu ooreera nrima ni aanaakhalihera atthu oohaawa, anaankweli ni anamwane yaharina adhipaapa-ya. Masi niire atthu ooreera nrima nkhama Yoobi dhinnaphwanya mixankiho?

Yoobi khaadhuwela wiira Satana dhaaninnanara itthu dhooreera aapaka iye. Masi Yehova aahidhuwela elo ni aahinkoha Satana wiira: ‘Seeni nnimweettelela nnyu nrumeyi aka Yoobi? Khaavo ntthu oniira itthu dhooreera valaponi onxira owo. Owo onnikiiwelela okathi wootheene ni onnipaka itthu dhooreera.’ Satana aahakhunla airaka: ‘Ekhweeli wiira owo onnookokhorelani. Masi owo khampaka elo mwaha wawoophetani; owo onniroromeleya okhala wiira munnimwaakihera khuta okathi ni khannanhiye dhinkhumelelaka itthu dhootakhala. Ni nyuwo munninreeliha munvahaka itthu dhawaatta dhooreera nkhama imatta ni inama. Masi mmweehererye mmoone akhala wiira owo khanhiya woororomelani.’ Yehova aahimwaakhula wiira:’ Mmwiirele itthu dhootheene muntthuna nnyu, masi nhimwiiphe.’ Seeni Yehova aamwaakhulelinhe iye Satana omweehererya Yoobi? Okhala wiira Yehova aaninroromela vawaatta Yoobi. Yehova aanidhuwela wiira Yoobi khaahiya okhala nxirikha-ye ata okathi wooxankiha.

Ndho Satana aahipacera onkhumihera mixankiho Yoobi. Woopacerani Satana aahiiriha inama dha Yoobi wiiyiwa ni weeyeliwa ni mooro. Ni arumeyi-ye yaasukiha inama idhe yaahuukhwa. Moottharelana Satana aahipaka etthu yootepa owereya, okathi anamwane a Yoobi yaathukumanne awa vamodha epakaka efeesta, Satana aahiiriha empa yeele yaathukumanna awa ana-ye Yoobi omora, ndho anamwane ale ootheene yaahukhwa. Yoobi aahiriipiwa nrima vawaatta, masi ata eri dhiidho, owo khaahin’ye okhala oororomeleya wa Yehova.

Satana khaahin’ye onkhumihera mixankiho Yoobi, ndho aahimwiiriha Yoobi ompwanya makhwatta oowereya erutthu-ye yootheene. Yoobi khaadhuwela nthowa-na dhaankhumelela awa mixankiho idhe dhootheene. Masi ata eri dhiidho, owo khaahi’ye ororomeleya wa Yehova, ni mwaha wa elo Yehova aahihakalala vawaatta.

Nuumala-vo, Satana aahaarumeela alopwana araru yaawo yari axirikha-ye Yoobi wiira yankhulumule elotta itthu dhawoothiwa. Awo yaalontte wiira Yoobi aahipaka itthu dhootakhala, tivondho Muluku aankhumihera iye mixankiho idhe. Yoobi aahaakhula wiira: ‘Miyo nkipanke ata etthu yootakhala.’ Vakhaani-vakhaani Yoobi aahipacera wuupuwela wiira Yehova taankhumihera mixankiho idhe. Tivondho aalontte iye wiira Yehova aaninthokorerya moohixariya.

Nlopwana aitthaniwa Elihu aaruumaala akaawiriyana atthu ale elottaka. Owo aahaakhula wiira: ‘Itthu atthu alontte awa ti dhawoothiwa. Hiyo pooti ohiiwasasa nthowa ninmwiiriha Yehova onhiya nxankiho ola okhumelelaka. Nikhupali wiira owo kahi tonkhumihera itthu dhootakhala. Owo onnoona itthu dhootheene iniiraneya ni onnaakhalihera atthu ale anviriha mixankiho.’

Nuumala-vo Yehova aahinkoha Yoobi wiira: ‘Seeni munkivaha nnyu nthowa? Akhala wiira khanniiwasasa moopora kipatunse aka erimu ni elapo, mun’ya owerya dhai wiiwasasa nthowa-na inookhumelelaawani itthu idho?’ Yoobi aahaakula wiira: ‘Ekhweeli, nyuwo mwa ntthu oowerya elapo yootheene. Miyo ka ntthu pure, nkidhuwele ata etthu. Nkilevelele mwaha wa itthu dhootheene kilontte aka.’

Nuumala-vo Yehova aahivoliha makhwatta a Yoobi ni aahinvaha itthu dhawaatta oxira idhe aariiyena khalayi. Yoobi aahikhala miyaakha dhawaatta ni aari oohakalala. Yehova aahipaka elo mwaha wa wiira Yoobi khaahinye okhala oororomeleya ata okathi wooxankiha. Khi nyuwo? Munnitthuna wiira Yehova ahakalale ni nyuwo? Akhala wiira ti dhiidho nhihiye okhala nxirikha a Yehova ata nvirihaka mixankiho.