Yehova Aahinthanla Yooxuuwa

Moise aahakhapelela Aisarayeeli mwa miyaakha dhawaatta, masi mooripiha nrima, ekumi-ye yaahiphiya wookhidherani. Yehova aahinleela wiira: ‘Kahi nyuwo mun’ya waakusa Aisarayeeli para Elapo Yoolaiheriwa, yeelo kolaihenrakani. Masi kinawoohiyani wiira moone elapo elo.’ Ndho Moise aahinvekela Yehova wiira anthanle ntthu nkina wiira ahale aakhapelelaka Aisarayeeli. Ndho Yehova aahinthanla Yooxuuwa.

Moottharelana, Moise aahaaleela Aisarayeeli wiira moohilekela aankhwa, ni aahaleela-tho wiira Yehova aahinthala Yooxuuwa wiira aakhalihere ophiya oKanaani elapo yeelo atthu yaalaiheriwa awa. Moise aahinleela Yooxuuwa wiira: ‘Nhoove, Yehova onawookhaliherani.’ Moottharelana, Moise aahiwela odhulo wa mwaako Neebo, Yehova aahinhiya wiira oone elapo yeelo anlaihenra iye Abrahamu, Isaakhi ni Yaakoobi. Moohilekela Moise aahuukhwa ariina miyaakha 120.

Yehova aahinleela Yooxuuwa wiira: ‘Nlapuwe nrathi Yordaani, nrowe oKanaani. Miyo kinawookhaliherani nkhama kankhaliheraka Moise. Nkhalena yoolema ya osoma khuta nihiku malamulo kavanhaka Aisarayeeli. Nhoove ni nkhale oolipa nrima. Nrowe ni mpake itthu dhootheene koorummakani wiira mpake.’

Moottharelana, Yooxuuwa aahaaruma alopwana aili wiira erowe yaahottele epoma ya oYeriko. Yawiiraneya enttharelana, ninoohudha itthu dhikina dhairanen’ye weeiwo. Okathi anamahottela ale aili yaatthinka awa, yalontte wiira: Ola okathi wooreerela wiira nirowe oKanaani. Mmeelom-mwa, Yooxuuwa aahaaleela Aisarayeeli wiira ekhale oolikanene wiira elapuwe nratthi Yordaani. Owo aahaaleela anankuttho wiira yaakunse ekaaxa ya waataana wiira ehoole. Okathi yaaphin’ya awa nratthi Yordani, yaahona wiira yaahikhalamo maadhi ni waari wawoopiha olapuwa. Masi noomala anankuttho onyakela maadhi ale, nratthi ole waahiweleela! Anankuttho ale yaahetta mpakha variyari ni yeemela wiira yaalipelele Aisarayeeli ootheene olapuwa. Khamunkhupali wiira mwiiriirya ole waahiwuupusera Aisarayeeli etthu Yehova aapanke iye nlima noosera?

Nuumala ovira miyaakha dhaawaatta, wookhidheran-wa, Aisarayeeli yaahiphiya elapo yaalaiheriwa awa. Awo yaanwerya oteka mampa-ya ni waala mittaikho yaatthuna awa. Elapo ele yaari yooreera ni yaaniruweryeya vawaatta.