Rahaabi Aahaavitha Anamahottela

Okathi anamahottela yaaphin’ya-wa epooma ya oYeriko, yaamanke ettheko ya nthiyana aitthaniwa Rahaabi. Nuumala mwene a oYeriko odhuwela elo, aahaaruma atoropa-ye wiira erowe owannye Rahaabi yaakoce anamahottela ale ni yaatthukele. Okathi atoropa ale yaaphin’ya-wa, Rahaabi aahaleela anamahottela ale wiira yiipithe otatharini. Moottharelana owo aahaaleela atoropa ale wiira anamahottela aarowa, masi mwaatthimakela mwawaakuveya woonawene nnawaphwanya. Atoropa nookhuma owo aahaaleela anamahottela wiira: ‘Atthu kinawaakhalihera okhala wiira koodhuwela wiira Yehova ori naatthu veena ni atthu anoopwetesa epoma ela. Masi safatali, atthu ekilaihere wiira anookoopola miyo vamodha ni amudhaka okathi atthu an’ya awa opwetesa epooma ela.’

Anamahottela ale yaahimwaakhula Rahaabi wiira: ‘Ninnoolaiherani wiira atthu ootheene an’ya okhala mpanimwinyu anawoopowa.’ Masi wiira elo yiraneye ntthave nkhoyi mpwehe vaxanelani.

Moottharelana, Rahaabi aahaakhalihera anamahottela ale otthyawa eviraka vaxanelani ni yaahirowa wiipitha omwaako mahiku mararu. Nuumala anamahottela ale onleela Yooxuuwa itthu dhootheene, yaahilapuwa nratthi Yordani. Ndho, nttetthe Aisarayeeli yaaya-wa otuphela moottharelana waari oYeriko. Yehova aahaleela Aisarayeeli orumiha mikhitto yaapheelaka epoma ele ekhwaha emodha khuta nihiku. Awo yaahaapheela mpakha mahiku 6. Nihiku na 7, awo yaahaapheela nttetthe ole ikhwaha 7. Ndho anankuttho yaahoopa malope ni Aisarayeeli ootheene yaahinyakula ni ikuru-dha dhootheene, ndho makokoro a oYeriko yaahimora! Masi empa ya Rahaabi yeelo yaari waattamela makokoro ale khiyaamonre, okhala wiira Rahaabi aahinroromela Yehova ni aahipaka itthu dhootheene aaleeliwe iye ni anamahottela ale. Mwaha wa elo, owo aahopola ekumi-ye ni ekumi ya emudhi-ye.