Etempulu ya Yehova

Okathi Salomooni aakhanle iye mwene a wIsarayeeli, Yehova ahinkoha wiira: ‘Salomooni muntthuna wiira koovaheni eseeni?’ Salomooni ahaakhula wiira: ‘Yehova, miyo karapasi nkhani, ni nkindhuwela itthu dhawaatta. Safatali, nkivahe akhili wiira kiwerye oweettiha atthu nnyu.’ Okathi Yehova aiwale iye nivekelo na Salomooni, ahilootta wiira: ‘Okhala wiira nyuwo nkivekenle akhili, miyo kinawookhalihani nlopwana awaatta akhili valaponi. Nitho nyuwo nnookhala thaaciri. Akhala wiira khamunhiya okiiwelela nnokhalana ekumi ya miyaakha dhawaatta.’

Salomooni ahipacera oteka etempulu. Owo ahirumeela itthu dhootepa oreera wiira ateke etempulu. Alopwana ni athiyana oodhuwela yaanikhalihera otekiwa etempulu. Noovira miyaakha 7, etempulu yaahimalihiwa otekiwa. Ndho waahiphiya okathi wiira Salomooni anvahererye etempulu ele Yehova. Ndho ahikusa dhoovaha dhootheene apweha vAaltari akokhora akanvekela Yehova airaka: ‘Oo Yehova, Nyuwo nri opuro wuulupale ni wooreera oxira etempulu ela, masi safatali mwaakhelele okokhorela wihu ni mavekelo nimpaka nhu opuro ola.’ Moodhuwela etthu Yehova aapanke iye wiira oonihere wiira aahidhiveliwa ni etempulu ele? Salomooni amalakaru ovekela, Yehova aahimorosa mooro wiirimu ni waaheyela itthu dhootheene dhaari vAaltari. Okathi aIsarayeeli yoonne awa ele yaahihakalala vawaatta.

Mwaha wa akhili mwene Salomooni aariyena ahiikhala ntthu oovuwa. Atthu a ilapo dhoovirikana yaanirowa wa Salomooni wiira aakhalihere ophuka milattu-dha. Hata pwiyamwene yoowo aakhala elapo yoothaiwene ya oSaba, aahirowa omweehererya ankohaka itthu dhawaata wiira adhuwele akhala wiira mweekhweli aahikhalana aakhili. Noomala olootta ni Salomooni, piyamwene owo aalontte wiira: ‘Okathi kaaleeliwaaka voohima dha akhili nnyu nkaaminni, masi nennava kihaamini wiira mweekhweeli Yehova Muluku nnyu onnookhaliherani.’ Okathi ole, wIsarayeeli ekumi yaari yooreera ni atthu yaari ohakalala. Masi mohilekela itthu dhahirukunuwa.