Omwene Waahikawanyiwa

Okathi Salomooni aamwiwelela iye Yehova, aIsarayeeli yaanikhalana nrettele. Masi Salomooni ahaathela athiyana yahaakhanle aIsarayeeli yaawo yahaankokhorela Yehova. Vakhaaani-vakhaani, Salomooni aahihiya omwiwelela Yehova, apacera waakokhorela amuluku aamalapo. Ndho mwaha wa elo, Yehova aahinanariwa vawaatta ni aahinleela Salomooni wiira: ‘Kinoowaakhani omwene wa wIsarayeeli ni omwene owo onookawanyiwa ipaarti piili. Epaarti yuulupale kinoonvaha nrumeyi nnyu, masi mwaninyu on’ya ohalana epaarti ekhaani pahi.’

Nihiku nimodha, nrumei-ye Salomooni yoowo aaitthaniwa Yerobowaamo okathi etta iye nkhwaha-ye, aahikumana ni proffeeta Ahiya mphuroni. Profeeta owo ahipera nlaya-ne ipaarti 12, moottharelana akanleela Yerobowaamu wiira: ‘Yehova onoowakha omwene wa wIsaryeeli amudhi a Salomooni ni onookawanya ipaarti piili. Ndho nkuse ipaarti idha 10, okhala wiira ti nyuwo mun’ya okhala mwene a mahimo 10.’ Okathi mwene Salomooni adhuwenle iye elo, ahilakela omwiipha Yerobowaamu! Tivondho Yerobowaamu ahitthyawela wEexiitu. Miyaakha dhaattharelana, Salomooni aahuukhwa, ndho mwane aaitthaniwa Robowaamu ahikhala mwene. Noomala Yerobowaamu odhuwela elo aahitthikela wIsarayeeli.

Makhulupale a wIsarayeeli yaahinleela Robowaamu wiira: ‘Akhala wiira nnawathokorerya saana atthu ala, awo khenne ehiye owiwelelani.’ Masi axirikha a Robowaamu yaawo araaraiyena khalayi yaahinleela wiira: Nyuwo nhamorele ikharari hata vakhaani atthu ala! Mwaacerere miteko atthu an’ya awa ekavara! Robowaamu aahiwelela miruku dha axirikha-ye atepaka waahadhula atthu. Ndho mwaha wa elo, atthu a wIsarayeeli yahinrukunuwela. Moottharelana, mahimo 10 a wIsarayeeli yahinthanla Yerobowaamu wiira akhale mwene-ya. Masi mahimo maili, yaahihala yeettihiwaka ni Robowaamu. Ndho mahimo 12 a wIsarayeeli yaahikawanyiwa ipaarti piili, yaawo nholomwa yaadhuweliwa okhala omwene wa wIsarayeeli ni omwene wa oYuda.

Yerobowaamu khaatthuna wiira atthu yankokhorele Yehova oYerusaleemu, weiwo alamulela iyewo Robowaamu. Nyuwo moodhuwela nthowa-na? Okhala wiira owo oova atthu onrukunuwela ni onthanla Robowaamu wiira akhale mwene-ya. Tivondho Yerobowaamu aahipaka imompe piili dha ewooru ni aaleela atthu wiira: ‘oYerusaleemu attaivawo, atthu ekankokhorela Yehova vaava.’ Atthu yaahipacera okokhorela imompe idhe dha ewooru ni yahinliyala Yehova.