Yehova Aahinkhapelela Eliya

Noomala Yezabeeli oleliwa itthu dhawiiranenle maprofeeta a Bayaali, ahinanariwa vawaatta ni ahilotta wiira ammwiipha Eliya okhala wiira owo ahiwiipha maprofeeta a Bayaali. Noomala Eliya wiiwa elo ahoova vawaatta ni ahitthyawa arowaka moothakoni. Eliya ari nkhukuni, ahinvekela Yehova airaka: ‘Yehova, miyo nkinverya-tho ovilela, safatali nkihiye kikhwe.’ Mwaha wa Eliya okhulumuwa, ahimpaathi nkhitto wa nttaikho.

Yehova aahiruma nlaikha wiira nankhalihere Eliya, ndho nlaikha nne nahinvenyiha Eliya niiraka: ‘Eliya nvenye nce.’ Noomala Eliya ovenya ahoona ephaawu ni nrinki wa maadhi. Ndho aahikhuura ephaawu ele awurya maadhi ni atthikela-tho wumpaathi. Noovira okathi vakhaani, nlaikha nne naahitthika nikanvenyiha-tho niiraka: ‘Ntthikele-tho okhuura ephaawu ela wiira nkhalena ikuru dhaweetta nkwaha.’ Eliya noomala okhuura ephaawu ele aahikhalana ikuru dhaweetta mahiku 40 othana ni ohiyu mpakha omwaako Horeebi. Noomala ophiya aahivolowa nkhukuni wa mwaako ole ampaathi. Masi Yehova anixankiheya ni Eliya ni aahinkoha wiira: ‘Eseeni enwiirihani otthyawa?’ Eliya ahaakhula wiira: ‘Oo Yehova aIsarayeeli aahiya woorumeelani nkhama yoolaihenraawani. Awo aawiipha maprofeeta ootheene ni nenna-va antthuna okiipha miyo.’

Yehova aahinruma Eliya wiira akhume nkhukuni ni eemele vadhulu va mwaako. Ndho Yehova aahimooniha owerya-we. Woopacerani yaahoopa ettheku yaawaatta, moottharelana Yehova aahikhumihera etetere ni mooro. Wookhidheranwa Eliya ahiiwa ndhu nilottaka vathi-vathi, noomala-vo Eliya ahiikhunela omaithonwe ni ahiikhuma nkhukuni. Ndho Yehova ahitthikela-tho onkoha wiira: Eliya aseeni enwirihani atthyawa? Eliya ahaakhula wiira: Okhala wiira kihanle meekhaka pahi kookokhorelakani! Yehova ahimwakhula Eliya wiira: ‘Nyuwo khanhanle meekhi nnyu, aakhalawo atthu 7.000 wIsarayeeli ankikokhorela.’ Moottharelana Yehova aahinruma Eliya wiira anthanle Elisewu wiira akhale profeeta nipuro-ne. Mwawaakuveya Eliya aahirowa opaka itthu dhootheene aarumwe iye ni Yehova. Nnoonela dhai, niire Yehova onawokhaliherani akhala wiira nnopaka itthu dhootheene onooruma iyeni? Mohaakanyera, akhala wiira ninoopaka itthu dhootheene Yehova onniruma iye owo onoonilipiha ni onoonikhapelela. Nenna-va nirowe noone eseeni yaakhumelenle miyaakha idhe dhootheene yahaarupa awa epula.