Weehereryiwa Omwaako Karmeelu

Omwene wa wIsarayeeli wa maloko 10, yaahikhalawo mamwene ootakhala, masi Akaabi aahitepa. Owo aahinthela nthiyana ootakhala ni ankokhorela Bayaali. Ndhinane airiwa Yezabeeli. Akaabi ni Yezabeeli yaahidhaliha okokhorela wa Bayaali elapo ele ni owiipha maprofeeta a Yehova. Etthu seeni Yehova aapanke iye? Owo ahinruuma profeeta Eliya wiira anvahe nhupi Akaabi.

Eliya aahinleela mwene Akaabi wiira mwaha wa itthu dhothakhala ompaka iye, wIsarayeeli onoohiyawo orupawo epula. Mwa miyaakha miraru, itthu dhawaaliwa khaikannuwa ni atthu ekaanvoliwa etala. Noovira okathi, Yehova aahinleela profeeta Eliya wiira atthikele wa Akaabi. Okathi mwene Akaabi amonne iye Eliya aahilotta wiira: ‘Itthu dhootheene idha dhiniraneya mwaha wa nyuwo.’ Eliya ahaakhula wiira: ‘Itthu idha dhinniraneya mwaha wa wiira nhaleela atthu ootheene wiira ekankokhorela Bayaali. Masi nipake etthu wiira nimoone taani ori Muluku a ekhweeli. Mwaatthukumanye atthu ootheene ni maprofeeta a Bayaali omwaako Karmeelu.’

Atthu ootheene yaahirowa omwaako Karmeelo. Mootharelana Eliya ahaaleela wiira: ‘Olelo atthu enthanle Muluku an’ya awa ekankokhorela. Nipake etthu wiira nimoone taani ori Muluku a ekhweeli. Maprofeeta ootheene 450 a Bayaali ekocihere nkuttho-ya ni miyo-tho kinookocihera nkuttho para Yehova. Muluku yoowo on’ya oruma mooro wiira weyele nkuttho, yoowo tori Muluku a ekhweeli.’

Maprofeeta ootheene a Bayaali yaahikocihera nkuttho-ya. Awo yaahiviriha ohiyu ntero emwitthanaka Bayaali, masi Bayaali khaakhula hata vakhaani! Ndho Eliya ahipacera waatheya maprofeeta ale, aloottaka wiira: ‘Kinoona wiira Bayaali onoorupa. Atthu etthikele-tho omwitthana yilipihaka noone akhala wiira onoovenya.’ Waahila ni maprofeeta ale yaahivikaniha omwiitthana, masi hata etthu khiyaairaneya.

Moottharelana, Eliya aahipwehavo vAaltari nkuttho-ye ni aahiitthelavo maadhi awaatta. Nuuvenya ahinvekela Yehova airaka: ‘Oo Yehova, safatali nwonihere atthu ootheene ari vaava wiira nyuwo pahi tinri Muluku a ekhweeli.’ Okathi-ya yoole, Yehova aahimorosela mooro vAaltari ni weeyela nkuttho ole. Mwaha wa elo, atthu ootheene yaahikhupali wiira Yehova pahi toori Muluku a ekhweeli. Ni nihikuna nenne maprofeeta ootheene 450 a Bayaali yahiiphiwa.

Okathi neeku nikhaani nakhumelenla awa mpahari, Eliya aahinleela Akaabi wiira: ‘Ennura epula yawaatta. Nkuse ekaro nnyu nrowe owaani.’ Odhulu wootheene-wo wahikhuneliwa-wo ni meeku, yaanoopa etheku yawaatta ni yaahipacera orupa epula yawaatta. Mohakalaliha, yaahitthikela orupa epula wIsarayeeli. Akaabi anettiha ekaro-ye vawaatta ni aweryelaiyevo. Masi Eliya, akhaliheriwaka ni Yehova anitthyawa vawaatta oxira ekaaro ya Akaabi! Masi Eliya anviriha-tho mixankiho dhiikina.