Toropa ni Mwaamwali a wIsarayeeli

WAasiriya ahikhala mwaamwali mmodha a wIsarayeeli, yoowo akusiwe ni atoropa a wAasiriya enroiha elapo yoottaivela ni amudhi-ye. Owo ahikhalihiwa nrumeyi a mwaara a Namaani, yoowo ari nkhulupale a atoropa. Owo tanrumeela Yehova pahi meekhe elapo ele.

Namaani yaahimphanya eretta yoohirya yelo yahoonona erutthu-ye yootheene. Masi mwaamwali ole mwIsarayeeli anitthuna vawaatta onkhalihera. Tivondho owo ahaaleela amwaari-ye Namaani wiira: ‘Miyo kinnindhuwela ntthu on’ya owerya waapenusa amamuninyu. WIsarayeeli, okhalawo profeeta a Yehova, yoowo onoowerya waapenusa amamuninyu.’

Mwaara a Namaani, ahaleela itthu dhootheene amamune aleeliwe iye ni mwaamwali ole. Namaani anitthuna vawaatta openusiwa, tivondho aahirowa okumana ni Eliseewu wIsarayeeli. Okhala wiira Namaani aidhoona okhala ntthu ooteepa otthuneya, owo alipelela wiira Eliseewu taa’ya olootta ni veene. Masi ohiya opaka elo, Eliseewu ahinruma nrumei-ye orowa onleela Namaani wiira: ‘Nrowe onratthini Yordaani mwapwine ivaara 7, mwaira dhiidho nnoopenuwa.’

Namaani khiyandhivenle hata vakhaani moolumo ale. Ndho owo ahilootta wiira: ‘Miyo kuupuwela wiira profeeta owo aya okipenusa akiphweheraka matata-ye ni anvekelaka Muluku-ye. Ohiya-vo, miratthi dha wAasiriya ti dhootepa oreera oxira idhe dha wIsarayeeli wenno. Seeni yahaakiruma awa wiira karape mirathi dheidhe dha wuuwu?’ Noomala-vo Namaani ahikhuma owannye Eliseewu anaanariwe vawaatta.

Masi arumei-ye yahinkhalihera wuupuwela saana ni yaahinkoha wiira: ‘Nyuwo khimwaalontte wiira mwampaka itthu dhootheene mwaya nnyu onrummwa wiira mpenuwe? Itthu porofeeta ola onoorumaiyeni ti dhookhweya. Ndho seeni nhimpaka nnyu?’ Namaani aahipaka itthu dhootheene aleeliwe iye ni arumei-ye. Owo aahivenya arowa onratthini Yordaani ni ahiphwina ivaara 7. Okathi Namaani akhumme iye mmaadhini mmwe evaara yookhidhera, ahoona wiira veene ahipenuwa moomalela. Namaani ahihakalala vawaatta ni ahitthika wiira anxukhurele Eliseewu airaka: ‘Nenna-va kookhupali wiira mweekhweli Yehova Muluku ekhweeli.’ Niire munnaakanyera moopora mwaamwaali ole a wIsarayeli ahakalanla iye, noomala omoona Namaani atthikaka ni apenusiwe moomalela?