Daniyeeli Ari Nlittini wa Amwatto

Mwene nkina a oBabilooniya aitthaniwa Daariyu, ari a oMeediya. Daariyu ahoona wiira Daniyeeli ari ntthu ooreera nrima. Owo ahinkhaliha Daniyeeli nkhulupale wiira akaholela atthu ottittimihiwa a elapo ele. Masi atthu awo yaaninkhalela nrima Daniyeeli ni yanitthuna vawaatta opaka etthu wiira emumule. Awo yaahidhuwela wiira Daniyeeli aaninvekela Yehova ivaara thaaru vanihikuni. Ndho mwaha wa elo, awo yahinleela Daariyu wiira: ‘Mwene, nkhumihere nlamulo ninlotta wiira atthu ootheene ekookokhorelani nyuwo pahi. Akhala ntthu on’ya ohiiwelela nlamulo nno ariheliwe nlittini wa amwatto.’ Miruku idhe dhaahindhivela Daariyu ni aahikhumihera nlamulo nne.

Okathi Daniyeeli aadhuwenle iye wiira mwene aahikhumihera nlamulo nne, aahirowa owannye akokhora vaxanelani akanvekela Yehova. Atthu ale yankhalela nrima Daniyeeli, yaahivolowa owannye wiira enthuramele, ndho yaahimphwanya avekelaka. Ndho awo yaahitthimaka eyaaka onleela mwene wiira: ‘Daniyeeli khaniiwelela nlamulo ninyu. Owo onninkokhorela Muluku-ye ivaara thaaru khuta nihiku.’ Masi mwene Dariyu aanimpheta vawaatta Daniyeli ni khaatthuna omwiipha. Ndho mwaha wa ele, nihiku nootheene nne aahikocakoca enamuna yoomwaakiha Daniyeeli. Masi khiwaweryaneya okhala wiira veene taakhumihenre nlamulo nne. Tivondho, aahaaruma arumeyi-ye wiira enrahele Daniyeeli nlittini wa amwatto.

Ohiyu-ya yoole, Dariyu aahixanka vawaatta mwaha wa Daniyeeli aahikawerya orupa. Mmeelom-mwa ohiihiyu, Dariyu ahitthimakela olittini iwe. Ndho nuumala ophiya, aahimwitthana Daniyeeli airaka: ‘Daniyeeli, niire Muluku nnyu oowoopolani?’

Daniyeeli aahaakhula wiira: ‘Miyo kankumi! Yehova ooruma nlaikha-ne nenno nittiyenle iyano dha amwatto.’ Nuumala omwiiwa Daniyeeli, Daariyu aahitteeliwa nrima vawaatta. Ahiruma okhumihiwa Daniyeeli nlittini wa amwatto. Owo ahikhuma nlittini mmwe wa amwatto ahiirihiwe etthu yootakhala. Moottharelana mwene ahaaruma makwarta-ye wiira: ‘Yaraheliwe nlittini atthu yale yaamootherya Daniyeeli opaka itthu dhootakhala. Okathi atthu ale yaariheliwa awa, mohilekela yahikhuuriwa ni amwatto.’

Nuumala-vo Daariyu ahikhumihera nlamulo nikina airaka: ‘Atthu ootheene ahaana omoova Muluku a Daniyeeli, owo oomoopola Daniyeeli nlittini wa amwatto.’

Nyuwo munninvekela Yehova khuta nihiku nkhama aaira iye Daniyeeli?