Moolumo Yaatikhiwe Vasirini

Noovira okathi, Belsazare aahikhaliwa mwene a oBabilooniya. Ohiyu omodha, owo aahipaka efeesta ni ahaalaleya atthu ootepa otthuneya a oBabilooniya. Ndho owo aahaaruma aruumeyi-ye oruuha ikoopho dha ewooru Nabukodonosori aakunse iye ntempulu mwa Yehova. Belsazare ni atthu ootheene yalaleiwe yaaniwurerya ikoopho idhe yaavuwihaka amuluku-ya. Mootutusera, nahikhumelela ntata na ntthu ni nahipacera waatika vasirini moolumo ootikiniha esaala yeele atthu yaapakawa efeesta.

Nuumala woona ele, Belsazare aahoova vawaatta. Ndho aahiwiitthana anahako-ye ni aahaalaihera wiira: ‘Ole on’ya okitaphulela moolumo ala, onokhala nkhulupale aneeraru a oBabilooniya.’ Awo yaahilipihera otaphulela moolumo ale, masi khaavo aawenrye. Masi pwiyamwene mmodha aahirowa esaala ele ni aahinleela mwene wiira: ‘Ookhala nlopwana oniitthaniwa Daniyeeli aataphulenle dhooloha dha mwene Nabukodonosori, owo onoowerya otaphulela moolumo ala.’

Daniyeeli ahirowa wa mwene, ni Belsazare aahinleela wiira : ‘Nyuwo mwaweryaru osoma ni okitaphulela moolumo ala, kinawoovahani ekolaare ya ewooru ni kinawookhalihani nkhulupale aneeraru a oBabilooniya.’ Daniyeeli ahakhula wiira: ‘Nkintthuna dhoovaha dhinyu, pooti ohalana itthu dhinyu, masi kinawooleelani ele entaphulela awa moolumo ala. Apaapa nnyu Nabukodonosori yaahidhinnuwiha, masi Yehova ahaayeviha. Nyuwo moodhuwela itthu idho dhootheene. Masi ata eri dhiidho nyuwo monveiha Yehova nwureryaka eviinyu ikoopho dha Ntempulu-mwe. Tivondho Muluku aatinkhe iye wiira: Mene, Mene, Tekel, ni Peres. Moolumo ala antaphulela wiira Babilooniya onoopwetesiwa ni atthu a oMeediya ni oPeersiya, nitho nyuwo nnoohiya okhala mwene.’

Waakhala nkama wiira khaavo aawerya ontuphela Babilooniya. Esidadi ele, yaahikhalana nikokoro noottaivela odhulu ni yaarukuryeriwe ni nratthi waawiisa. Masi ohiyu yoole yaciwa awa efeesta, anakhotto a oMeediya ni oPeersia yaahituphela oBabilooniya. Kiiru mwene a oPeersiya, ahihapusa madhi a nratthi ole; ndho anakhotto ale, yaahiwerya olapuwa evolowaka esidadi ele. Okathi yaaphin’ya awa, yaaphwannye mikhora dhohuleyadhene! Ndho anakhotto ale yaahintuphela Babilooniya, ni yaahimwipha mwene Belsazare! Ndho, Kiiru aahikhala mwene a oBabilooniya.

Noovira mwakha mmodha, Kiiru ahilaleya wiira: ‘Yehova ookiruma ontekela etempulu-ye oYerusaleemu. Akhala ntthu ontthuna okhalihera nteko owo pooti orowa.’ Nkhama dhiidhaale Yehova aalaihenre iye, aYuuda awaatta yaahithikela elepo-ya noovira miyakha 70 okhuma vaavale Yerusaleemu aapwetesiwe iye. Kiiru aahitthikihera ewooru, eparatha ni ikoopho dha ewooru dheidho mwene Nabukodonosori akunse iye Ntempulu. Munniwerya woona mopora Yehova aanrumeenle iye Kiiru wiira awoopole aYuuda ale?