Yeesu Ari Rapasi

Yooseefe ni Mariya yaakhala oNazareeti vamodha ni Yeesu. Awo yaahikhalana anamwane akina anaalopwana ni anaathiyana. Yooseefe aari kalapinteero, masi ata eri dhiidho owo aanaahudhiha atthu a vatthekonve Malamulo a Yehova. Emudhi ya Yooseefe yaahikhalana yoolema ya onkokhorela Muluku oSinakooka, ni yaanipaka elo khuta mwaakha yeettaka nkwaha woottaiva erowaka oYerusaleemu wiira yampake Paaskowa.

Okathi Yeesu aariiyena iyaakha 12 veene ni amudhi-ye yaaheetta eyaaka oYerusaleemu nkhama yaalamalenla awa. Epooma ele yaahidhala atthu mwaha wa niira na paaskowa. Okathi paaskowa ole aamanle iye, atthu ootheene yaahipacera weetta nkwaha etthikelaka owaani, ndho awo yuupuwela wiira Yeesu aari ekhurupu yeelo yeettaawana nkwaha. Ndho yaahirowa onkoca ni waakoha amudhi-ya masi khiyaamphwannye.

Yooseefe ni Mariya yaahitthikela oYerusaleemu, eviriha mahiku mararu enkocaka Yeesu masi khiyaamphwannye; tivondho yaahilakela orowa otempulu. Ndho yaahimphwanya Yeesu akilaanthi eriyari ya ahudhihi awiriyanaka Nuulumo na Muluku ni aapakelaka makoho ootepa otthuneya alipa yaahudhiha ntempulu. Ahudhihi ale yaahitikinihiwa vawaatta ni Yeesu ni yaahipacera ompakela makoho ni yaanihakalala mwaha wa moopora aawaakhula iye, awo yaahoona wiira Yeesu aaniiwasasa saana Malamulo a Yehova.

Yooseefe ni Mariya yaahixanka vawaatta, ndho Mariya aahinkoha Yeesu wiira: ‘Hiyo noowaadhyani mapuro ootheene, mwaari vaai?’ Yeesu aahimwaakhula wiira: ‘Khimwaadhuwela wiira kaanitthuneya okhala mpaani wa Tiithi aka?’

Yeesu aahitthikela oNazareeti ni anaan’yari-ye. Ndho Yooseefe aahinhudhiha nteko wa okalapinteero, Yeesu aaninnuwa ni akhili ni okathi wootheene atthu yaanidhiveliwa nuuwo. Ni Yehova aanihakalala mwaha wa itthu Yeesu aapaka iye. Munniwerya wuupuwelela mikhalelo seeni Yeesu aariiyena okathi ole.