Nhupi wa Yoohaani Mpatisa

Yoohaani mwaana a Zakariiya ni Elisabeeti, aahikhala profeeta. Vaavo annunwe iye Yehova aahinthanla Yoohaani wiira aaleele atthu wiira aanra Mesiya. Ohiya Yoohaani waahudhiha atthu nsinakooka aahindho nsidadi, owo aalaleerya moothakoni. Tivondho atthu awaatta a oYerusaleemu ni oYudeya yaaninkoca Yoohaani wiira aahudhihe. Owo anaahudhiha atthu wiira yaatthunaka ondhiveliha Muluku, yaahaana ohiya opaka itthu dhootakhala. Nuumala atthu wiiwa ele Yoohaani aalotta iye atthu yaanittharuwa ni owo anaapatisa atthu awo Nratthi Yordaani.

Yoohaani khaarina itthu dhawaatta. Owo aawara ikuwo dhaapakiwe ni moori a ekameelo, aakhuura itororope ni aaca oravo. Masi hata eri dhiidho atthu yaanitthuna ondhuwela. Ata aFarise ni aSadukhi yaawo yaari awiidhinnuwiha yaanirowa olotta ni Yoohaani. Masi Yoohaani anaaleela wiira: ‘Nhuupuwele wiira mwa atthu ootepa otthuneya waaxira atthu akina, nyuwo munnitthuneya oottharuwa ni orukunsa nrima.’

Atthu aawaatta yaaninkoha yiiraka: ‘Nipake eseeni wiira ninhakalalihe Muluku?’ Ndho Yoohaani aniwaakhula wiira: ‘Mwakhalana malaya maili nimodha munvahe ole ohaana.’ Munnidhuwela nthowa naamwiiriha Yoohaani olotta dhiidho? Okhala wiira aatthuna waahudhiha atthareli-ye wiira yaatthunaka onhakalaliha Muluku, yaahaana waapheta atthu akina.

Yoohaani ahaaleela alipa ooliviha nsokho wiira: ‘Nhilivihe oxira nkhama nrummwe nnyu.’ Nitho aahaaleela atoropa wiira: ‘Nhimoopopihe ntthu ntthunaka oomwaakha nsurukhu-ye.’

Anankuttho vamodha ni alevi yaahinkoha Yoohaani wiira: ‘Nyuwo mwaani? Atthu ootheene antthuna odhuwela.’ Yoohaani ahiwaakhula wiira: ‘Miyo ka yoole onwaataaniha atthu ni Yehova nkhama aalontte iye Yeesaaya.’

Atthu aawaatta yaanidhiveliwa ni itthu Yoohaani aahudhiha iye, ndho atthu yaaninkoha akhala wiira Yoohaani aari Mesiya. Masi owo aaniwaakhula wiira onoora nkina okixinre miyo. Miyo nkimphwanela otaphula mikhoyi dha isapatu-dhe. Miyo kimpatisa ni maadhi, masi ole onra on’ya akapatisa ni nnepa wawaarya.