Yeesu Aahikhala Mesiya

Yoohaani aanilaleerya airaka: ‘Onoora ntthu ootepa otthuneya okixira miyo. ‘Okathi Yeesu aariiyena iyaakha 30, aahirowa nratthi Yoordani yoowo Yoohaani aapatisaiyewo atthu. Yeesu aahinvekela Yoohaani wiira ampatise, masi Yoohaani aahimwaakhula wiira: ‘Miyo nkimphwanela woopatisani, nyuwo mphwanenle okipatisa miyo.’ Ndho Yeesu aahinleela Yoohaani wiira: ‘Yehova ontthuna wiira nyuwo nkipatise’. Nuumala-vo oowaili yaaheemela mmaadhini ni Yoohaani aahimpatisa Yeesu moomalela.

Yeesu akhumakaru mmaadhini aahipaka nivekelo. Okathi-ya yoole erimu yaahihuleya ni nnepa wawaarya waahinkhuruwela Yeesu nkhama epompa. Nuumala-vo Yehova aahilotta ni Yeesu airaka: ‘Nyuwo mwa mwanaka kinimpheta aka vawaatta, miyo kinnidhiveliwa ni nyuwo.’

Ndho okhuma okathi-ya yoole Yeesu aahikhala Kiriistu ni Mesiya. Ndho okathi ole, Yeesu aari oolikana ene wiira avare nteko aarummwe iye ni Yehova.

Nuumala Yeesu opatisiwa aahirowa moothakoni akhala mwemmo mahiku 40. Nuumala otthika Yeesu aahirowa okumana ni Yoohaani, nuumala Yoohaani omoona aahilotta wiira: ‘Ola Mwaapwittipwitthi a Muluku yoowo onttipiha itampi dha nlaponi.’ Yoohaani aahilotta moolumo ala wiira aadhuwelihe atthu wiira Yeesu aari Mesiya. Masi okathi Yeesu aari iye moothakoni yaahinkhumelela etthu emodha. Munnidhuwela etthu yaankhumelenle? Noone yawiiraneya enttharelana.