Satana Aahimweehererya Yeesu

Yeesu amalakaru opatisiwa, nnepa wawaarya waahinroiha moothakoni. Owo aahiviriha mahiku 40 ahiciye etthu, ndho mwaha wa elo owo aahivoliwa vawaatta. Ndho Diyaabu ahuura akamweehererya alottaka wiira: ‘Mweekhweeli nyuwo mwaari Mwaana a Muluku, ntatuse maluku ala wiira ekhale iphaawu.’ Masi Yeesu aahimwaakhula aromolaka nlamulo nimodha na Muluku airaka: ‘Kahi eyoocaru pahi emmwiiriha ntthu okhala nkumi. Masi tho wiiwelela moolumo ootheene a Yehova onnivaha ekumi.’

Moottharelana Satana aahitthikela tho omwehererya Yeesu ekwaha ya naili airaka: ‘Mweekhweeli nyuwo mwaari Mwaana a Muluku, ntuphele vathi vale, ehaatikhiwa wiira Muluku onooruma malaikha-ye wiira yookhapeleleni.’ Masi Yeesu aahimwaakhula aromolaka nlamulo nimodha na Muluku airaka: ‘Ehaatikhiwa wiira nhimweehererye Yehova Muluku nnyu.’

Satana aahimweehererya tho Yeesu ekwaha ya neeraru amooniheraka omwene wootheene wa nlaponi, alootta wiira: ‘Miyo kinawoovahani Omwene ni ovuwa wootheene wa nlaponi mwakikokhorelaru vakhaani pahi.’ Masi Yeesu aahimwaakhula aromolaka nlamulo nimodha na Muluku airaka: ‘Okhume-vo, Satana! Ehaatikhiwa wiira nihaana onkokhorela Yehova meekhe.’

Diyaabu aahikhuma opuro ole, ndho yaahuura malaikha ennvaha eyooca Yeesu. Okhuma nihiku nne Yeesu aahipacera olaleya ihapari dhooreera dha Omwene wa Muluku. Atthu yaahipacera odhiveliwa ni itthu Yeesu aahudhiha iye. Tivondho atthu awo yaanintthara khuta opuro aarowa iye.