Yeesu Aahiwiikara Alipa a Nakoso Ntempulu

Nuuvira miyeeri vakhaani Yeesu apatisiwe, mwaakha wa 30 Nuumala Kiriistu Ora, owo aahirowa oYerusaleemu. Atthu awaatta yaahirowa esidadi ele wiira yaamwiire Paaskowa. Efeesta ele ya Paaskowa yaahela mpuwa ovaha mikuttho dha inama ntempulu. Atthu akina yaaniruuha inama-dha wiira evahe nkuttho, masi atthu akina inama-dha yaathuma nuumala ophiya oYerusaleemu.

Nuumala Yeesu ophiya otempulu aahiwoona atthu ethumihaka inama, awo khiyaareenle onkokhorela Yehova, masi yaareenle omweetta nakoso mpaani mwa Yehova. Ndho etthu seeni Yeesu aapanke iye nuumala woona elo? Owo aahipaka nrepettho wa nkhoi akaikara ipwittipwitthi ni inama dhikina, aahipinttula meesa a atthu yaathumiha ni aahiitthela vathi misurukhu-dha. Yeesu aahaaleela atthu yaathumiha ntempulu wiira: ‘Mwaakuve mkhumihemo itthu dhinyu idha, empa ya Tiithi aka nhiirihe okhala empa ya nakoso!’

Atthu yaari ntempulu yaahitikinihiwa vawaatta ni etthu Yeesu aapamke iye. Atthareli-ye yaahuupuwela eprofesiiya emodha yeelo yaanlotta Mesiya, yiiraka: ‘Kinawaakihera mooluttuweliwa empa ya Yehova.’

Nuuvira miyaakha miraru mwaakha wa 33 Nuumala Kiriistu Ora, Yeesu aahitthikela-tho owiikara atthu ootheene yaathumiha ntempulu. Owo aatthuna wiira atthu ootheene ekattittimiha empa ya Tiithi-ye.