Yeesu Aahipaka Miiriirya Dhawaatta

Yehova aahinruma Yeesu ora valaponi wiira alaleye Omwene wa Muluku. Nitho aahinvaha owerya woopaka miiriirya. Miiriirya idho, dhaahoonihera itthu dhootthuneya Yeesu on’ya iye waapakela apinaatamu nkhama Mwene a Omwene wa Muluku. Yeesu aanipenusa khutta ereetta. Tivondho khutta oopuro aroowa iye, atthu yaawereiwa yaaninrowela wiira aakhalihere ni waapenusa ireettha-dha. Yeesu aanaapenusa atthu yahoona, atthu yahaalotta, atthu yahaaiwa, atthu yaheetta ni atthu yaavoloiwa malaikha oottakhala. Atthu akina yaphararu ikhuwo-dhe pahi yaanipenuwa. Atthu awaatta yaanintthara Yeesu khutta opuro arowa iye. Owo khaahiya wakhalihera atthu, ata okathi aatthuna iye okhala meekhe.

Nihiku nimodha atthu yaahiinkusa nlopwana oorakala enroiha empa aari Yeesu. Masi okhala wiira mpani mmwe yaahikhalamo atthu awaatta, khiyaawenrye ovolowa. Ndho yaahiveta empa ele vadhulu-va ni yaahinkurusela nlompwana ole opuro aari Yeesu. Nuumala Yeesu omoona aahimwirela wiira: ‘Nvenye mwette.’ Nlopwana ole aahivenya akeetta, atthu ootheene yaari vaavale yaahitikiniheya.

Nihiku nimodha Yeesu aviraka nttetthe mmodha, alopwana 10 yaarina mareetta yaanintthara. Okathiya yoole namaretta khaamwaattamela ntthu. Tivondho yaanikhuweela eviraka ottaiwene yiiraka: ‘Yeesu safatali nnikhalihere!’ Yeesu aahaaleela aIopwana ale yaarina mareetta wiira atthu erowe otempulu. Okathi yaarowa awa yaahoona wiira yaahipenuwa. Nlopwana mmodha, mwa alopwana ale 10 okathi onne iye wiira aahipenuwa aahitthika wiira aanxukhurele Yeesu vamodha ni Muluku. Mooriipiha nrima, mwa alopwana ale 10 atthinke aari mmodha yoole pahi wiira axukhurele.

Nthiyana mmodha aavirinhe miyaakha 12 awereiwaka, aanitthuna vawaatta openuwa. Ndho owo aahirowa atakaihana ni atthu awaatta yantthara Yeesu ni aahiphara nlaya na Yeesu. Nuumala nthiyana ole opaka elo, mwawaakuveya aahipenuwa. Ni Yeesu aahoona wiira ahiikhala ntthu aankwannyale, tivondho aahikoha wiira: ‘Taani ophanre nlaya naka?’ Ndho okathi nthiyana ole aamwiwale iye Yeesu akohaka wiira taani aaphanre nlaya-ne aahiituthuwa vawaatta, okhala wiira ntthu aakhalana ereetta ele khawaattamela atthu. Masi hata eri dhiidho owo alontte wiira: Ti miyo kookwannyaleni. Yeesu aahimmaaliha ni anleela wiira: ‘Mwanaka, nrowe ni nrettele.’

Okathiya yoole, aahuura nlopwana mmodha aaitthaaniwa Jaairo akansafatali Yeesu airaka: ‘Nkarowa owannyaka, mwampenuse mwanaaka onwereiwa vawaatta.’ Masi Yeesu ahinaakuve ophiya owannye Jaairo mwaana ole aahuukhwa. Okathi Yeesu aaphin’ye iye, aahaaphwanya amudhi a mwaana ole yiinlaka. Ndho aahaaleela atthu ale wiira: ‘Atthu ehinle, mwaana ola kakhwiye, onoorupa.’ Ndho Yeesu aahiphara ntata na mwaana ole akanleela wiira: “Mwanamwane, nvenye!” Mwawakuveya mwana ole aahivenya. Ndho, Yeesu aahaaleela anaan’yari-ye mwaana ole wiira envahe eyooca. Munniwerya woona moopora anaan’yari-ye yaahakalanle awa?