Yeesu Alaleyaka Voohima dha Omwene

Nuumala Yeesu opatisiwa aahipacera olaleya airaka: ‘Omwene wa Muluku ori vakhiviru.’ Ahudheri-ye yaanintthara vaavo aarowa iye olaleya mittetthe dha oGalileya ni oYudeeya. Okathi atthikenle iye oNazareeti elapo yeelo annunwe iye, aahirowa Nsinakooka akhunula eroolu ya profeeta Yeesaaya akasoma ni ndhu nuulupale airaka: ‘Yehova ookivaha nnepa wawaarya wiira kilaleye ihapari dhooreera.’ Moodhuwela etthu yaamwirinhe Yeesu oloottha moolumo ala? Okhala wiira atthu yaatthuna wiira veene akapaka miiriirya pahi. Masi Yehova aanvahe nnepa wawaarya wiira akalaleerya voohima dha Omwene wa Muluku. Tivondho aahaaleela atthu wiira: ‘Moolumo ala mwiwale nnyu ahaaakhwanela olelo.’

Yeesu aahirowa nlima na oGalileya ni ahaaphwanya weiwo arummwa-ye asese eciyaka ihoopa. Arummwa awo yaari ala: ‘Peedru, Andre, Yakoobo, ni Yoohaani. Yeesu aahaaleela wiira: Nikarowa atthu ekitthare, miyo atthu kinawaakhaliha anamaciya a atthu.’ Mwawaakuveya yaahihiya ociya ni yaahintthara Yeesu. Awo yaahivira oGalileya wootheene, elaleyaka voohima dha omwene wa Yehova. Yaanilaleya Nsinakooka, mapuro awaatta atthu ni mphuroni. Atthu awaatta yaanintthara Yeesu ni arummwa-ye khutta ophuro yaarowa awa. Ovuwa wa Yeesu waahimwarya-mwareya mapuro ootheene ohela mpuwa elapo yoothaivela ya oSiiriya.

Nuuvira okathi, Yeesu ahaavaha arummwa-ye akina oweerya wa opaka miiriirya ni wiikara malaikha ootakhala. Masi arummwa-ye akina yanintthara vaavo alaleerya iye nsidadi ni mmuttettheni. Ni yaahikhala athiyana akina yaamwaaminni nkhama Mariya Matalena, Yowaana, Susaana ni akina a yaawo yaanipaka itthu dhoothene yaawerya awa wiira enkhalihere Yeesu ni arummwa-ye.

Nuumala Yeesu waahudhiha arummwa-ye moopora woolaleerya, aahaaruma orowa olaleerya oGalileeya, atthu awaatta yaawiriyana yaanikhala ahuudheri ni yaanipatisiwa. Masi yaahihala atthu akina-tho, yaatthuna wiiwa voohima dha Omwene wa Muluku. Tivondho ahaalikanyiha atthu awo ni iyooca dhiri mmatta dhintthuneya waakuveliwa wuuruliwa. Owo aalontte wiira: ‘Munvekele Yehova wiira awaacerere ananteko akina mmatta-mwe.’ Nhoolo-mwa Yeesu aahaathanla arummwa-ye 70 ni ahaaruma aili-aili orowa olaleerya mittetthe dha oYudeeya. Awo yaanaahudhiha atthu ootheene voohima dha Omwene wa Muluku. Okathi arummwa ale yaatthinka awa yaahitteeliwa nrima ni yaahinleela Yeesu moopora itthu dhaweettenle awa. Hata Diyaabu khaawerya waakhottihera olaleerya.

Yeesu aahipaka itthu dhoothene aawerya iye wiira aakhalihere arummwa-ye ohihiya olaleerya nuumala owo otthikela wiirimu. Tivondho aaleenle iye wiira: ‘Mwalaleerye atthu ootheene ihapari dhoorera, mwahudhihe noolumo na Yehova ni mwaapatise.’