Yeesu Aheetta Vadhulu wa Maadhi

Ohiya pahi waapenusa aretta ni waahihimusa alipa okhwa, Yeesu aahiparariha ettheku yuulupale ni epula. Nuumala Yeesu ovekela omwaako, aahirowa nlima na oKalileya ni aahoona ettheku yuulupale. Arummwa-ye yaaira eri nkalawani, ndho okhala wiira ettheku yaari yuulupale, awo yaahipaka dhootheene yaawerya awa wiira ekalawa ele ehipwine. Yeesu ahipacera weetta vadhuulu wa maadhi arowaka opuro ole yari ekalawa. Okathi arummwa yaamonna awa Yeesu eettaka vadhuulu va maadhi, awo yaahoova vawaatta. Masi Yeesu aahaaleela wiira: ‘Ti miyo, atthu ehoove.’

Ndho Peedru aahilotta wiira: ‘Mweekhweeli akhala wiira ti nyuwo Pwiiya nkirume wiira kire opuro nrinnyu keettaka vadhulu wa maadhi.’ Yeesu aahaakhula wiira: ‘Peedru nre.’ Yoopaka ettheku dhiidhaale, Peedru aahikhuruwa nkalawani mmwe akeetta wadhulu wa maadhi arowaka opuro aari Yeesu. Masi ahalaka vakhaani ophiya, Peedru aahilipela meepi a maadhi yaakhumiheriwa ni ettheku, ni akoova vawaatta. Ndho vakhani-vakhani, aahipacera opwina. Ndho mwaha wa elo, Peedru aahimwiitthana Yeesu airaka: ‘Pwiya, safatali nkoopole!’ Yeesu ahimphareela Peedru moono akankoha wiira: ‘Seeni nnoova nnyu? Waamini winyu ori vaai?’

Nuumala Yeesu ni Peedru ovolowa nkalawani, mwawaakuveya ettheku ele yaahimaala. Munniwerya wuupuwela moopora arummwa yoonenle awa? Awo yahinleela Yeesu wiira: “Mwekhweeli nyuwo mwa Mwaana a Muluku.”

Masi ela, khiyaari evaara yoopacera Yeesu amaalinhe iye ettheku. Nihiku nimodha Yeesu ni arummwa-ye eri nkalawani elapuwelaka ekhopela ekina Yeesu aahipacera orupa nkalawani. Arupaka dhiidhale, naanaanoru yaahikhumelela ettheku yuulupale ni yaahikhumihera meepi muulupale mpakha omana ekalawa ni nkalawani mmwe yaahidhalamo maadhi. Arummwa yaahimwitthana Yeesu yiiraka: ‘Pwiya ninhala okhwa, safatali nnoopole!’ Yeesu aahivenya akaruma nlima airaka: “Mmaale!” Okathi-ya yoole, etheku yaahimaala. Nuumala-vo Yeesu ahaakoha arummwa-ye airaka: ‘Atthu veena khaana waamini?’ Arummwa ale yaahipacera olotta yaaworu yiiraka: “Hata ettheku ennimwiwelela.” Okhuma nihiku nenne, arummwa yaahihudha onrooromela Yeesu moomalela ni yaahoona wiira khiyaatthune-ya woova etthu.