Yeesu Aahimpenusa Ntthu Ahoona

Afarisi yaaninnyokha Yeesu, ndho mwaha wa elo khula okathi yaanikoca moopora woomphara wiira emphukele. aFarisi yaalotta wiira Yeesu anaapenusa areetta nihiku na Esaabadu. Masi Esaabadu emodha, Yeesu ahimoona nlopwana mmodha ahoona aavekaka esimola. Ndho aahimoonela othunku ni aahaleela arummwa-ye wiira aammupenusa ni owerya wa Muluku. Yeesu aahikusa etthaya atakaiha ni maara-ye anttikitthela nlopwana ole. Nuumala-vo anleela wiira: ‘Nrowe mwasuusule nttaara na oSilowe.’ Ndho nlopwana ole aahirowa osuusula ni mohakalaliha aahipacera woona.

Atthu awaatta okathi ole khiyaakhupali wiira ari nlopwana yoole aayariwe ahoonaka. Masi owo aahilotta wiira: ‘Mweekhweeli ti miyeena.’ Ndho aahikohiwa moopora elo yaweryanen’ya awa, okathi atthokihenre iye ahikusiwa aroiheliwa aFarisi. Nlopwana ole aahitthokihera etthu yairanen’ye Esaabadu ele, masi elo yahaatikiniha atthu awaatta okhala wiira okathi ole, nlamulo khinaamwaakhuleliha ata ntthu ovara nteko nihiku na Saabadu.

Tivondho aFarisi yaahinkoha wiira: Yeesu oopenunseni nihiku na eSaabadu? Akhala wiira ti dhiidho, owerya-we khomkhuma wa Muluku. Masi aFarisi akina yaanilotta wiira Yeesu onniwerya waapenusa areetta akhaliheriwaka ni Muluku.

Afarisi yaahiwitthana anaan’yari-ye nlopwana ole, ekaakoha moopora elo yairanen’ya awa. Anaan’yari-ye, yaanoova wiikariwa Nsinakooka. Ndho mwaha awa elo khiyaalontte itthu dhawaatta. Masi yaloontte pahi wiira khiyaadhuwela moopora elo yairanen’ya awa. aFarisi yaahitthikela onkoha nlopwana ole, ndho nlopwana ole aahaakhula airaka: Miyo atthu kihaaleela moopora elo yiiranen’ya awa, seeni atthu ankhanyerera awa okikoha? aFarisi yahinanariwa vawaatta ni yahimwikara nlopwana ole Nsinakooka.

Nuumala Yeesu odhuwela elo, aahirowa olootta ni nlopwana ole ni aahinkoha wiira: ‘Nyuwo munnimwaamini Mesiya?’ Nlopwana ole aahinkoha Yeesu wiira: ‘Taani yoowo wiira miyo kimwaamini’? Nuumala-vo Yeesu ahimwaakhula wiira: ‘Mesiya, ti yoowo munlottannyuna.’ Yeesu aari ntthu oreera nrima. Nyuwo khamunkhupali elo? Ohiya pahi Yeesu ompenusa nlopwana ole, masi tho aahinkhalihera okhalana waamini.