Yeesu Aahinhihimusa Laazaru

Yeesu aahikhalana axirikha-ye araaru aapheta iye vawaatta yaakhala oBetaaniya. Madhina a axirikha-ye awo taala: Laazaru ni arokoriye aiili Marta ni Mariya. Nihiku nimodha Yeesu aara iye elapo yoottaivela oBetaaniya, ahaakhela nhupi wa Maarta ni Mariya waalotta wiira: ‘Laazaru khanrera owereiwa, safatali nnaakuvele!’ Masi Yeesu aahilokela oorowa. Yaahivira mahiku maili ni aahaleela arummwa-ye wiira: ‘Nkarowa oBetaaniya wiira kanvenyihe Laazaru okhala wiira owo onoorupa.’ Arummwa-ye yaahilotta wiira: ‘Akhala wiira Laazaru onoorupa onoovenya.’ Ndho Yeesu ahiwiiwasasiha saana arummwa-ye aleelaka wiira: ‘Laazaru ohuukhwa.’

Okathi Yeesu aaphin’ye iye oBetaaniya yaaira evinre mahiku masese Laazaru akhwiye. Okathi ole, yaahuura atthu awaatta ekammaaliha Marta ni Mariya. Okathi Marta aaiwale iye wiira Yeesu aanuura, aahintthimakela akanleela wiira: ‘Pwiya, vaakhanle wiira nyuwo mwaari vaava nrokoraka khaakhwa.’ Yeesu aahinleela Marta wiira: ‘Nrokorinyu onootthikela okhala nkumi. Nyuwo munnikhupali elo Marta?’ Marta aahimwaakhula Yeesu wiira: ‘Miyo kinnikhupali wiira owo onoohihimuwa nhoolo.’ Yeesu aahinleela tho wiira: “Miyo ka ohihimuwa ni ekumi.”

Ndho Maarta aahirowa onleela Mariya wiira Yeesu ohuura. Mariya ahintthimakela Yeesu ni atthu awaatta yaahintthara okhala wiira awo yoona wiira aaya omaahiye weiwo aavithiwewo nrokoriye. Nuumala omphwanya Mariya ahikokhora ohoolo wa Yeesu anlaka ni akanleela wiira: ‘Pwiya, vaakhanle wiira nyuwo mwaari vaava, nrokoraka khaakhwa!’ Okathi Yeesu amoonne iye Mariya ariipiwe nrima ni anlaka ni veene tho aahipacera wuunla. Ndho atthu yaari vaavale okathi yamoonna awa Yeesu anlaka, yaahilotta wiira: ‘Mweekhweli Yeesu aanimpheta vawaatta Laazaru.’ Masi atthu akina yaari vaavale yaaniikoha yiiraka: ‘Niire ola khanwerya opaka etthu wiira amoopole nxirikha-ye?’ Eseeni Yeesu aya iye opaka?

Yeesu aahirowa omahiye avithiwewo Laazaru, masi mahiye ale yaahittiyeliwa ni nluku nuulupale. Yeesu aahaaleela atthu wiira: ‘Nikhumihiwe-vo nluku nna.’ Marta aahiinleela Yeesu wiira: ‘Masi aavira mahiku masese Laazaru akhwiiye! Woonawene owo onninkha.’ Masi atthu yahikhumihavo nluku nne ni Yeesu aahipacera ovekela airaka: ‘Tiithi, kinnooxukhurelani okhala wiira munnikiwiriyana, miyo koodhuwela wiira okathi wootheene nyuwo munnikiwiriyana, masi kinoovekelani dhiidho mwaha awa atthu ala, wiira awo edhuwele wiira nyuwo tinkirumme ora valaponi.’ Nuumala-vo Yeesu aahikhuwela ni ndhu nuulupale airaka: “Laazaru, nkhumele vaate nno!” Okathi ole yaahiraneya etthu yootikiniha, Laazaru aahikhuma mmahiye ni ikuwo dhootheene aavitikeleliwe iye. Yeesu aahilotta wiira: ‘Ataphuliwe ikuwo idha ovitikeleliwe iye.’

Atthu awaatta yoonne mwiiriirya ole yaahimwaamini Yeesu. Masi atthu akina yaahirowa waleela Afarisi. Okhuma nihiku nne, Afarise yaahilakela omwiipha Yeesu ni Laazaru. Ndho mmodha a arummwa ale 12, yoowo aitthaniwa Yuuda Iskariyooti, aahirowa okumana ni Afarisi akaaleela wiira: ‘Atthu an’ya okivaha kaavi kaakhalihera ompwanya Yeesu?’ Awo yahinleela Yuuda wiira ninawoovahani nsurukhu 30 wa eparatha. Ndho okuma okhathi ole, Yuuda Iskariyooti aanikoca okathi wooreerela wiira ampharihe Yeesu.