Yeesu Aahiphariwa

Yeesu ni arunmwa-ye yaahirowa Omwaako Oliveera. Waari ohiyu ni mweeri waaira ophancenre waarya. Okathi yaaphin’ya awa oXardim ya oXeseemani, Yeesu aahaaleela arunmwa-ye wiira: ‘Atthu ehale vaava ni ekaikocela.’ Ndho, ahikhuma opuro ole vakhaani akokhora akavekela airaka: ‘Tiithi ekikhumelele ele muntthuna nnyu.’ Ndho, Yehova ahiruma nlaikhane wiira nanlipihe Yeesu. Okathi Yeesu aatthinke iye, aaphwannye arummwa-ye erupaka. Ndho aahaleela wiira: ‘Atthu evenye! Okathi ola kaahi okathi woorupa, okhala wiira awanani aka ahaanle ora okiphara.’

Mwawaakuveya Yuuda Iskariyooti aahura ni atthu awaatta ekunse ikatana-dha ni ikopo. Okhala wiira Yeesu aanirowaka eXardim ele ni arummwa-ye, ndho Yuuda ahidhuwela wiira yaari weeiwe. Yuuda aahiiwanana ni anakhotto ale, wiira amwavaha esinaale wiira endhuwele Yeesu. Yuuda ahimwattamela Yeesu ni aahinvaha ebeexu. Tivondho Yeesu aahinkoha wiira: ‘Yuuda, nnimphariha mwaana a Muluku ni ebeexu?’

Yeesu ahiwaattamela anakhotto ale aakakoha wiira: ‘Atthu animwaadha ani?’ Awo yaahakhula wiira: ‘Nimmwaadhya Yeesu Nnazareeti.’ Ndho owo aahaakhula wiira: ‘Ti miyeena’. Atoropa ale yaahitikinihiwa ni woova ekatthikela ottuli mpakha omoreela vathi. Yeesu aahitthikela-tho waakoha airaka: ‘Atthu animwaadhya ani?’ Awo yaakhula wiira: ‘Niirale Yeesu Nnazareeti.’ Tivondho Yeesu aahakoha wiira: ‘Miyo atthu nkaleenle wiira ti miyeena? Atthu yaahi-ye arummwa aka erowe.’

Okathi Peedru aadhuwenle iye etthu yaairaneya, aahiikusa ekatana athikila naaru na nlopwana aitthaniwa Maliko. Masi Yeesu aahikwannya naaru na nlopwana ole ni naahipenuwa. Ni aahinleela Peedru wiira: ‘Peedru mpwehe ekatana. Ole onrumela ekatana onookhwa ekatana yeelo.’ Atoropa ale yaahimpara Yeesu ni yaahintthuka, ndho arummwa-ye yaahitthyawa. Nuumala-vo atthu ale yaahinroiha Yeesu owannye Anaas. Ndho owo ahimpakela makoho awaatta ni moottharelana ahiroihiwa owannye Kaifa nankuttho Muulupale. Etthu seeni yaawiiranenle arummwa ale?