Peedru Aahinkhootta Yeesu

Okathi Yeesu aleenle iye arumwan-ye wiira ohiyu yoola ootheene nnyu nnookitthyawa, Peedru aakhunle wiira: ‘Miyo nkinkhala-khala kipakaka elo’. Masi Yeesu aahinleela Peedru wiira: ‘Oleelo nthupi ahinaakuve wiipa, nyuwo nnookikhootta ivaara thaaru mwiiraka khamunkidhuwela.’

Okathi anakhotto ale yaphin’ya awa emphara Yeesu ekanroiha owannye Kaifa, arummwa akina yahitthyawa. Masi Peedru ni arummwa akina yaanintthara Yeesu eviraka othaiwene. Peedru aahintthara Yeesu mpakha owannye Kaifa waattamela vatthu waapattihiwevo mooro. Okathi mooro ole waarya awa ni wammoleela awa Peedru omaaithoni, nrumei mmodha a Kaifa aahindhuwela Peedru ni alootta wiira: ‘Ninyuwo-tho mweetta ni Yeesu!’

Peedru aahaakhula wiira: ‘Miyo naari, woonawene munkilattaniha ni ntthu nkina!’ Nuumala-vo Peedru aahikhuma, arowa wattamela vankhora. Masi nrumeyi nkina nthiyana nuumala omoona Peedru, aahilotta wiira: ‘Ola ti Peedru, nitho mmodha a yaale yeetta ni Yeesu’. Peedru aahaakhula wiira: ‘Kiirale wiira miyo nkinindhuuwela Yeesu!’ Nrumeyi ole aahitthikela-tho olotta wiira: ‘Nyuwo mwa mmodha a yaale yeetta ni Yeesu, malottelo nnyu annidhuweleya wiira nyuwo mwa Nkalileya nkhama Yeesu.’ Masi Peedru aahilapha airaka: ‘Khuraani, miyo nkinindhuwela nlopwana ole!’

Okathi yoole, nthupi waahipa. Ni Peedru aahimoona Yeesu arukununwe anlipelaka. Owo aahuupuwela mooluumo a Yeesu ni aahikhuma opuro ole anlaka ni axaankale vawaatta.

Ndho nankuttho muulupale ni alopwana akina, yaahithukumana wiira emphukele Yeesu owannye Kaifa. Awo yaahilakela omwiipha Yeesu, masi-tho atthu yatthuneya odhuwela saana wiira Yeesu aahipaka etthu yoottakhala. Masi atthu awo khiyaaphwannye-na ata nlattu okhala wiira Yeesu khaatanke opaka etthu yootakhala. Ndho Kaifa, aahinkoha Yeesu akhala wiira ari Mwaana a Muluku. Okathi Yeesu aakhunle iye wiira ekhweeli, Kaifa aahilotta wiira: ‘Khanintthuneya-tho okoca mathowa makina, owo oonlotta moohikhalela Muluku.’ Ni makhulupale a Osineedriyu yahaakhulela wiira Yeesu aiphiwe. Ndho, awo yaahimmana, yaahinsenyera ni yaahinkhuneela omaithoni envaha epuraata elotaka wiira: ‘Akhala wiira nyuwo mwa profeeta, nnileele ntthu oomanneni!

Nuumala osa, Kaifa ni alopwana akina yaahithukumana-tho etthikela onkoha Yeesu akhala wiira veene ari mwaana a Muluku, Yeesu ahaakhula wiira: ‘Atthu veena tanlota wiira miyo ka Mwaana a Muluku.’ Ndho makhulupale ale yaahilotta wiira Yeesu oopaka etthu yoottakhala mwaha wa onlotta voohikhalela Muluku. Moottharelana, awo yaahinkusa enroiha wa Pilaatu, Nkhulupale muulupale a oRoma. Etthu seeni yaaya onkhumelela Yeesu?