Korneeliyu Aahihudha Voohima Dha Yehova

Okesareeya, aahikhala-wo nkhulupale a anakhotto a oRooma yoowo aitthaniwa Korneeliyu. Owo khaari n’yuuda, masi aanittittimihiwa vawaatta ni aYuuda akina. Owo aari ntthu oovaha ni anaakhalihera atthu oothoiwa. Korneeliyu aanimwaamini Yehova ni aninvekela mahiku ootheene. Nihiku nimodha, naahinkhumelela nlaikha na Yehova nikanleela wiira: ‘Muluku onniiwa mavekelo nnyu. Vano mwaarume arumeyi nnyu akina erowe oYope enrowele Peedru.’ Mwawaakuveya, Korneeliyu aahaathanla alopwana araru wiiira erowe oYope.

Nanlelo ari oYope weiwo, Peedru aahoonihiwawa etthu moolohani. Owo aahooniwa inama dheidho yahaakhulelihiwa awa aYuuda okhuura, nuumala-vo aahiiwa ndhu ninleelaka wiira: ‘Nkhuure.’ Peedru aahikhootta alottaka wiira: ‘Masi miyo nkinakhuure inama dha mwiikho.’ Ndhu nne naahinleela wiira: ‘Nhikaitthana inama idha okhala dha mwiikho okhala wiira Muluku ooreeriha.’ Moottharelana Peedru aahileeliwa tho wiira: ‘Aakhala alopwana araru eemenle vankhora owannyu.’ Peedru aahihula nkhora-ye ni ahaakoha alopwana ale etthu yaarenla awa owannye. Alopwana ale yaahimwaakhula wiira: ‘Nirummwe ni Korneeliyu nkhulupale a anakhotto a oRooma, owo onoovekelani wiira nrowe owannye oKesareeya.’ Peedru aahiwaakhela alopwana ele erupa owannye mpakha mmenlo mmwa. Ndho nuuseliwa, Peedru vamodha ni alopwana ale yaahirowa oKesareeya, vamodha ni anna akina yakhumme oYope.

Okathi Korneeliyu aamonne iye Peedru aahikokhora ohoolo-we. Masi Peedru aahinleela wiira: ‘Mweemele! Miyo ka Pinaatamu nkhama nyuwo. Ata aYuuda ehiphiyaka mmaitthekoni wa Amalapo Muluku ookiruma wiira kire owannyu-va. Safatali nkiileele etthu nkiitthanenle nnyu.’

Korneeliyu aahinleela Peedru wiira: ‘Mahiku masese avinre ottuli kaanvekela Muluku, ndho nikikhumelela nlaikha nikakileela wiira kiwiitthaneni. Safatali nnihudhihe moolumo a Yehova.’ Peedru aahilotta airaka: ‘Vano koodhuwela wiira Muluku khaninthanla ntthu, moohicali akhala wiira ntthu owo nYuuda aahindho naari. Owo onnimwakhulela khuta ntthu ontthuna onkokhorela.’ Peedru ahaahudhiha atthu ale itthu dhawaatta voohima dha Yeesu. Tivondho Korneeliyu vamodha ni atthu ootheene yaari nuuwo yaahaakhela nnepa wawaarya ni yaahipatisiwa.