Atthu Awaatta Yaahikhala Makiristau

Arummwa yaahiwelela yooruma ya Yeesu ya olaleya ihapari dhooreera elapo yootheene. Mwaakha wa 47 Nuumala Kiriistu Ora, anna a wAantiyookiya yaahinruma Paaulu ni Baarnaba orowa ovara nteko woolaleerya. Awo yaahilaleerya ilapo dhawaatta nkhama wAasiya, oDeerbi, oLiistra ni wIikooniya.

Paaulu ni Baarnaba yanaalalerya atthu a makhalelo ootheene: Mathaaciri, amasikhini, marapasi ni atthu awuuluvala. Atthu awaatta yaahikhupali ikhweeli voohima dha Yeesu Kiriistu. Masi okathi Paaulu ni Baarnaba yaaronwe awa onlaleenrya Kuvernatoore Seerxiyu Paaulu a elapo ya oXiipre, nlopwana mmodha ari vaavale yoowo ari nkhulukana, aaheehererya waakhoottihera. Ndho Paaulu aahinleela nkhulukana ole wiira: ‘Yehova onnoonyokhani.’ Naanaanoru, nkhulukana ole aahihiya woona. Okathi Kuvernatoore ole onne iye ele yaairanen’ye aahaamini.

Paaulu ni Baarnaba yaanilaleerya mapuro oottheene: Mmawaani, mapuro eettiwa nakoso, mphuroni ni nsinakooka. Okathi yaari awa nttetthe mmodha wa oLiistra, yaahimpenusa nlopwana mmodha oorakala. Atthu yoonne mwiiriirya ole yuupuwela wiira Paaulu ni Baarnaba yaari amuluku, tivondho yaahipacera waakokhorela. Masi Paaulu ni Baarnaba yaahaaleela atthu ale wiira: ‘Atthu ehipake elo! Hiyo naatthu nkhama veena, mmukokhorele Muluku pahi.’ Okathi-ya yoole, yaahiphiya aYuuda akina yaawo yaamoothenrye Paaulu ni Baarnaba itthu dhawaatta. Atthu ale awaatta yaahinvonya Paaulu ni maluku, nuumala-vo empurulela ota wa esidadi ni enhiya weiwo yuupuwelaka wiira ahuukhwa! Masi Paaulu kaakhwi-ye. Mwawaakuveya anna yaahuura enkusa entthikihera osidadi. Nuuvira okathi vakhaani, Paaulu aahitthikela wAantiyookiya.

Mwaakha wa 49 Nuumala Kiriistu Ora, Paaulu aahipaka nkwaha nkina. Paaulu aahitthikela waasekurya anna a wAasiya, ahirowa olaleerya mapuro oottaivela a wEeuroopa, ahirowa wAateena, wEefeso, oTesaloonika ni ilapo dhikina. Siila, Luuka ni rapasi Timootiyu yaari vamodha ni Paaulu. Awo yaanivara nteko vamodha wiira epake miloko dha eKiristau ni olipiha miloko idho. Paaulu aahiviriha mwaakha ntero ari oKorintu aalipihaka anna. Owo anilaleerya, ohudhiha ni anaatikhela ikaarta miloko dhawaatta ni aanivara nteko wa opaka iheema. Nuuvira okathi aahitthikela wAantiyookiya.

Nuuvira okathi, mwaakha wa 52 Nuumala Kiriistu Ora, Paaulu aahipaka nkhwaha wa neeraru apaceraka wAasiya. Owo aahirowa mpakha oFilipi ni aahikhuruwela arowaka oKorintu. Paaulu aahiviriha miyaakha dhawaatta ari wEefeso alaleeryaka ihapari dhooreera, aapenusaka aretta ni akhaliheraka miloko. Nitho khuta nihiku aanirowa esaala yuulupale wiira apake miyaha. Atthu awaatta yaaiwa ihapari dhooreera Paaulu alaleerya iye yaahikhala makiristau. Nuumala Paaulu olaleerya ihapari dhooreera ilapo dhawaatta aahirowa oYerusalemu.