YOOSOMA 46
Seeni Munreerela Nnyu Wiivahererya wa Yehova ni Opatisiwa?
Yoothanla yuulupale ninreerela nhu opaka mweekumini mwihu ori wiivahererya wa Yehova. Hiyo ninnivahererya wa Yehova vaavo nimpaka nhu nivekelo ninlaiheraka onkokhorela yeene pahi ni opaka yootthuna-ye okhala etthu yoopacera mweekumini mwihu. (Esalimo 40:8) Noomala opaka elo, ninnipatisiwa. Vaavo nimpatisiwa nhu, ninniwoonihera atthu wiira nihivahererya wa Yehova. Ndho yoothanla ya wiivahererya wa Yehova ennirukunusa ekumi ya ntthu. Masi eseeni enimwiiriha ntthu opaka yoothanla elo yuulupale?
1. Eseeni emmwiiriha ntthu wiivahererya wa Yehova?
Mwaha wa ompheta wihu onniniiriha wiivahererya wa Yehova. (1 Yohani 4:10, 19) Biibiliya onlotta wiira: ‘Mumphete Yehova Muluku nnyu ni nrima nnyu wootheene, ni ekumi nnyu yootheene, ni muupuwelo nnyu wootheene, ni ikuru dhinyu dhootheene.’ (Marko 12:30) Hiyo ninnoonihera wiira ninnimpheta Muluku ohiya pahi ni moolumo masi-tho ni miteko. Mwa ntakihero, okathi atthu aili atthukelanne aahiidho annamorari anooniherana awa ophetana weekhweeli nkina ni nkhwe, nuuvira okathi annilakela othelana. Emodha-modharu, ompheta wihu Yehova nuuvira okathi onniniiriha wiivahererya wa Yehova ni opatisiwa.
2. Mareeliho seeni Yehova oninvaha iye ntthu noomala opatisiwa?
Noomala nyuwo opatisiwa, nnoopacera wiirela mphantta emudhi yuulupale ya Yehova. Nitho nnawoona mweekumini mwinyu wiira Yehova onnoophetani ni nnootepa omwaattamela. (Munsome Malakhiya 3:16-18.) Ohiya-vo, Yehova onookhala Tiithi nnyu ni nnookhalana anna ni arokora a olumwinku wootheene, atthu yaawo animpheta Yehova ni anoophetani. (Munsome Marko 10:29, 30.) Masi ekhweeli wiira nhinatthi opatisiwa dhookhala itthu munreerela nnyu opaka. Yoopacera, nhaana ondhuwela Yehova, ompheta ni omwaamini Mwane Yesu Kiristu. Noomala, nvahererye ekumi nnyu wa Yehova. Ndho mwaapaka elo, nnoopatisiwa ni nnookhalana eparakha ya ophwanya ekumi yoohimala. Nuulumo na Muluku ninlotta wiira: ‘Opatiiso onniwoopolani vano.’—1 Pedru 3:21..
NHUDHE ITTHU DHIKINA
Moone moopora oraawa vootthuneya nyuwo wiivahererya wa Yehova ni opatisiwa.
3. Ootheene nhu nihaana onthanla taani ninreerela nhu onrumeela
Khalai atthu akina awisarayeeli, yuupuwela wiira yanwerya onkokhorela Yehova ni okathi omodharu enkokhorelaka muluku etheru Bayaali. Masi Yehova aahinruma profeeta Eliya wiira aaleele wiira etthu yaapaka awa yaari yootakhala. Munsome 1 Mamwene 18:21, nuuvinya mwaakhule nikoho ninttharelana:
Yoothanla seeni aIsarayeeli yaareerela awa opaka?
Nkhama aIsarayeeli, hiyo nihaana onthanla taani ninreerela nhu onrumeela. Munsome Luka 16:13, nuuvinya mwaakhule makoho anttharelana:
Atthu akina anuupuwela wiira anoowerya onkokhorela Yehova okathi omodharu ekokhorelaka itthu ikina. Seeni opaka elo ohinweryaneya awa?
Nimmoonihera dhai Yehova wiira noonthanla onrumeela?
4. Muupuwele moopora Yehova onoophetaiyeni
Yehova onivaha itthu dhawaatta dhootepa oreera. Khindho hiyo eseeni ninreerela nhu onvaha? Moone EVIIDIYU.
Inamuna seeni Yehova onoonihera iye wiira onninipheta? Nsome Esalimo 104:14, 15 ni 1 Yohani 4:9, 10, nuuvinya mwaakhule makoho anttharelana:
Dhoovaha seeni dha Yehova dhintepa woodhivelani?
Vaavo nnuupuwela nnyu dhoovaha idho nnimoonela dhai Yehova?
Niire mwaataka ovahiwa etthu ehaareere woodhivelani? Moohakanyera, nyuwo mwaahinxukhurela ntthu oovanheni. Munsome Otumererya 16:17, nuuvinya mwaakhule nikoho ninttharelana:
Vaavo nnuupuwela nnyu itthu dhootheene Yehova oovanheiyeni, etthu seeni nlakenle nnyu ompakela Yehova?
5. Wiivahererya wa Yehova onniphwanyiha mareeliho awaatta
Atthu awaatta anuupuwela wiira ovuwa, okhalana nteko wooreera ni okhalana nsurukhu wa waatta onawaaphwanyiha ohakalala. Masi niire elo ekhweeli? Moone EVIIDIYU, nuuvinya mwaakhule makoho anttharelana:
Hata Andrey waatepa ondhivela ommana poola, seeni yamwiirinhe ohiya ommana?
Owo aahithanla wiivahererya wa Yehova, ohiya ommana poola. Nyuwo nnoona wiira owo opaka yoothanla yoorera? Mwaha wa seeni?
Nrummwa Paulu ahinatthi okhala Nkiristau, owo ahikhalana owerya wa ophwanya nteko woovuwa. Owo aahisomihiwa malamulo a ayuda ni namahudhiha oodhuweliwa. Masi Paulu aahileva itthu dhootheene akhala Nkiristau. Niire nuuvira okathi owo ahithanana mwaha woopaka elo? Munsome aFilipe 3:8, nuuvinya mwaakhule makoho anttharelana:
Eseeni yamwiiriha Paulu olotta wiira itthu aapaka iye khalai ahinatthi okhala Nkiristau dhaari nkhama “ikokhola”?
Itthu seeni owo aaphwannye iye noomala oleva itthu dhootheene?
Nnoona wiira nnookhalana ekumi yoohakalala mwathanla onrumeela Yehova? Eseeni enwiirihani olotta dhiidho?
Okhala Nkiristau waahinvaha Paulu itthu dhawaatta oxira itthu dhootheene aalenve iye
ATTHU AKINAKU ANLOTTA WIIRA: “Miyo koodhuwela wiira ela ekhweeli, masi nkintthuna wiivahererya wa Yehova ni opatisiwa.”
Seeni nnoona nnyu wiira tivootthuneya wiivahererya wa Yehova ni opatisiwa?
WUULUULA
Ompheta wihu onniniriha wiivahererya wa Yehova ni opatisiwa.
Ipontu dhuulupale
Seeni ninreerela nhu ompheta Yehova ni onkokhorela?
Mareeliho seeni Yehova onaavaha iye arumeyi-ye oopatisiwa?
Niire munnitthuna wiivahererya wa Yehova?
NTHOKODHE ITTHU DHIKINA
Moone nthowa nimwiirinhe nthiyana mmodha aipa miyuusika ni nlopwana ammana poola ovahererya ekumi-ya wa Yehova.
Amiravo Annikoha—Eseeni Kinreerelaka Opaka Mweekumini Mwaka? —Wuupuwelela 6:54
Moone mathowa makina an’ya wookhaliherani wiivahererya wa Yehova.
“Seeni Oraawa Vootthuneya Wiivahererya wa Yehova?” (A Sentinela, Janeiro de 2010)
Moone eviidiyu ya ncipo enoonihera ohakalala amphwanya awa ale yiivaherenrye wa Yehova.
Nsome mwaha oni:“ Miyo Kaanikoha Wiira: ‘Seeni Nipattusiwe nhu?’” wiira moone etthu yamwiirinhe nthiyana mmodha ovarerya etthu yaari nipuro noopacera mweekumini mwe.
“Biibiliya Onnirukunsa Ikumi dha Atthu” (A Sentinela, 1 de Novembro de 2012)